ভাৰতৰ দৰিদ্ৰতা আৰু অসমতাৰ জোখ-মাখৰ লগতে জনকল্যাণমূলক আঁচনিৰ হকে ধাৰাবাহিকভাৱে মাত মাতি অহা বিশিষ্ট কল্যাণমূলক অৰ্থনীতিবিদ জাঁ দ্ৰেজক শুকুৰবাৰে ‘গ্ল’বেল ইনইকুৱেলিটী ৰিচাৰ্চ এৱাৰ্ড’ প্ৰদান কৰা হয়। পেৰিছ স্কুল অৱ ইকনমিক্সত অনুষ্ঠিত ৱৰ্ল্ড ইনইকুৱেলিটী কনফাৰেন্সত তেওঁক এই বঁটাৰে সন্মানিত কৰা হয়। বিশেষকৈ মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিতকৰণ আইন আৰু ৰাষ্ট্ৰীয় খাদ্য নিৰাপত্তা আইনৰ সপক্ষে তেওঁ আগবঢ়োৱা বলিষ্ঠ স্থিতি আৰু গৱেষণামূলক অৱদানৰ বাবেই তেওঁক এই আন্তঃৰাষ্ট্ৰীয় স্বীকৃতি প্ৰদান কৰা হৈছে।
বঁটা গ্ৰহণ কৰাৰ পাছত অৰ্থনীতিবিদগৰাকীয়ে প্ৰকাশ কৰে যে এই স্বীকৃতি তেওঁৰ কোনো ব্যক্তিগত কৃতিত্ব নহয়, বৰঞ্চ সমাজ পৰিৱৰ্তনৰ হকে কাম কৰা ব্যক্তি আৰু সমূহীয়া প্ৰচেষ্টাৰহে ফল। ভাৰতৰ প্ৰেক্ষাপট সন্দৰ্ভত তেওঁ কয় যে দেশখনত কেৱল ব্যাপক অৰ্থনৈতিক অসমতাই নহয়, বৰঞ্চ জাতিভেদ প্ৰথা, লৈংগিক বৈষম্য আৰু শিক্ষাৰ অধিকাৰৰ ক্ষেত্ৰতো বৃহৎ অসমতা বিৰাজমান। অৱশ্যে, এই সকলোবোৰৰ মাজতো ভাৰতত অসমতাৰ বিৰুদ্ধে প্ৰতিবাদৰ এক চহকী ইতিহাস থকাটো আশাৰ কিৰণ বুলি উল্লেখ কৰি তেওঁ এনে আন্দোলনৰ সৈতে জড়িত হ’বলৈ পোৱাতো নিজৰ বাবে সৌভাগ্যৰ বিষয় বুলি মন্তব্য কৰে।
উল্লেখ্য যে, বিশ্বৰ অসমতাৰ বুজাবুজিত গুৰুত্বপূৰ্ণ অৱদান আগবঢ়োৱা গৱেষকসকলক প্ৰতি দুবছৰৰ মূৰে মূৰে এই ‘গ্ল’বেল ইনইকুৱেলিটী ৰিচাৰ্চ এৱাৰ্ড’ প্ৰদান কৰা হয়। এইবাৰৰ বঁটা প্ৰদান অনুষ্ঠানটো হৈছে ইয়াৰ দ্বিতীয়টো সংস্কৰণ। ইয়াৰ পূৰ্বে, ২০২৪ চনত সামাজিক আৰু পাৰিপাৰ্শ্বিক অসমতাৰ ওপৰত কৰা গৱেষণাৰ বাবে বীণা আগৰৱাল আৰু জেমছ কে বয়েচক যুটীয়াভাৱে এই বঁটাৰ উদ্বোধনী সংস্কৰণটো প্ৰদান কৰা হৈছিল।
শেহতীয়া সময়ত জাঁ দ্ৰেজে মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিতকৰণ আইন (এমজিএনৰেগা) বাতিলৰ বিৰোধিতা কৰাৰ লগতে ৰাজহুৱা বিতৰণ ব্যৱস্থাত আধাৰ প্ৰামাণীকৰণৰ অনুপস্থিতিৰ বাবে নাগৰিকক খাদ্য সামগ্ৰীৰ পৰা বঞ্চিত কৰা কাৰ্যৰো তীব্ৰ সমালোচনা কৰি আহিছে। ইয়াৰোপৰি, নতুন গ্ৰাম্য নিয়োগ নিশ্চিতকৰণ আইন ‘বিক্ষিত ভাৰত গেৰাণ্টি ফৰ ৰোজগাৰ এণ্ড আজীৱিকা মিছন (গ্ৰামীণ) আইন’ সন্দৰ্ভত তেওঁ প্ৰশ্ন উত্থাপন কৰি কয় যে এই আইনে নিয়োগৰ নিশ্চিতি প্ৰদান কৰে যদিও সেই নিশ্চিতি প্ৰকৃততে কাৰ্যকৰী হোৱাৰ কোনো নিশ্চয়তা প্ৰদান নকৰে।
