বলীউডৰ জনপ্ৰিয় অভিনেতা ৰণবীৰ সিং আৰু নিৰ্মাতা-অভিনেতা ফাৰহান আখতাৰৰ মাজত চলি থকা বিবাদ অধিক তীব্ৰতৰ হৈ পৰিছে। ফেডাৰেচন অৱ ৱেষ্টাৰ্ণ ইণ্ডিয়া চিনে এম্প্লয়িজ চমুকৈ এফ ডব্লিউ আই চি ই নামৰ চলচ্চিত্ৰ কৰ্মীসকলৰ সন্থাই ৰণবীৰ সিঙৰ বিৰুদ্ধে অসহযোগৰ নিৰ্দেশনা জাৰি কৰিছে। ফাৰহান আখতাৰৰ আগন্তুক ছবি ‘ডন ৩’ৰ দৃশ্যগ্ৰহণ আৰম্ভ হোৱাৰ কেইদিনমান আগতে ৰণবীৰ সিঙে ছবিখনৰ পৰা আঁতৰি অহাৰ অভিযোগ উত্থাপন হৈছে। ইয়াৰ পিছতে সন্থাই নিজৰ সদস্যসকলক ৰণবীৰৰ কোনো ছবিত কাম নকৰিবলৈ আহ্বান জনাইছে, যাৰ অৰ্থ হ’ল তেওঁক একপ্ৰকাৰে বলীউডৰ পৰা বয়কট কৰা হৈছে। কিন্তু প্ৰশ্ন হয়, এনেদৰে কোনো সন্থাই এজন অভিনেতাক বয়কট কৰাৰ অধিকাৰ ৰাখেনে বা ইয়াৰ আঁৰৰ আইনী ব্যৱস্থাটো কি?
২০২৩ চনত ফাৰহান আখতাৰৰ এক্সেল এন্টাৰটেইনমেন্টে ‘ডন ৩’ ছবিখনৰ কথা ঘোষণা কৰিছিল, য’ত ৰণবীৰ সিঙে মুখ্য চৰিত্ৰত অভিনয় কৰাৰ কথা আছিল। কিন্তু যোৱা মাহত ফাৰহানে সন্থাক অভিযোগ দিয়ে যে দৃশ্যগ্ৰহণৰ ঠিক আগমুহূৰ্তত ৰণবীৰে ছবিখন এৰি দিয়ে। এই প্ৰজেক্টটোৰ প্ৰি-প্ৰডাকচনত ইতিমধ্যে প্ৰায় ৪৫ কোটি টকা খৰচ হৈছে বুলি নিৰ্মাতাই অৱগত কৰিছে আৰু শেষ মুহূৰ্তত এনেদৰে আঁতৰি গ’লে প্ৰযোজকৰ বৃহৎ আৰ্থিক লোকচান হ’ব পাৰে। সোমবাৰে এখন সংবাদমেলত সন্থাৰ সভাপতি অশোক পণ্ডিতে জনায় যে তেওঁলোকে ৰণবীৰক কেইবাখনো জাননী দিছিল যদিও কোনো সঁহাৰি পোৱা নগ’ল। সেয়েহে তেওঁলোকে নিজৰ কৰ্মীসকলক ৰণবীৰৰ লগত কাম নকৰিবলৈ কয় আৰু প্ৰযোজকসকলকো তেওঁলোকৰ লগত থিয় দিবলৈ অনুৰোধ জনায়।
এফ ডব্লিউ আই চি ই হৈছে মুম্বাইৰ হিন্দী চিনেমা আৰু দূৰদৰ্শন উদ্যোগৰ কৰ্মীসকলৰ এক ছাতি-সন্থা, কিন্তু ই কোনো নিয়ন্ত্ৰণকাৰী কৰ্তৃপক্ষ নহয়। এখন সন্থা হিচাপে ই সদস্যসকলক কাৰ লগত কাম কৰিব লাগে বা নালাগে তাৰ পৰামৰ্শ দিব পাৰে, কিন্তু কাকো বাধ্য কৰিব নোৱাৰে। ২০১৭ চনত প্ৰযোজক বিপুল অমৃতলাল শ্বাহৰ এক গোচৰত ভাৰতীয় প্ৰতিযোগিতা আয়োগে স্পষ্ট কৰি দিছিল যে কেৱল সন্থাৰ সদস্যকহে কামত ল’ব লাগিব বুলি বাধ্য কৰোৱাটো আইন বিৰোধী। তদুপৰি, সন্থাই এই নিয়ম নামানিলে কাকো জৰিমনা বিহিব নোৱাৰে।
ইয়াৰ অৰ্থ হ’ল, সন্থাই বয়কটৰ আহ্বান জনাইছে যদিও তেওঁলোকৰ সদস্যসকলে ৰণবীৰ সিঙৰ লগত কাম কৰিবলৈ সিদ্ধান্ত ল’ব পাৰে আৰু সন্থাই তেওঁলোকক কোনো শাস্তি দিব নোৱাৰে। লগতে ৰণবীৰৰ ছবিৰ বাবে সন্থাৰ বাহিৰৰ পৰাও লোকক নিয়োগ কৰিব পৰা যাব। অৰ্থাৎ এই বয়কটে ৰণবীৰৰ বাবে অলপ অসুবিধাৰ সৃষ্টি কৰিব পাৰে যদিও ই এক সম্পূৰ্ণ নিষেধাজ্ঞা নহয়। ইফালে, ৰণবীৰ সিঙৰ মুখপাত্ৰই এক বিবৃতি যোগে জনাইছে যে অভিনেতাগৰাকীয়ে চলচ্চিত্ৰ জগতক অতিকৈ সন্মান কৰে। তেওঁ এই বিষয়ত নীৰৱতা অৱলম্বন কৰিছে কাৰণ তেওঁ বিশ্বাস কৰে যে পেছাদাৰী বিষয়বোৰ পাৰস্পৰিক সন্মান আৰু মৰ্যাদাৰে চম্ভালিব লাগে। বৰ্তমান তেওঁ কেৱল নিজৰ কামত মনোনিৱেশ কৰিব বিচাৰে।
