তামিলনাডুৰ ৰাজনীতিত ডিএমকে নেতা তথা যুৱ শাখাৰ সম্পাদক উদয়নিধি ষ্টালিনে কংগ্ৰেছক তীব্ৰ সমালোচনা কৰিছে। মুখ্যমন্ত্ৰী চি জোচেফ বিজয়ৰ দল টিভিকেৰ নেতৃত্বাধীন চৰকাৰক কংগ্ৰেছে সমৰ্থন কৰাৰ পাছতে এই ৰাজনৈতিক উত্তেজনা বৃদ্ধি পাইছে। দলীয় এক কাৰ্যসূচীত উদয়নিধি ষ্টালিনে কয় যে ডিএমকেই কংগ্ৰেছক পুনৰ কেতিয়াও বিশ্বাস কৰা উচিত নহয়। তেওঁ কংগ্ৰেছ নেতাৰ বিৰুদ্ধে গুৰুতৰ অভিযোগ উত্থাপন কৰি কয় যে ডিএমকে কৰ্মীসকলৰ কঠোৰ পৰিশ্ৰম আৰু এম কে ষ্টালিনৰ নেতৃত্বৰ বাবেই কংগ্ৰেছে আসন জিকিবলৈ সক্ষম হৈছিল, কিন্তু ইয়াৰ পিছতো কংগ্ৰেছৰ মাজত ন্যূনতম কৃতজ্ঞতা আৰু সৌজন্যতাবোধৰ অভাৱ দেখা গৈছে।
উদয়নিধি ষ্টালিনে ক্ষোভ প্ৰকাশ কৰি কয় যে কংগ্ৰেছৰ বিধায়কসকল জিকি অহাৰ মূল কাৰণ আছিল ডিএমকেৰ কৰ্মীসকল, কাৰণ জনসাধাৰণে এম কে ষ্টালিনকহে মুখ্যমন্ত্ৰী হিচাপে চাব বিচাৰিছিল। কিন্তু এতিয়া কেৱল কিছুমান পদৰ লোভত কংগ্ৰেছে ডিএমকেক একো নজনোৱাকৈয়ে চৰকাৰৰ পক্ষলৈ গুচি গ’ল। তেওঁ কয় যে তামিলনাডুৰ জনসাধাৰণে অতি সোনকালে কংগ্ৰেছক ইয়াৰ এক উচিত শিক্ষা দিব। ইয়াৰ উপৰিও তেওঁ সমগ্ৰ ভাৰতবৰ্ষত বিজেপিৰ উত্থানৰ বাবেও কংগ্ৰেছক জগৰীয়া কৰে। তেওঁৰ মতে, পূৰ্বৰ নিৰ্বাচনসমূহত ডিএমকে প্ৰধানে কংগ্ৰেছক সহায় কৰিছিল, কিন্তু এতিয়া কংগ্ৰেছে তেওঁলোকৰ পিঠিত ছুৰীঘাত কৰিলে। ডিএমকেৰ বৈঠকত কংগ্ৰেছক বিশ্বাসঘাটক দল বুলিও অভিহিত কৰা হয়।
আনহাতে ডিএমকেৰ সভাপতি তথা প্ৰাক্তন মুখ্যমন্ত্ৰী এম কে ষ্টালিনেও এই নতুন চৰকাৰখন বেছিদিন নিটিকে বুলি ভৱিষ্যদ্বাণী কৰিছে। তেওঁ দাবী কৰে যে টিভিক চৰকাৰে কোনো কাৰণতে নিজৰ পাঁচ বছৰীয়া কাৰ্যকাল সম্পূৰ্ণ কৰিব নোৱাৰে। চৰকাৰখন চলোৱাৰ বাবে তেওঁলোকৰ হাতত পৰ্যাপ্ত বিধায়কৰ সংখ্যা নাই আৰু সংখ্যা বৃদ্ধি কৰিবলৈ এআইএডিএমকে দল ভাঙিবলৈ চেষ্টা কৰিও তেওঁলোক ব্যৰ্থ হৈছে। গতিকে এই চৰকাৰখন যিকোনো দিনা বা যিকোনো সময়তে খহি পৰিব পাৰে।
ষ্টালিনে চৰকাৰক সমৰ্থন কৰা চিপিআই, চিপিআই এম আৰু ভিচিকের দৰে বাওঁপন্থী আৰু আঞ্চলিক দলসমূহকো তীব্ৰ সমালোচনা কৰে, যিবোৰে প্ৰথমে চৰকাৰক বাহিৰৰ পৰা সমৰ্থন দিছিল যদিও এতিয়া মন্ত্ৰীসভাত চামিল হৈ পৰিছে। তেওঁ শেষত এক বিশেষ মন্তব্য কৰি কয় যে সৰু ল’ৰা-ছোৱালীয়ে যেনেকৈ নতুন খেলনা পালে কেইদিনমান খেলিয়েই আমনি পায়, ঠিক তেনেকৈ তামিলনাডুৰ জনসাধাৰণেও এই অভিনেতাগৰাকীৰ শাসনকালক লৈ অতি সোনকালে আমনি পাব আৰু পুনৰ ডিএমকেৰ শাসনলৈ ঘূৰি আহিবলৈ ব্যাকুল হৈ পৰিব।
