সমগ্ৰ দেশকে জোকাৰি যোৱা হাইপ্ৰফাইল ত্বিশা শৰ্মাৰ মৃত্যুৰ গোচৰত পোহৰলৈ আহিছে এক চাঞ্চল্যকৰ তথ্য, যিয়ে কেন্দ্ৰীয় অনুসন্ধান সংস্থা (চিবিআই)ৰ তদন্তৰ মাজতে কেইবাটাও নতুন প্ৰশ্নৰ উত্থাপন কৰিছে।
শেহতীয়াকৈ আদালতত দাখিল কৰা নথি-পত্ৰ অনুসৰি ত্বিশাৰ মৃত্যুত ব্যৱহৃত মূল প্ৰমাণ অৰ্থাৎ নিজকে ফাঁচী লগাবলৈ ব্যৱহাৰ কৰা ‘লিগেচাৰ’ (ফাঁচীৰ বাবে ব্যৱহাৰ কৰা ৰছী) বাজেয়াপ্ত কৰা আৰু সেয়া চম্ভালাৰ পদ্ধতিত গুৰুতৰ বিসংগতি পোৱা গৈছে। অভিযোগকাৰী পক্ষৰ এই দাবীয়ে মধ্যপ্ৰদেশৰ প্ৰশাসনিক আৰু আৰক্ষী মহলত আলোড়নৰ সৃষ্টি কৰিছে।
এই সমগ্ৰ গোচৰৰ প্ৰথম আৰু আটাইতকৈ ডাঙৰ ৰহস্যটো হ’ল নিজকে ফাঁচী দিবলৈ ব্যৱহাৰ কৰা ৰছীডালৰ চিনাক্তকৰণ। আদালতৰ নথি অনুসৰি ১৩ মে’ৰ পুৱা ৯:৪২ বজাত উপ-পৰিদৰ্শক দীনেশ শৰ্মাই সেই স্থানৰ পৰা ৰছী বা লিগেচাৰ জব্দ কৰে, যাৰ সহায়ত আত্মহত্যা কৰাৰ অভিযোগ উত্থাপন কৰা হৈছে।
আশ্চৰ্যজনকভাৱে আৰক্ষীয়ে প্ৰস্তুত কৰা ‘চিজাৰ মেমো’ত অপৰাধত ৰছীডাল প্ৰমাণ হিচাপে চিনাক্ত কৰা কোনো ব্যক্তিৰ নামেই উল্লেখ কৰা হোৱা নাই। অভিযোগকাৰী পক্ষৰ স্পষ্ট যুক্তি হ’ল যে জব্দ কৰাৰ সময়ত ত্বিশাৰ শাহুৱেকে (অৱসৰপ্ৰাপ্ত ন্যায়াধীশ গিৰিবালা সিং) বা স্বামী সমৰ্থ সিঙে চিনাক্ত কৰা নাছিল। এনে পৰিস্থিতিত কোনো সাক্ষী বা চিনাক্তকৰ্তা নোহোৱাকৈ ৰছীডাল কেনেকৈ মূল প্ৰমাণ হিচাপে গ্ৰহণ কৰা হ’ল? এই পদ্ধতিয়ে সমগ্ৰ তদন্তৰ ওপৰত সন্দেহৰ সৃষ্টি কৰে।
ৰহস্য কেৱল চিনাক্তকৰণতে সীমাবদ্ধ নহয়, প্ৰমাণ সংৰক্ষণৰ পদ্ধতিকলৈও গুৰুতৰ অভিযোগ উত্থাপন হৈছে। আদালতৰ নথি-পত্ৰত কৰা দাবী অনুসৰি জব্দ কৰাৰ পিছত ৰছীডাল কোনো সুৰক্ষিত স্থানত নহয়, তদন্তকাৰী বিষয়াৰ ব্যক্তিগত গাড়ীত দীৰ্ঘদিন ধৰি ৰখা হৈছিল। ভূপালৰ এইমছলৈ পঠোৱাৰ আগতে যি ধৰণে ৰখা হৈছিল, তাতেই প্ৰমাণৰ সৈতে গাফিলতি কৰাৰ সম্ভাৱনা উত্থাপন হৈছে।
