মহাৰাষ্ট্ৰৰ ছাত্ৰ-ছাত্ৰীৰ বাবে ‘ৰেণুকাই কেৰিয়াৰ চেণ্টাৰ’ বা আৰ চি চি আছিল এক সপোনৰ দৰে। কোনোবাই আগতে ‘ডাক্তৰ বনোৱা কাৰখানা’ বুলি কৈছিল, কোনোবাই ‘মোটেগাওঁকাৰ ছাৰৰ ক্লাছ’ বুলি কৈছিল। কিন্তু এতিয়া সেই আস্থাৰ দেৱালখনত এক বহল ফাট মেলিলে।
২০২৬ চনৰ NEET-UG পৰীক্ষাৰ প্ৰশ্নকাকত ফাদিলৰ গোচৰত চিবিআইৰ জালত পৰিছে এই প্ৰখ্যাত প্ৰশিক্ষক শৃংখলৰ মুৰব্বী শিৱৰাজ ৰঘুনাথ মোটেগাওঁকাৰ। কেন্দ্ৰীয় তদন্তকাৰী সংস্থাই লাটুৰৰ শিৱনগৰ অঞ্চলৰ বিলাসী বাসগৃহৰ পৰা গ্ৰেপ্তাৰ কৰি ৯ দিনৰ জিম্মাত লৈছে। NEET কেলেংকাৰিৰ এয়া দশমটো গ্ৰেপ্তাৰ।
তদন্তকাৰীয়ে কয় যে মোটেগাওঁকাৰ কেৱল এজন শিক্ষক নহয়, তেওঁ এটা সুসংগঠিত প্ৰশ্নকাকত ফাদিল ছিণ্ডিকেটৰ অতি গুৰুত্বপূৰ্ণ সদস্য। চিবিআইৰ দাবী যে পৰীক্ষাৰ সমগ্ৰ প্ৰশ্নকাকত মোটেগাওঁকাৰৰ মোবাইল ফোনত উদ্ধাৰ হৈছে।
পৰীক্ষাটো ৩ মে’ত হ’ব লগা আছিল, কিন্তু ১০ দিন আগতে অৰ্থাৎ ২৩ এপ্ৰিলত প্ৰশ্নকাকত তেওঁৰ ওচৰ পায়হি! তেওঁৰ ফোনটো ফৰেনছিক পৰীক্ষাৰ বাবে জব্দ কৰা হৈছে। তদন্তকাৰীসকলে দাবী কৰে যে তেওঁ এই প্ৰশ্ন আৰু উত্তৰসমূহ এজনতকৈ অধিক লোকৰ মাজত প্ৰচাৰ কৰিছিল।
১৯৮০ চনত জন্মগ্ৰহণ কৰা শিৱৰাজ মোটেগাঁওকাৰ ৰসায়ন বিজ্ঞানৰ স্বৰ্ণ পদক বিজয়ী। ২০০৩ চনত তেওঁ লাটুৰত সৰু পৰিসৰত আৰ চি চি আৰম্ভ কৰিছিল যদিও ১৯ বছৰত ই এক বিশাল সাম্ৰাজ্যলৈ ৰূপান্তৰিত হৈছিল। তেওঁৰ কোচিং চেইনৰ শাখা মহাৰাষ্ট্ৰৰ পুনে, নাছিক, ঔৰংগাবাদ, নন্দদকে ধৰি ৮খন চহৰত আছে।
