দেশৰ কোটি কোটি চালকৰ বাবে হয়তো অতি সোনকালে আহিব পাৰে সকাহৰ খবৰ। বাৰে বাৰে ড্ৰাইভিং লাইচেন্স নবীকৰণৰ হেঁচা কমোৱাৰ বাবে কেন্দ্ৰীয় চৰকাৰে বৃহৎ সংস্কাৰৰ কথা চিন্তা কৰিছে। সূত্ৰ অনুসৰি কেন্দ্ৰীয় পথ পৰিবহণ আৰু ঘাইপথ মন্ত্ৰালয়ে এটা প্ৰস্তাৱ বিবেচনা কৰি আছে, যাৰ ফলত ড্ৰাইভিং লাইচেন্সৰ বৈধতা চিধাই চালকজনৰ ৫০ বছৰ বয়সলৈকে বৃদ্ধি কৰা হ’ব পাৰে।
বৰ্তমান ভাৰতত ড্ৰাইভিং লাইচেন্স সাধাৰণতে ২০ বছৰ বা নিৰ্দিষ্ট বয়সৰ সীমা পৰ্যন্ত বৈধ। বৈধতাৰ ম্যাদ উকলি যোৱাৰ পিছত চালকসকলে অনুজ্ঞাপত্ৰ নবীকৰণৰ বাবে আঞ্চলিক পৰিবহণ কাৰ্যালয়ত আবেদন কৰিব লাগে। এই প্ৰক্ৰিয়াত বিভিন্ন নথি-পত্ৰ জমা দিব লাগে, চিকিৎসাৰ প্ৰমাণ পত্ৰ সংগ্ৰহ কৰিব লাগে আৰু প্ৰশাসনিক আনুষ্ঠানিকতা সম্পূৰ্ণ কৰিব লাগে। নতুন প্ৰস্তাৱ কাৰ্যকৰী হ’লে এই হেঁচা বহু পৰিমাণে হ্ৰাস পাব বুলি ধাৰণা কৰা হৈছে।
মন্ত্ৰালয়ৰ সূত্ৰ অনুসৰি এই প্ৰস্তাৱ এতিয়াও আলোচনাৰ পৰ্যায়ত আছে। কিন্তু পৰিকল্পনা সফল হ’লে ড্ৰাইভিং লাইচেন্স পোনপটীয়াকৈ ৫০ বছৰ বয়সলৈকে বৈধ হ’ব পাৰে।ইয়াৰ ফলত সঘনাই অনুজ্ঞাপত্ৰ নবীকৰণৰ প্ৰয়োজনীয়তা হ্ৰাস পাব আৰু সময় আৰু ধনৰ ক্ষেত্ৰতো সাধাৰণ মানুহ লাভৱান হ’ব।
কেন্দ্ৰই কেৱল ড্ৰাইভিং লাইচেন্সেই নহয়, পৰিবহণ সম্পৰ্কীয় একাধিক সেৱাক সম্পূৰ্ণৰূপে ডিজিটেল কৰাৰ দিশতো আগবাঢ়িছে। গাড়ী বা মটৰবাইকৰ মালিকীস্বত্ব হস্তান্তৰ, অনুমতি নবীকৰণ আৰু অন্যান্য প্ৰশাসনিক কাম অনলাইনযোগে সম্পূৰ্ণ কৰাৰ পৰিকল্পনা কৰা হৈছে। ইয়াৰ ফলত আৰ টি অ’ৰ কাৰ্যালয়লৈ বাৰে বাৰে যোৱাৰ প্ৰয়োজনীয়তা হ্ৰাস পাব আৰু সেৱা দ্ৰুত আৰু স্বচ্ছ হ’ব।
অৱশ্যে এই প্ৰস্তাৱক লৈ একাংশ ৰাজ্যই উদ্বেগ প্ৰকাশ কৰিছে। অনুজ্ঞাপত্ৰ নবীকৰণৰ সংখ্যা কমি গ’লে ৰাজহ সংগ্ৰহত প্ৰভাৱ পৰিব পাৰে বুলি তেওঁলোকৰ আশংকা। অৱশ্যে ৰাজ্যসমূহে যাতে আৰ্থিক ক্ষতিৰ সন্মুখীন নহয় তাৰ বাবে অনলাইন মাচুল সংগ্ৰহৰ আধুনিক ব্যৱস্থা গঢ়ি তোলা হ’ব বুলি কেন্দ্ৰই জনাইছে।
এফালে সাধাৰণ নাগৰিকৰ বাবে নিয়মবোৰ সৰল কৰাৰ পৰিকল্পনা কৰা হৈছে, আনফালে চৰকাৰে যান-বাহন আইন উলংঘাৰ বিৰুদ্ধে কঠোৰ হোৱাৰ কথাও চিন্তা কৰিছে। নতুন প্ৰস্তাৱ অনুসৰি যান-বাহন নিয়ম উলংঘা কৰিলে চালকৰ নামত ‘নেগেটিভ পইণ্ট’ সংযোজন কৰা হ’ব।
যদি কোনো চালকে নিৰ্দিষ্ট সময়ৰ ভিতৰত অতিৰিক্ত ঋণাত্মক পইণ্ট জমা কৰে, তেন্তে তেওঁৰ ড্ৰাইভিং লাইচেন্স সাময়িকভাৱে স্থগিত ৰখা হ’ব পাৰে বা গুৰুতৰ ক্ষেত্ৰত বাতিল কৰা হ’ব পাৰে। ইয়াৰ দ্বাৰা পথ সুৰক্ষা আৰু অধিক শক্তিশালী হ’ব বুলি প্ৰশাসনৰ বিশ্বাস।
যদিও এই সকলোবোৰ প্ৰস্তাৱ এতিয়াও আলোচনাৰ পৰ্যায়ত আছে আৰু কেন্দ্ৰীয় মন্ত্ৰালয়ে ইয়াৰ কাৰ্যকৰীকৰণৰ নিৰ্দিষ্ট তাৰিখ ঘোষণা কৰা নাই। কিন্তু বিশেষজ্ঞসকলৰ মতে এই প্ৰস্তাৱসমূহ অনুমোদন পালে দেশৰ পৰিবহণ ব্যৱস্থা অধিক আধুনিক, কাগজবিহীন আৰু নাগৰিক অনুকূল হৈ পৰিব।
পৰিবহণ খণ্ডৰ এই সম্ভাৱ্য সংস্কাৰসমূহ যদি ৰূপায়ণ কৰা হয় তেন্তে দেশৰ কোটি কোটি চালকৰ দৈনন্দিন জীৱনত ই যথেষ্ট প্ৰভাৱ পেলাব পাৰে।
