অবৈধ গো-সৰবৰাহ চক্ৰৰ বিষয়ে ‘নৰ্থইষ্ট নাও’ত বাতৰি প্ৰকাশ পোৱাৰ এদিন পাছতেই সক্ৰিয় হৈ পৰিছে লখিমপুৰ জিলা আৰক্ষী। মঙলবাৰে জিলাখনৰ দুটা পৃথক স্থানত চলোৱা অভিযানত আৰক্ষীয়ে মুঠ ৭২টা গৰু আৰু ম’হ জব্দ কৰাৰ লগতে ৫ জন লোকক আটক কৰিবলৈ সক্ষম হয়। ১৫ নং ৰাষ্ট্ৰীয় ঘাইপথত সংঘটিত হোৱা এই অভিযানসমূহে অঞ্চলটোত চলি থকা এক বৃহৎ অবৈধ গো-সৰবৰাহৰ চক্ৰ পোহৰলৈ আনিছে।
আৰক্ষী সূত্ৰই প্ৰকাশ কৰা অনুসৰি, প্ৰথমটো অভিযান বগীনদী আৰক্ষী থানাৰ সমীপত নিশা প্ৰায় ৯.৩০ বজাত নাকা তলাচীৰ সময়ত চলোৱা হয়। এখন কণ্টেইনাৰ ট্ৰাকযোগে (নম্বৰ ইউ পি-২১-চিএন-০১৩৫) অতি অমানৱীয় আৰু অস্বাস্থ্যকৰ পৰিৱেশত ৫২টা সন্দেহযুক্ত চুৰি গৰু সৰবৰাহ কৰি থকা সময়তে আৰক্ষীয়ে বাহনখন জব্দ কৰে। এই ঘটনাত নগাঁও জিলাৰ চামগুৰি আৰক্ষী থানাৰ অন্তৰ্গত বৰমাবিল গাঁৱৰ বুৰহান আলী ওৰফে বাবুল (২৬) আৰু বগামূৰ গাঁৱৰ জালাল উদ্দিনক (২৭) আটক কৰা হয়। জেৰাৰ সময়ত ধৃত লোকদুজনে গৰুসমূহ গোগামুখৰ পৰা ক্ৰয় কৰা বুলি দাবী কৰে যদিও ইয়াৰ সপক্ষে কোনো বৈধ নথি-পত্ৰ প্ৰদৰ্শন কৰাত ব্যৰ্থ হয়। পৰৱৰ্তী তদন্তৰ বাবে আৰক্ষীয়ে গৰুভৰ্তি ট্ৰাকখন আৰু লোকদুজনক থানালৈ লৈ যায়।
ইয়াৰ কেইঘণ্টামান পাছতে নিশা প্ৰায় ১২.৪৫ বজাত চাউলধোৱা আৰক্ষী চকীৰ এটা দলে ১৫ নং ৰাষ্ট্ৰীয় ঘাইপথত আন এখন বাহন (নম্বৰ এ এছ ২৫ এফ চি ৫২৭৫) জব্দ কৰে। এই অভিযানত আৰক্ষীয়ে কোনো বৈধ নথি-পত্ৰ নোহোৱাকৈ সৰবৰাহ কৰি থকা ১৮টা ম’হ উদ্ধাৰ কৰিবলৈ সক্ষম হয়। বাহনখন চলাই থকা দৰং জিলাৰ দলগাঁও থানাৰ অন্তৰ্গত দাইপাম গাঁৱৰ হজৰত আলী (২১), একেখন গাঁৱৰে ৱাহিদুৰ ৰহমান (১৮) আৰু লখিমপুৰৰ ঘিলামৰা থানাৰ অন্তৰ্গত মাজ পত্ৰিচুক গাঁৱৰ প্ৰদীপ পেগুক (৪৭) আৰক্ষীয়ে আটক কৰে। আৰক্ষীয়ে ম’হকেইটা জব্দ কৰি ঘটনা সন্দৰ্ভত এক গোচৰ ৰুজু কৰিছে।
উল্লেখযোগ্য যে, লখিমপুৰৰ বঙালমৰা বজাৰক কেন্দ্ৰ কৰি চলি থকা এই অবৈধ গো-সৰবৰাহ চক্ৰৰ বিৰুদ্ধে ‘নৰ্থইষ্ট নাওত বাতৰি প্ৰকাশ কৰাৰ পাছতেই প্ৰশাসনে এই পদক্ষেপ গ্ৰহণ কৰে। ইয়াৰ পূৰ্বে চলিত বৰ্ষৰ জানুৱাৰী আৰু ফেব্ৰুৱাৰী মাহত ‘পেটা’ (PETA) নামৰ পশু অধিকাৰ ৰক্ষী সংস্থাটোৱে অসম আৰক্ষীৰ সঞ্চালক প্ৰধান, পশুপালন আৰু পশু চিকিৎসা বিভাগ তথা জিলা প্ৰশাসনক এই সন্দৰ্ভত কেইবাখনো অভিযোগ পত্ৰ দাখিল কৰিছিল। অভিযোগ অনুসৰি, প্ৰয়োজনীয় অনুমতি পত্ৰ আৰু স্বাস্থ্যৰ প্ৰমাণপত্ৰ নোহোৱাকৈয়ে বঙালমৰাৰ পৰা নগাঁৱলৈ পশুধন সৰবৰাহ কৰা হৈছিল, যিটো পশু নিৰ্যাতন প্ৰতিৰোধ আইন আৰু পৰিবহণ আইনৰ স্পষ্ট উলংঘন।
পশুপালন বিভাগৰ পৰা বাৰম্বাৰ নিৰ্দেশ আৰু প্ৰশাসনৰ লগত যোগাযোগ কৰাৰ পাছতো ইয়াৰ পূৰ্বে কোনো গোচৰ ৰুজু বা কঠোৰ ব্যৱস্থা গ্ৰহণ কৰা হোৱা নাছিল। অৱশ্যে সংবাদ মাধ্যমত সমগ্ৰ ঘটনা পোহৰলৈ অহাৰ পাছতেই আৰক্ষীৰ এই তৎপৰতাই বিশেষ তাৎপৰ্য বহন কৰিছে। বৰ্তমান আটাইকেইজন অভিযুক্তৰ বিৰুদ্ধে আইনী প্ৰক্ৰিয়া ক্ষিপ্ৰতাৰে অব্যাহত আছে আৰু জব্দকৃত পশুধনসমূহ আৰক্ষীৰ জিম্মাত সুৰক্ষিত অৱস্থাত ৰখা হৈছে।
