বাংলাদেশত এটা বিৰল প্ৰজাতিৰ বগা ম’হক ঈদ-উজু-জোহাৰ কুৰবানীৰ পৰা শেষ মুহূৰ্তত চৰকাৰৰ হস্তক্ষেপত ৰক্ষা কৰা হৈছে। ম’হটোৰ মূৰত থকা সোণালী চুলিৰ বাবে মানুহে ইয়াক আমেৰিকাৰ ৰাষ্ট্ৰপতি ডনাল্ড ট্ৰাম্পৰ নাম অনুসৰি ‘ডনাল্ড ট্ৰাম্প’ বুলি মাতিবলৈ লৈছিল। প্ৰায় ৭০০ কিলোগ্ৰাম ওজনৰ এই ম’হটোক ঈদৰ কুৰবানীৰ বাবে ইতিমধ্যে বিক্ৰী কৰা হৈছিল। কিন্তু ছ’চিয়েল মিডিয়াত ভাইৰেল হোৱাৰ পিছত মানুহৰ আকৰ্ষণৰ প্ৰতি লক্ষ্য ৰাখি চৰকাৰে ইয়াক ৰক্ষা কৰাৰ সিদ্ধান্ত লয়।
বাংলাদেশৰ গৃহ মন্ত্ৰালয়ে বুধবাৰে জানিবলৈ দিয়ে যে ম’হটোক এতিয়া ঢাকাৰ ৰাষ্ট্ৰীয় চিৰিয়াখানালৈ লৈ যোৱা হ’ব আৰু তাতেই চৰকাৰী তত্ত্বাৱধানত ৰখা হ’ব। গৃহমন্ত্ৰী চালাহউদ্দিন আহমেদৰ নিৰ্দেশত এই সিদ্ধান্ত লোৱা হৈছে। যিগৰাকী ব্যক্তিয়ে ম’হটোক কুৰবানীৰ বাবে কিনিছিল, তেওঁক ধন ঘূৰাই দিয়া হ’ব বুলিও বিষয়াসকলে জানিবলৈ দিয়ে। মানুহৰ অত্যাধিক আগ্ৰহ আৰু নিৰাপত্তাৰ প্ৰতি লক্ষ্য ৰাখিয়েই শেষ মুহূৰ্তত চৰকাৰে এই পদক্ষেপ গ্ৰহণ কৰে।
ঢাকাৰ কেৰাণীগঞ্জ আৰক্ষী থানাৰ ভাৰপ্ৰাপ্ত বিষয়া মহম্মদ ৰুহুল কুদ্দুছে কয় যে এই বগা ম’হটো যথেষ্ট বিৰল আৰু ইয়াৰ বয়স কম হোৱাৰ বাবে ই আৰু বহু বছৰ জীয়াই থাকিব। পশুপালন বিভাগৰ অনুৰোধ মৰ্মে আৰক্ষীয়ে ম’হটোক গৰাকীৰ পৰা লৈ আহে। চিৰিয়াখানাৰ কিউৰেটৰ আতিকুৰ ৰহমানে জনোৱা মতে, ম’হটোক বৰ্তমান ১৪ দিনৰ বাবে আছুতীয়াকৈ ৰখা হ’ব আৰু তাৰ পিছত দৰ্শকৰ বাবে মুকলি কৰি দিয়া হ’ব। ইয়াৰ বাবে চিৰিয়াখানাত এটা সুকীয়া ঘৰ আৰু এজন তত্ত্বাৱধায়কৰ ব্যৱস্থা কৰা হৈছে।
৩৮ বছৰীয়া কৃষক জিয়া উদ্দিন মৃধাই পুহিবলৈ লোৱা এই ম’হটোৰ নাম তেওঁৰ ভায়েকে ‘ট্ৰাম্প’ ৰাখিছিল। ম’হটোৰ মূৰৰ ডাঠ সোণালী চুলি দেখি তেওঁলোকৰ আমেৰিকাৰ ৰাষ্ট্ৰপতিগৰাকীলৈ মনত পৰিছিল। ধেমালিতে ৰখা এই নামটোৱেই পিছলৈ গোটেই দেশতে ভাইৰেল হৈ পৰে। মানুহে ম’হটোক চাবলৈ ভিৰ কৰিবলৈ ধৰে আৰু ইয়াৰ লগত চেলফি উঠিবলৈ বহু দূৰৰ পৰা মানুহ আহিবলৈ ধৰে। গৰাকীৰ মতে ম’হটো বহুত শান্ত প্ৰকৃতিৰ আছিল আৰু ইয়াক নিয়মীয়াকৈ খুৱাব আৰু ধুৱাব লগা হৈছিল।
বাংলাদেশত এইবাৰ ঈদত প্ৰায় ১ কোটি ২০ লাখ জীৱ-জন্তু কুৰবানী দিয়াৰ কথা আছিল। বাংলাদেশত সাধাৰণতে ক’লা ৰঙৰ গৰু-ম’হ বেছিকৈ পোৱা যায়, সেয়েহে এনেকুৱা বগা ম’হ অতি বিৰল। কেৱল ইয়াৰ অসাধাৰণ ৰূপৰ বাবেই নহয়, বৰঞ্চ ছ’চিয়েল মিডিয়াত পোৱা জনপ্ৰিয়তাৰ বাবেই ম’হটোৱে নতুন জীৱন লাভ কৰিলে বুলি বহুতে বিশ্বাস কৰে।