তেওঁলোকে দাবী কৰে যে যোৱা ১৯ বছৰত তেওঁলোকে ১৫ হাজাৰৰো অধিক চিকিৎসক তৈয়াৰ কৰিছে। বাৰ্ষিক ১.২ লাখৰ পৰা ২.৪ লাখ টকাৰ মাচুল লোৱা এই প্ৰতিষ্ঠানটোৱে প্ৰায় ৮০ হাজাৰ ছাত্ৰ-ছাত্ৰীক শিক্ষা প্ৰদান কৰে। মোটেগাওঁকাৰে আগতে নিজকে ‘ভিজনাৰী এডুকেটৰ’ বা স্বপ্নদ্ৰষ্টা শিক্ষক হিচাপে উপস্থাপন কৰিছিল, যাৰ উদ্দেশ্য আছিল গাঁৱৰ সুদূৰ চুকত থকা ল’ৰা-ছোৱালীকো শিক্ষা প্ৰদান কৰা। কিন্তু আজি তেওঁৰ বিৰুদ্ধে হাজাৰ হাজাৰ ছাত্ৰ-ছাত্ৰীৰ ভৱিষ্যতৰ লগত খেলা কৰাৰ অভিযোগ উঠিছে।
এই বৃহৎ দুৰ্নীতিৰ জঁট প্ৰথমে ভাঙিছিল লাটুৰত নহয়, ৮০০ কিলোমিটাৰ দূৰৈৰ ৰাজস্থানৰ ছিকাৰত। ৩ মে’ত পৰীক্ষা শেষ হোৱাৰ ঠিক পিছতেই এজন শিক্ষকে এনটিএক ইমেইল কৰিলে। তেওঁ কয় যে পৰীক্ষাৰ আগদিনা ৰাতি তেওঁ হোৱাটছএপত কিছুমান পিডিএফ পাইছিল, যিবোৰ প্ৰকৃত প্ৰশ্নকাকতৰ লগত হুবহু মিল আছে।
ইয়াৰ লগে লগে লাটুৰৰ এজন অভিভাৱকেও অভিযোগ কৰে যে আৰ চি চিৰ ‘মক টেষ্ট’ৰ ৪২টা প্ৰশ্ন NEET পৰীক্ষাৰ প্ৰকৃত প্ৰশ্নকাকতৰ সৈতে হুবহু একে। ইয়াৰ পিছতে কেন্দ্ৰীয় শিক্ষা মন্ত্ৰালয়ে ব্যৱস্থা গ্ৰহণ কৰে। ১২ মে’ত চিবিআইয়ে সমগ্ৰ গোচৰৰ তদন্তৰ দায়িত্ব লয় আৰু সেইদিনা পৰীক্ষা বাতিলৰ কথা ঘোষণা কৰে।
তদন্তত গভীৰ ষড়যন্ত্ৰৰ তথ্য পোহৰলৈ আহিছে। এই দুৰ্নীতিৰ মূলতে এন টি এৰ প্ৰশ্নকাকত প্ৰস্তুত কৰা পেনেলৰ দুজন সদস্য থকাৰ অভিযোগ। ইয়াৰে এজন হৈছে পুনেৰ উদ্ভিদ বিজ্ঞানৰ শিক্ষক মনীষ গুৰুনাথ মান্ধাৰে আৰু আনজন হৈছে লাটুৰৰ অৱসৰপ্ৰাপ্ত ৰসায়ন বিজ্ঞানৰ শিক্ষক পি ভি কুলকাৰ্ণী, যাক চিবিআইয়ে এই চক্ৰৰ ‘কিংপিন’ বা মূল কাণ্ডাৰী বুলি কৈছে। জানিব পৰা মতে, গোপন প্ৰশিক্ষকৰ জৰিয়তে তেওঁলোকে আগতীয়াকৈ প্ৰশ্নকাকত ফাদিল কৰিছিল।
এতিয়ালৈকে এই চক্ৰটো মহাৰাষ্ট্ৰ, ৰাজস্থান আৰু দিল্লীকে ধৰি পাঁচখন ৰাজ্যত পোৱা গৈছে। পুনেৰ মনীষা ৱাঘমাৰে নামৰ এগৰাকী বিউটি পাৰ্লাৰৰ মালিকো এই বিতৰণ নেটৱৰ্কৰ অন্যতম মূল চৰিত্ৰ হিচাপে আত্মপ্ৰকাশ কৰিছে।
