প্ৰতি নিশা প্ৰায় ৩ বজাত হঠাৎ টোপনি ভাঙি যোৱাটো বৰ্তমান সময়ত বহু লোকৰ বাবে এক দুশ্চিন্তাৰ কাৰণ হৈ পৰিছে। সামাজিক মাধ্যমত এই বিষয়টোক লৈ ভিন্নধৰণৰ চৰ্চা তথা ব্যাখ্যা দেখিবলৈ পোৱা যায়। একাংশই ইয়াক কোনো আধ্যাত্মিক সংকেত বুলি অভিহিত কৰে, আনহাতে আন একাংশই ইয়াক হৰম’নৰ ভাৰসাম্যহীনতাৰ সৈতে জড়িত বুলি দাবী কৰে। পিছে, বিশেষজ্ঞসকলৰ মতে ইয়াৰ আঁৰৰ কাৰণ ইমানো ৰহস্যময় নহয়।
মুম্বাইস্থিত ছাৰ এইচ এন ৰিলায়েন্স ফাউণ্ডেচন হাস্পতালৰ ক্লিনিকেল চাইক’লজিষ্ট মেহজাবিন দৰ্দীৰ মতে, নিশাৰ ভাগত কেইমুহূৰ্তমানৰ বাবে টোপনি ভাঙি যোৱাটো এক স্বাভাৱিক প্ৰক্ৰিয়া। গৰিষ্ঠসংখ্যক লোকৰ ক্ষেত্ৰতেই নিশা কেইবাবাৰো টোপনি ভাঙে যদিও পুৱা সাৰ পোৱাৰ পিছত সেই কথা তেওঁলোকৰ স্মৃতিপটত নাথাকে।
অৱশ্যে, প্ৰতিদিনে নিশা একেটা সময়তে টোপনি ভাঙি যোৱা আৰু তাৰ পিছত পুনৰ টোপনি নহা অৱস্থাটোক কেতিয়াও আওকাণ কৰা উচিত নহয়। ইয়াৰ অৰ্থ এইটোৱেই হ‘ব পাৰে যে কোনো অজ্ঞাত কাৰণত আপোনাৰ স্বাভাৱিক নিদ্ৰাত ব্যাঘাত জন্মিছে।
মানসিক চাপ আৰু কৰ্টিছল হৰম‘ন: আমাৰ শৰীৰত থকা ‘কৰ্টিছল‘ (Cortisol) নামৰ হৰম’নবিধক সাধাৰণতে ‘ষ্ট্ৰেছ হৰম’ন’ বুলি জনা যায়। শৰীৰে যাতে পুৱা সাৰ পাবলৈ নিজকে প্ৰস্তুত কৰিব পাৰে, তাৰ বাবে পুৱতি নিশাৰ ভাগত এই হৰম’নৰ মাত্ৰা স্বাভাৱিকতেই বৃদ্ধি পায়। কিন্তু দীৰ্ঘদিন ধৰি মানসিক চাপ, উদ্বেগ, আৱেগিক অস্থিৰতা বা অতিমাত্ৰা কৰ্মচাপত ভুগি থাকিলে শৰীৰ অতিমাত্ৰা সজাগ হৈ পৰে। ইয়াৰ ফলশ্ৰুতিত মাজনিশা সহজেই টোপনি ভাঙি যোৱাৰ সম্ভাৱনা থাকে।
স্বাস্থ্যজনিত সমস্যা: প্ৰতিদিনে ৩ বজাত টোপনি ভঙাৰ বাবে কেৱল কৰ্টিছলকে জগৰীয়া কৰিব নোৱাৰি। উদ্বেগ আৰু বিষণ্ণতাৰ (Anxiety and Depression) লগতে শ্বাস-প্ৰশ্বাসত ব্যাঘাত জন্মোৱা ‘স্লীপ এপনিয়া‘ (Sleep Apnea), দীৰ্ঘদিনীয়া শাৰীৰিক বিষ, এচিডিটি বা হৰম’নৰ পৰিৱৰ্তনৰ ফলতো নিদ্ৰাহীনতাৰ সমস্যা হ‘ব পাৰে।
