১৪ বছৰীয়া আনন্দী মোদীয়ে ৰাতিৰ আহাৰ খোৱাৰ পিছত বন্ধু-বান্ধৱীৰ সৈতে দৌৰা-দৌৰি কৰি খেলি আছিল। কিন্তু মুহূৰ্তৰ ভিতৰতে সেই আনন্দ শোকলৈ ৰূপান্তৰিত হ’ল। খেলি থাকোঁতেই হঠাতে মাটিতে ঢলি পৰি তাইৰ মৃত্যু হয়। চিকিৎসকসকলে প্ৰাথমিকভাৱে অনুমান কৰিছে যে হৃদৰোগত আক্ৰান্ত হৈয়েই তাইৰ মৃত্যু হৈছে।
আনন্দীৰ ঘৰ গুজৰাটৰ জামনগৰত। গৰমৰ বন্ধ উপলক্ষে তাই ৰাজকোটত থকা মামাৰ ঘৰলৈ ফুৰিবলৈ গৈছিল। দেওবাৰে সন্ধিয়া পৰিয়ালৰ সদস্যসকলৰ সৈতে তাই এখন ৰেষ্টুৰেণ্টলৈ খাবলৈ গৈছিল। খোৱা-বোৱা শেষ হোৱাৰ পিছত ৰেষ্টুৰেণ্টৰ চৌহদতে আন শিশুসকলৰ সৈতে তাই খেলিবলৈ আৰম্ভ কৰে। প্ৰত্যক্ষদৰ্শীৰ মতে, সিহঁতে ধৰা-ধৰি খেলি আছিল। সেই সময়তে হঠাতে আনন্দীৰ দৌৰাৰ গতি কমি আহে আৰু কেইছেকেণ্ডমানৰ ভিতৰতে তাই মাটিতে ঢলি পৰে।
এই সমগ্ৰ ঘটনাটোৰ এটা চিচিটিভি ফুটেজ ইতিমধ্যে পোহৰলৈ আহিছে। তাত দেখা গৈছে যে আন শিশুসকলৰ সৈতে আনন্দীয়ে দৌৰি আছিল। হঠাতে তাই ৰৈ যায় আৰু মাটিতে বাগৰি পৰে। লগে লগে পৰিয়ালৰ লোকে তাইক চিকিৎসালয়লৈ লৈ যায়। কিন্তু চিকিৎসাধীন অৱস্থাতে তাইৰ কৰুণ মৃত্যু হয়।
প্ৰাথমিক তদন্তত হৃদৰোগত আক্ৰান্ত হোৱাৰ সন্দেহ কৰা হৈছে যদিও মৃত্যুৰ প্ৰকৃত কাৰণ জানিবলৈ আৰক্ষীয়ে তদন্ত আৰম্ভ কৰিছে। মৰণোত্তৰ পৰীক্ষাৰ প্ৰতিবেদন অহাৰ পিছতহে সকলো কথা স্পষ্ট হ’ব। উল্লেখযোগ্য যে কম বয়সতে হৃদৰোগত আক্ৰান্ত হৈ মৃত্যু হোৱা এনে ঘটনা এয়াই প্ৰথম নহয়।
২০২৪ চনৰ ডিচেম্বৰ মাহত উত্তৰপ্ৰদেশৰ আলিগড়ত স্কুলৰ খেলৰ প্ৰস্তুতি চলাই থকা অৱস্থাত এজন ১৪ বছৰীয়া ছাত্ৰ দৌৰি থাকোঁতেই অসুস্থ হৈ পৰে আৰু চিকিৎসালয়লৈ নিয়াৰ পিছত তেওঁক মৃত ঘোষণা কৰা হয়। সেই ঘটনাটোতো হৃদৰোগত আক্ৰান্ত হোৱাৰ সন্দেহ কৰা হৈছিল। একেদৰে ২০২৪ চনৰ নৱেম্বৰ মাহতো আলিগড়ৰ আৰানা গাঁৱত এগৰাকী ২০ বছৰীয়া যুৱতীৰ দৌৰি থকা অৱস্থাত হঠাতে হৃদৰোগত আক্ৰান্ত হৈ মৃত্যু হৈছিল। শেহতীয়াকৈ কম বয়সীয়া ল’ৰা-ছোৱালীৰ মাজত এনেদৰে হোৱা আকস্মিক মৃত্যুৰ ঘটনাই চিকিৎসক আৰু স্বাস্থ্য বিশেষজ্ঞসকলৰ চিন্তা বৃদ্ধি কৰিছে। বৰ্তমান আনন্দী মোদীৰ মৃত্যুৰ প্ৰকৃত কাৰণ জানিবলৈ সংশ্লিষ্ট কৰ্তৃপক্ষই তদন্ত চলাই আছে।
