আনুষ্ঠানিকভাৱে যুদ্ধ সমাপ্ত হৈছে যদিও গাজাত হামাছৰ বিৰুদ্ধে ইজৰাইলৰ অভিযান অব্যাহত আছে। এই অভিযানৰ মাজতে এইবাৰ হামাছৰ সেনা প্ৰধান ইজ আল দিন আল হাদ্দাদ নিহত হৈছে। শনিবাৰে ইজৰাইলৰ সেনাৰ তৰফৰ পৰা এই তথ্য ৰাজহুৱা কৰা হৈছে। সেনাই জনোৱা অনুসৰি, শুকুৰবাৰে গাজা চহৰত এক অভিযান চলোৱা হৈছিল আৰু সেই অভিযানতে হাদ্দাদৰ মৃত্যু হয়। হামাছৰ তৰফৰ পৰাও এই মৃত্যুৰ খবৰ স্বীকাৰ কৰা হৈছে।
এএফপিৰ প্ৰতিবেদন অনুসৰি হামাছে জনাইছে যে শুকুৰবাৰে ইজৰাইলৰ আক্ৰমণত হাদ্দাদৰ মৃত্যু হৈছে। তেওঁ সেই অঞ্চলৰ এটা এপাৰ্টমেণ্টত আশ্ৰয় লৈ আছিল আৰু শুকুৰবাৰে ইজৰাইলে তাত বিমান আক্ৰমণ চলায়। এই আক্ৰমণৰ ফলতে হাদ্দাদৰ মৃত্যু হয়। এই মৃত্যুৰ খবৰ পোহৰলৈ অহাৰ পিছতে ইজৰাইলৰ বিৰুদ্ধে গাজাৰ সাধাৰণ ৰাইজ ক্ষুব্ধ হৈ পৰিছে। হাদ্দাদৰ মৃত্যুৰ পিছত তেওঁৰ শেষকৃত্যত হাজাৰ হাজাৰ নাগৰিক একত্ৰিত হয় আৰু তেওঁৰ শেষ যাত্ৰাত বহু শিশুকো দেখা পোৱা যায়।
ইজৰাইল ডিফেন্স ফৰ্চ চমুকৈ আই ডি এফৰ তৰফৰ পৰা জনোৱা হৈছে যে ৭ অক্টোবৰত ইজৰাইলৰ মাটিত হামাছে চলোৱা আক্ৰমণৰ ষড়যন্ত্ৰৰ সৈতে এই হাদ্দাদ জড়িত আছিল। দীৰ্ঘদিন ধৰি তেওঁ ইজৰাইলৰ হিট লিষ্টত আছিল। ইজৰাইলৰ সেনাই কয় যে হাদ্দাদ আছিল হামাছৰ সেইসকল জীৱিত সন্ত্ৰাসবাদীৰ এজন, যিয়ে ৭ অক্টোবৰৰ আক্ৰমণৰ পৰিকল্পনা আৰু ৰূপায়ণত মুখ্য ভূমিকা পালন কৰিছিল। ইয়াৰ উপৰিও যুদ্ধৰ সময়ত হাদ্দাদে বৃহৎ সংখ্যক ইজৰাইলী বন্দীক নিজৰ জিম্মাত ৰাখিছিল আৰু নিজৰ প্ৰাণ ৰক্ষা কৰিবলৈ তেওঁ বন্দীত থকা লোকসকলক ঢাল হিচাপে ব্যৱহাৰ কৰিছিল।
আনহাতে গাজাৰ স্বাস্থ্য মন্ত্ৰালয়ৰ তৰফৰ পৰা জনোৱা হৈছে যে যোৱা বছৰৰ ১১ অক্টোবৰত ইজৰাইল আৰু হামাছৰ মাজত যুদ্ধবিৰতি চুক্তি সম্পন্ন হৈছিল। কিন্তু যুদ্ধবিৰতি হ’লেও ইজৰাইলৰ অভিযান স্তব্ধ হোৱা নাই। যুদ্ধবিৰতিৰ পিছৰে পৰা এতিয়ালৈকে গাজাত ইজৰাইলী সেনাৰ আক্ৰমণত ৮৭০ জন লোকৰ মৃত্যু হৈছে আৰু আহত লোকৰ সংখ্যা ২৫৪৩ জন হৈছে।
