দিল্লী উচ্চ ন্যায়ালয়ে স্বতন্ত্ৰ ডিজিটেল সংবাদ মাধ্যম নিউজক্লিক আৰু ইয়াৰ প্ৰতিষ্ঠাপক প্ৰবীৰ পুৰকায়স্থৰ বিৰুদ্ধে ইডি আৰু দিল্লী আৰক্ষীয়ে ৰুজু কৰা ধন সৰবৰাহৰ গোচৰ খাৰিজ কৰিছে। উচ্চ ন্যায়ালয়ে স্পষ্টকৈ কয় যে ইডিয়ে নিউজক্লিকৰ বিৰুদ্ধে গ্ৰহণ কৰা পদক্ষেপ নিৰপেক্ষ সাংবাদিকতাৰ ওপৰত কৰা এক আক্ৰমণ আৰু তেওঁলোকৰ কৰ্তৃত্বৰ অপব্যৱহাৰ।
ন্যায়াধীশ নীনা বঞ্চল কৃষ্ণই যোৱা ২৯ মে‘ত এই ৰায়দান প্ৰদান কৰি দিল্লী আৰক্ষীৰ অৰ্থনৈতিক অপৰাধ শাখা (ই অ’ ডব্লিউ) আৰু ইডিৰ দুয়োটা গোচৰেই বাতিল কৰে। ন্যায়ালয়ে কয় যে প্ৰায় ডেৰ বছৰ ধৰি চলা দীঘলীয়া তদন্ত আৰু নিউজক্লিকৰ কৰ্মচাৰীসকলক বহুবাৰ জেৰা কৰাৰ পাছতো ইডিয়ে নিউজক্লিকৰ বিৰুদ্ধে কোনো ধৰণৰ অপৰাধমূলক সাক্ষ্য- প্ৰমাণ লাভ কৰা নাই। ন্যায়ালয়ে ইডিৰ এই কাৰ্য্যক উদ্দেশ্যপ্ৰণোদিত বুলি অভিহিত কৰি ইয়াক এক ভিত্তিহীন অনুসন্ধান বুলি মন্তব্য কৰে।
উল্লেখ্য যে, এই গোচৰটো ২০১৮ চনত আমেৰিকা যুক্তৰাষ্ট্ৰৰ ৱৰ্ল্ডৱাইড মিডিয়া হোল্ডিংছ নামৰ এটা প্ৰতিষ্ঠানৰ পৰা নিউজক্লিকে লাভ কৰা ধন লগত জড়িত আছিল। ইডি অভিযোগ কৰিছিল যে এই বিনিয়োগৰ জৰিয়তে নিউজক্লিকে শ্বেয়াৰৰ মূল্য অতিৰঞ্জিত কৰিছিল, ধন আত্মসাৎ কৰিছিল আৰু এফ ডি আই নিয়ম উলংঘা কৰিছিল। দুহেজাৰ একৈশ চনৰ ফেব্ৰুৱাৰী মাহত ইডিয়ে প্ৰবীৰ পুৰকায়স্থ আৰু অন্যান্য কৰ্মচাৰীৰ বাসগৃহ আৰু কাৰ্যালয়ত ধাৰাবাহিকভাৱে তালাচী চলাইছিল আৰু পুৰকায়স্থক তেওঁৰ বাসগৃহতে আৱদ্ধ কৰি ৰাখিছিল।
উচ্চ ন্যায়ালয়ে এই সকলোবোৰ অভিযোগ এটা এটাকৈ নাকচ কৰে। তথ্য আৰু সম্প্ৰচাৰ মন্ত্ৰালয়ৰ এক উত্তৰৰ উদ্ধৃতি দি ন্যায়ালয়ে কয় যে ২০১৮ চনত এই ধনৰাশি লাভ কৰা সময়ত ডিজিটেল মিডিয়াৰ বাবে ছাব্বিশ শতাংশ এফ ডি আইৰ কোনো সীমা নিৰ্ধাৰণ কৰা হোৱা নাছিল। লগতে, বিদেশী পুঁজিৰে দৰমহা, পৰামৰ্শদাতাৰ মাচুল আৰু ঘৰভাড়া দিয়া কাৰ্য্যক ধন আত্মসাৎ কৰা বুলি ধৰিব নোৱাৰি বুলিও ন্যায়ালয়ে স্পষ্ট কৰে। ইডিয়ে নিউজক্লিকক গোচৰৰ তথ্যৰ প্ৰতিলিপি (ইচিআইআৰ) প্ৰদান নকৰা বিষয়টোতো ন্যায়ালয়ে অসন্তুষ্টি প্ৰকাশ কৰে।
ইডিয়ে প্ৰবীৰ পুৰকায়স্থ, জেছন ফেচাৰ আৰু নেভিল ৰয় সিংঘমৰ মাজত অপৰাধমূলক ষড়যন্ত্ৰ থকা বুলি কৰা অভিযোগৰ সপক্ষে কোনো প্ৰমাণ ন্যায়ালয়ত দাখিল কৰিব নোৱাৰিলে। উল্লেখযোগ্য যে, ২০২৩ চনত আমেৰিকাৰ দ্য নিউয়ৰ্ক টাইমছ কাকতত প্ৰকাশিত এক প্ৰতিবেদনত নিউজক্লিকে চীনা অপপ্ৰচাৰ চলাবলৈ ধন লোৱা বুলি অভিযোগ উত্থাপন হোৱাৰ পাছতে দিল্লী আৰক্ষীয়ে বেআইনী কাৰ্যকলাপ (প্ৰতিৰোধ) আইন বা ইউএপিএৰ অধীনত নিউজক্লিকৰ লগত জড়িত কেইবাজনকো গ্ৰেপ্তাৰ কৰিছিল। ইয়াৰ উপৰিও চিবিআয়ে বিদেশী পুঁজি নিয়ম উলংঘনৰ অভিযোগত সুকীয়াকৈ গোচৰ ৰুজু কৰিছিল। বৰ্তমান ন্যায়ালয়ৰ এই শেহতীয়া ৰায়দানক সকলোৱে আদৰণি জনাইছে আৰু অনুসন্ধানমূলক সাংবাদিকতাক লক্ষ্য কৰি ইডিয়ে কৰা হাৰাশাস্তিক সকলোৱে একেমুখে গৰিহণা দিছে৷
