ভূপালত তিশা শৰ্মা নামৰ এগৰাকী যুৱতী মহিলাৰ ৰহস্যজনক মৃত্যু ঘটিছে। মৃত্যুৰ সময়ত তেওঁ দুমাহৰ গৰ্ভৱতী আছিল। অৱশ্যে মৃত্যুৰ পূৰ্বে ইনষ্টাগ্ৰামত বান্ধৱীক লিখিছিল, ‘মই ফচি গৈছো। তইও যাতে একে ফান্দত নপৰা।’
মধ্য প্ৰদেশৰ ভূপালত সংঘটিত হৈছে এই ঘটনা। তাতেই ৰহস্যজনকভাৱে মৃত্যু হয় ৩১ বছৰীয়া তিশা শৰ্মাৰ। ঘৰৰ পৰা চিপ লোৱা অৱস্থাত উদ্ধাৰ হয় তেওঁৰ মৃতদেহ। অৱশ্যে তাৰ আগৰ নিশা তেওঁ বান্ধৱী এজনীক মেছেজ কৰিছিল। তেওঁ লিখিছিল, ‘মই ফচি গৈছো ভাই। তই কেৱল নফচিবি। এতিয়া বেছি কথা পাতিব নোৱাৰো, সঠিক সময়ত ফোন কৰিম।’
তিশাৰ বান্ধৱী মীনাক্ষীয়ে উত্তৰত লিখিছিল, ‘তোক লৈ মই চিন্তিত, টুক টুক। মই তোক বহুত ভাল পাওঁ, মই তোমাৰ লগত আছো।’ এই চ্যাট পোহৰলৈ অহাৰ লগে লগে পুনৰ তীব্ৰতৰ হৈ পৰিছে ৰহস্য।
তিশা নয়ডাৰ বাসিন্দা আছিল। ২০২৫ চনৰ ডিচেম্বৰ মাহত ভোপালৰ অধিবক্তা সমৰ্থ সিঙৰ সৈতে বিবাহপাশত আবদ্ধ হয়।বিবাহৰ ঠিক পিছতেই তিশাক মানসিক আৰু শাৰীৰিক অত্যাচাৰৰ চলোৱা বুলি পৰিয়ালৰ দাবী। তিশাৰ স্বামী আৰু শহুৰেকে তদন্তত প্ৰভাৱ পেলাবলৈ চেষ্টা চলাইছে বুলিও তেওঁলোকে অভিযোগ উত্থাপন কৰিছে।
দেওবাৰে মধ্যপ্ৰদেশৰ মুখ্যমন্ত্ৰী মোহন যাদৱৰ বাসগৃহৰ সন্মুখত প্ৰতিবাদ সাব্যস্ত কৰে তিশাৰ পৰিয়ালে। দিল্লীৰ এইমছত নতুনকৈ মৰণোত্তৰ পৰীক্ষা কৰিবলৈ দাবী জনাইছে পৰিয়ালটোৱে। সত্য পোহৰলৈ নহালৈকে শেষকৃত্য নকৰোঁ বুলি কৈছে।
আৰক্ষীৰ তদন্তত কেইবাটাও গাফিলতিৰ অভিযোগ উত্থাপন কৰিছে তিশাৰ পিতৃ নৱনিধি শৰ্মাই। তেওঁৰ দাবী, মৃত্যুৰ দুদিন পিছতে এফআইআৰ দাখিল কৰা হৈছে আৰু এতিয়ালৈকে কোনো লোকক গ্ৰেপ্তাৰ কৰা হোৱা নাই। পৰিয়ালটোৱে আৰু অভিযোগ কৰে যে তিশাৰ শৰীৰত আঘাতৰ চিন আছিল যদিও এই কাণ্ডক আত্মহত্যাৰ ৰূপত তুলি ধৰাৰ প্ৰচেষ্টা চলোৱা হৈছে।
পৰিয়ালৰ লোকে কয় যে তিশাই বিয়াৰ পিছত ভোপাল এৰি নয়ডালৈ উভতি যাব বিচাৰিছিল। মৃত্যুৰ কিছুদিন পূৰ্বেও তেওঁৰ পৰিয়ালৰ সৈতে যোগাযোগ আছিল। তিশাৰ ভাতৃ হৰ্ষিত শৰ্মা ভাৰতীয় সেনাবাহিনীৰ মেজৰ। আৰক্ষীয়ে জনোৱা মতে, তিশাৰ স্বামী সমৰ্থ সিং আৰু মাতৃ অৱসৰপ্ৰাপ্ত ন্যায়াধীশ গিৰিবালা সিঙৰ বিৰুদ্ধে যৌতুক, নিৰ্যাতন আৰু প্ৰমাণ ধ্বংসৰ অভিযোগত এছ আই টি গঠন কৰা হৈছে। গিৰিবালা সিঙে আগতীয়া জামিন লৈছে।
