পবিত্ৰ তীৰ্থ স্থানৰ বাবে জনাজাত কেৰালাত বহু জনপ্ৰতিনিধিৰে ঈশ্বৰৰ প্ৰতি আস্থা নাই। বিধানসভাত নিয়ম অনুসৰি শপত গ্ৰহণ কৰাৰ সময়ত মুঠ ৪২ জন বিধায়কে ঈশ্বৰৰ নাম ল’বলৈ অস্বীকাৰ কৰিছে। ইয়াৰ ভিতৰত বেছিভাগেই হৈছে বাওঁপন্থী বিধায়ক। অৱশ্যে এই তালিকাত কংগ্ৰেছ আৰু আন আন দলৰ কেইজনমান বিধায়কৰ নামো অন্তৰ্ভুক্ত হৈছে। বিধানসভাত শপত লোৱাৰ আগতে বিধায়কসকলক কিছুমান বিকল্প দিয়া হয়। বিধায়কসকলে নিজৰ পছন্দৰ ভাষাত শপত ল’ব পাৰে আৰু তেওঁলোকে কাৰ নামত শপত ল’ব সেইয়াও নিজেই বাছনি কৰিব পাৰে। এইক্ষেত্ৰত ঈশ্বৰৰ নাম আৰু আন্তৰিক প্ৰতিজ্ঞা বা ছলেমন্ এফাৰ্মেছনৰ দুটা বিকল্প দিয়া হয়। তাৎপৰ্যপূৰ্ণভাৱে ১৪০ খন আসনৰ কেৰালা বিধানসভাত ৪২ জন বিধায়কে ঈশ্বৰৰ নামত শপত নোলোৱাৰ সিদ্ধান্ত লয় আৰু তেওঁলোকে আন্তৰিক প্ৰতিজ্ঞাৰে শপত বাক্য পাঠ কৰে।
বাওঁপন্থীসকলে প্ৰায়েই ধৰ্মৰ অস্তিত্বক অস্বীকাৰ কৰি আহিছে। নিৰ্বাচনী বিপৰ্যয়ৰ পাছত আন ৰাজ্যত বাওঁপন্থী শিবিৰৰ কিছু আদৰ্শগত পৰিৱৰ্তন দেখা গ’লেও কেৰালাত তেনে হোৱা নাই। চিপিআইএম আৰু চিপিআইৰ টিকটত জয়ী হোৱা ৩৪ জন বিধায়কে শপত গ্ৰহণৰ ক্ষেত্ৰত ঈশ্বৰৰ নাম আওকাণ কৰিছে। ইয়াৰ বাহিৰেও আৰএছপিৰ দুজন বিধায়ক আৰু ৰিভল্যুচনাৰী মাৰ্ক্সিষ্ট পাৰ্টীৰ দুজন বিধায়কেও আন্তৰিক প্ৰতিজ্ঞাৰ নামতে শপত লয়। আনকি দুজন কংগ্ৰেছ বিধায়কেও ঈশ্বৰৰ নামত শপত গ্ৰহণ কৰা নাই।
কেৰালা বিধানসভাত ঈশ্বৰৰ নামত শপত নোলোৱাৰ এই প্ৰৱণতা অৱশ্যে কোনো নতুন কথা নহয়। সদায় বাওঁপন্থী বিধায়কৰ এটা ডাঙৰ অংশই শপত গ্ৰহণৰ সময়ত ঈশ্বৰৰ নাম লোৱাৰ পৰা বিৰত থাকে। এইবাৰ সেই তালিকাত আৰু কিছুমান নতুন নাম সংযোজন হৈছে। আনহাতে শপত গ্ৰহণৰ সময়ত ভাষাৰ ক্ষেত্ৰতো একাধিক বৈচিত্ৰ্য দেখা গৈছে। এই সকলোবোৰ পৰিঘটনাত শাসকীয় শিবিৰে যথেষ্ট সন্তোষ প্ৰকাশ কৰিছে।