অনিয়মিত জীৱনশৈলী আৰু অভ্যাস: কিছুমান বিশেষ ঔষধে টোপনিত বিৰূপ প্ৰভাৱ পেলাব পাৰে। তদুপৰি সন্ধিয়াৰ পিছত চাহ বা কফি গ্ৰহণ, নিদ্ৰালৈ যোৱাৰ পূৰ্বে দীৰ্ঘসময় ধৰি মোবাইল বা কম্পিউটাৰৰ পৰ্দাত চকু ৰখা, নিশা মদ্যপান কৰা আৰু প্ৰতিদিনে ভিন্ন সময়ত শুবলৈ যোৱাৰ দৰে অনিয়মিত জীৱনশৈলীয়েও মাজনিশা টোপনি ভঙাৰ প্ৰৱণতা বৃদ্ধি কৰে।
বহু লোকৰ ক্ষেত্ৰত দেখা যায় যে টোপনি ভাঙি যোৱাৰ লগে লগেই মনলৈ নানা চিন্তাই আগুৰি ধৰে। দিনৰ পোহৰত তেনেই সাধাৰণ যেন লগা সমস্যাবোৰেও নিশাৰ নিস্তব্ধ পৰিৱেশত এক বৃহৎ ৰূপ ধাৰণ কৰে। চাকৰি, পাৰিবাৰিক সম্পৰ্ক, আৰ্থিক অনাটন বা স্বাস্থ্যজনিত সৰু-সুৰা চিন্তাইও মুহূৰ্তৰ ভিতৰতে মনটো অস্থিৰ কৰি তুলিব পাৰে।
পিছে ইয়াৰ অৰ্থ এইটো নহয় যে আপোনাৰ শৰীৰত নিশ্চয়কৈ কোনো ভয়ংকৰ ৰোগে বাহ লৈছে। নিশাৰ ভাগত চাৰিওফালে কোলাহলমুক্ত আৰু নিস্তব্ধ পৰিৱেশ বিৰাজ কৰে। এনে সময়ত মানুহে নিজৰ চিন্তা-ভাৱনাসমূহৰ সৈতে অকলশৰীয়া হৈ পৰে। মানসিক চাপৰ বাবে শৰীৰ ইতিমধ্যে সজাগ অৱস্থাত থাকিলে মগজুৱে স্বয়ংক্ৰিয়ভাৱে বিভিন্ন সমস্যাৰ কথা চালি-জাৰি চাবলৈ আৰম্ভ কৰে।
সেয়েহে ঘড়ীটোলৈ চাই ‘কিয় ঠিক ৩ বজাতেই টোপনি ভাঙিল‘ বুলি অযথা চিন্তা কৰাতকৈ, টোপনি ভঙাৰ পিছত নিজৰ শাৰীৰিক আৰু মানসিক অৱস্থাটোহে সূক্ষ্মভাৱে পৰ্যবেক্ষণ কৰা উচিত। সেই সময়ত কাৰ্যালয়ৰ কামৰ কথা মনলৈ আহিছে নেকি, অকাৰণতে উদ্বেগ বা ভয় অনুভৱ হৈছে নেকি, শৰীৰৰ কোনো অংশত বিষাইছে নেকি, অত্যাধিক গৰম লাগিছে নেকি, উশাহ লোৱাত কষ্ট হৈছে নেকি— এই দিশবোৰৰ প্ৰতি গুৰুত্ব প্ৰদান কৰাটো অধিক বাঞ্ছনীয়।
প্ৰতি নিশা ৩ বজাত টোপনি ভঙাটো কোনো ৰহস্যময় বা অতিপ্ৰাকৃতিক সংকেত নহয়। ই মূলতঃ মানসিক চাপ, ত্ৰুটিপূৰ্ণ জীৱনশৈলী অথবা স্বাস্থ্যজনিত সমস্যাৰহে প্ৰতিফলন। যদিহে এই সমস্যা ধাৰাবাহিকভাৱে কেইবাসপ্তাহ ধৰি চলি থাকে, দিনৰ ভাগত কাম-কাজত ব্যাঘাত জন্মায় বা আপুনি সঘনাই ভাগৰুৱা অনুভৱ কৰে, তেন্তে সামাজিক মাধ্যমত প্ৰচাৰিত উৰাবাতৰিত ভৰসা নকৰি অনতিপলমে এগৰাকী চিকিৎসকৰ কাষ চপা উচিত।
