পশ্চিম এছিয়াত ক্ৰমবৰ্ধমান অশান্তিৰ মাজতে ওমানৰ উপকূলত আন এখন জাহাজত আক্ৰমণ কৰা হৈছে। আক্ৰমণ কৰা জাহাজখন ভাৰতীয়। এইটো যোৱা চাৰিদিনত তৃতীয়টো বৃহৎ সামুদ্ৰিক আক্ৰমণ। আন্তঃৰাষ্ট্ৰীয় বাণিজ্যিক জাহাজ পথৰ নিৰাপত্তাক লৈ নতুন চিন্তাৰ সৃষ্টি কৰিছে।
বৃহস্পতিবাৰে ওমানৰ শ্বিনাছ বন্দৰৰ সমীপত এই ঘটনা সংঘটিত হোৱা বুলি প্ৰাথমিকভাৱে জানিব পৰা গৈছে। খবৰ অনুসৰি আক্ৰান্ত টেংকাৰখনৰ নাম এম টি জলবীৰ। জাহাজখনৰ ফানেল আৰু ইঞ্জিন ৰুমত জুই লাগিছে বুলি জানিব পৰা গৈছে। ঘটনাৰ পিছতে মাস্কাটত থকা ভাৰতীয় দূতাবাসে এক বিবৃতিত কয় যে তেওঁলোকে এই বিষয়ে অৱগত আৰু স্থানীয় প্ৰশাসনৰ সৈতে সমন্বয়ৰে পৰিস্থিতি নিৰীক্ষণ কৰি আছে।
উল্লেখযোগ্য যে কিছুদিন পূৰ্বে ওমানৰ উপকূলৰ এখন বাণিজ্যিক জাহাজত আক্ৰমণত তিনিজন ভাৰতীয় নাৱিক নিহত হৈছিল। সেই ঘটনাৰ তদন্ত এতিয়াও অব্যাহত আছে। ইফালে এই নতুন আক্ৰমণে আঞ্চলিক নিৰাপত্তা পৰিস্থিতি আৰু অধিক জটিল কৰি তুলিছে।
বিশেষজ্ঞসকলৰ মতে, শেহতীয়াকৈ ওমান উপসাগৰ আৰু হৰমুজ প্ৰণালী অঞ্চলত সংঘটিত আক্ৰমণ আন্তঃৰাষ্ট্ৰীয় বাণিজ্য, শক্তি যোগান আৰু সামুদ্ৰিক নিৰাপত্তাৰ বাবে এক ডাঙৰ চিন্তাৰ বিষয় হৈ পৰিছে। এতিয়া ওমান কৰ্তৃপক্ষ আৰু সংশ্লিষ্ট দেশসমূহৰ পৰৱৰ্তী আনুষ্ঠানিক বিবৃতিৰ ওপৰত দৃষ্টি ৰখা হৈছে।
মন কৰিবলগীয়া যে বিশ্বৰ এটা প্ৰধান জাহাজ পথ হৰমুজ প্ৰণালীৰ মাজেৰে বৃহৎ পৰিমাণৰ তেল আৰু গেছ পৰিবহণ কৰা হয়। ফলত এই পথটো কাৰ্যতঃ অচল হৈ পৰিছে, যাৰ ফলত আন্তঃৰাষ্ট্ৰীয় শক্তি বজাৰত ডাঙৰ প্ৰভাৱ পৰিছে। ইৰাণৰ ভৌগোলিকভাৱে হৰমুজ প্ৰণালীৰ ওপৰত যথেষ্ট নিয়ন্ত্ৰণ আছে আৰু যুদ্ধ আৰম্ভ হোৱাৰ পিছত ইৰানে কেইবাখনো জাহাজক লক্ষ্য কৰি লৈছে। ফলত বহু বাণিজ্যিক জাহাজে সেই পথেৰে যাত্ৰা বন্ধ কৰি দিছে।
অৱশ্যে ভাৰতৰ জাহাজ ইতিমধ্যে হৰমুজৰ মাজেৰে পাৰ হৈ গৈছে। ইয়াৰ মাজতে আমেৰিকাই পুনৰ হৰমুজ অৱৰোধ আৰম্ভ কৰিছে। ইয়াৰ ফলত অঞ্চলটোত কৰ্মৰত ভাৰতীয় নাৱিকসকলৰ সুৰক্ষাৰ প্ৰতি নতুন চিন্তাৰ উদ্ৰেক হৈছে।