ইপিনে, প্ৰথম মৰণোত্তৰ পৰীক্ষাৰ প্ৰতিবেদন অনুসৰি জিমনাষ্টিক ৰিঙৰ ৰছীৰে ঘৰৰ চাদত ওলমি থকা অৱস্থাত উদ্ধাৰ হয় ত্বিশা শৰ্মা। চিকিৎসকে ডিঙিত দুটা ৰঙা দাগ উল্লেখ কৰি ওলমি থকাৰ বাবেই মৃত্যু হোৱা বুলি উল্লেখ কৰিছিল। কিন্তু প্ৰতিবেদনত শৰীৰৰ বিভিন্ন অংশত ঘাঁ আৰু কটাৰ দৰে একাধিক সৰু সৰু আঘাতৰ কথাও উল্লেখ কৰা হৈছে। এই কাৰণেই গোচৰটোৰ প্ৰতিটো প্ৰমাণৰ বিশ্বাসযোগ্যতা এতিয়া আৰু অধিক গুৰুত্বপূৰ্ণ হৈ পৰিছে। এই গাফিলতি আৰু অধিক স্পৰ্শকাতৰ কাৰণ মৰণোত্তৰ পৰীক্ষাৰ প্ৰতিবেদনত স্পষ্টকৈ উল্লেখ কৰা হৈছে যে ত্বিশাৰ মৃত্যু “লিগেচাৰৰ জৰিয়তে ফাঁচী লগোৱা”ৰ বাবে হৈছে।
গোচৰটোৰ আটাইতকৈ আচৰিত ধৰণৰ মোৰটো আহিল যেতিয়া অভিযোগকাৰী পক্ষই দাবী কৰে যে আইনগতভাৱে গোপন ‘কেছ ডায়েৰী’ৰ অংশ হ’ব লগা চিজাৰ মেমোখন আগতীয়াকৈ জামিন আবেদনৰ সময়ত অভিযুক্ত পক্ষৰ সৈতে আছিল। এই গোপন নথিখন ২৭ মে’ত মধ্যপ্ৰদেশ উচ্চ ন্যায়ালয়ত গিৰিবালা সিঙে দাখিল কৰা উত্তৰৰ সৈতে সংলগ্ন হৈ পোৱা গৈছিল।
অভিযোগকাৰী পক্ষৰ দাবী যে তদন্তৰ সামগ্ৰী এনেদৰে অভিযুক্তৰ ওচৰলৈ যোৱাটোৱে প্ৰমাণ কৰে যে ব্যৱস্থাটোৰ ভিতৰৰ কোনোবাই পৰ্দাৰ আঁৰৰ পৰা অভিযুক্তক সহায় কৰি আছে। যদিও এই দাবীসমূহৰ ওপৰত এতিয়াও কোনো আদালতৰ চূড়ান্ত ৰায় আহিবলৈ বাকী।
এই ক্ৰমবৰ্ধমান বিসংগতিৰ মাজতে চিবিআইয়ে তদন্ত তীব্ৰতৰ কৰি তুলিছে। ১ জুনত চিবিআইৰ এটা দলে ভূপালৰ কটাৰা পাহাৰৰ ঘৰটোত উপস্থিত হৈ সমগ্ৰ অপৰাধস্থলী পুনৰ নিৰ্মাণ কৰে। দলটোৱে জিমনাষ্টিক ৰিঙৰ ৰছীত ত্বিশাৰ ওজনৰ সমান ডামি এটা ওলোমাই আত্মহত্যা সম্ভৱ নেকি পৰীক্ষা কৰিছিল। ঠিক পিছদিনা ভূপালৰ আদালতে স্বামী সমৰ্থ সিং আৰু শাহুৱেক গিৰিবালা সিঙক ন্যায়িক জিম্মালৈ প্ৰেৰণ কৰে।
ত্বিশা শৰ্মাৰ মৃত্যু আত্মহত্যা, দুৰ্ঘটনা নে ইয়াৰ আঁৰত আন কাহিনী আছে তাৰ চূড়ান্ত উত্তৰ এতিয়াও পোৱা নাই। কিন্তু অভিযুক্তৰ প্ৰভাৱ, তেওঁলোকৰ জিম্মা আৰু নথিভুক্ত কৰাৰ ধৰণ সন্দৰ্ভত উত্থাপিত প্ৰশ্নই তদন্তক আৰু অধিক জটিল কৰি তুলিছে। এতিয়া সকলোৰে দৃষ্টি চিবিআইৰ চূড়ান্ত প্ৰতিবেদন আৰু ফৰেনছিক তথ্যৰ ওপৰত, যিয়ে এই হাই-প্ৰফাইল গোচৰৰ আটাইতকৈ ডাঙৰ ৰহস্যৰ পৰ্দা গুচাব পাৰে।
