উত্তৰাখণ্ডৰ পিছত এইবাৰ তামিলনাডুত এক শোকাৱহ ঘটনা সংঘটিত হৈছে। নীট পৰীক্ষাক লৈ চলি থকা বিতৰ্কৰ মাজতে ২১ জুনৰ পুনৰ পৰীক্ষাৰ পূৰ্বেই এগৰাকী ১৯ বছৰীয়া ছাত্ৰীয়ে আত্মহত্যা কৰা ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।
মৃত ছাত্ৰীগৰাকীৰ নাম অনুনকীৰ্তনা বুলি জানিব পৰা গৈছে। তেওঁ ইয়াৰ পূৰ্বেও দুবাৰকৈ নীট পৰীক্ষাত অৱতীৰ্ণ হৈছিল আৰু এইবাৰো তৃতীয়বাৰৰ বাবে পৰীক্ষাৰ বাবে প্ৰস্তুতি চলাই আছিল।
আৰক্ষীৰ প্ৰাথমিক অনুমান অনুসৰি, শেহতীয়াকৈ দেশজুৰি সৃষ্টি হোৱা নীটৰ প্ৰশ্নকাকত ফাদিলৰ ঘটনা আৰু তাৰ পিছত পুনৰ পৰীক্ষা লোৱাৰ সিদ্ধান্তৰ বাবেই ছাত্ৰীগৰাকী চৰম মানসিক চাপত ভুগিছিল।
ছাত্ৰীগৰাকীৰ পৰিয়ালে জনোৱা মতে, এইবাৰ তেওঁ অতি নিষ্ঠাৰে পৰীক্ষাৰ বাবে প্ৰস্তুতি চলাইছিল। কিন্তু প্ৰশ্নকাকত ফাদিল হোৱাৰ খবৰে তেওঁক গভীৰ মানসিক আঘাত দিছিল। পৰীক্ষা বাতিল হোৱাৰ পিছৰে পৰা তেওঁ একেবাৰে মনে মনে থকা হৈছিল। পুনৰ পৰীক্ষাৰ বাবে প্ৰস্তুতি চলাবলৈ চেষ্টা কৰিছিল যদিও তেওঁ নিজৰ মনটোক শান্ত কৰিব পৰা নাছিল আৰু দিনে দিনে হতাশাই তেওঁক গ্ৰাস কৰি আনিছিল। এই সন্দৰ্ভত তেওঁ পৰিয়ালৰ লোকৰ সৈতেও কথা পাতিছিল।
ঘটনাস্থলীৰ পৰা কোনো সুইচাইড নোট উদ্ধাৰ হোৱা নাই যদিও পৰিয়ালে স্পষ্ট কৰিছে যে ছাত্ৰীগৰাকী মানসিকভাৱে আটাইতকৈ বেছি ভাঙি পৰিছিল। বৰ্তমান আৰক্ষীয়ে সমগ্ৰ ঘটনাটোৰ তদন্ত অব্যাহত ৰাখিছে।
এই কৰুণ ঘটনাৰ পিছতে তামিলনাডুৰ কইম্বাটুৰ চহৰত তীব্ৰ প্ৰতিবাদ আৰম্ভ হৈছে। একাংশ বিক্ষোভকাৰীয়ে বৰ্তমানৰ নীট পৰীক্ষা ব্যৱস্থা সম্পূৰ্ণৰূপে বাতিল কৰাৰ দাবী তুলিছে। শাসকীয় দল ডিএমকেই সমগ্ৰ ৰাজ্যজুৰি এই সন্দৰ্ভত আন্দোলনৰ কাৰ্যসূচী গ্ৰহণ কৰিছে। তেওঁলোকৰ মতে, নীট পৰীক্ষাৰ বাবে তামিলনাডুৰ বহু শিক্ষাৰ্থী, বিশেষকৈ গ্ৰাম্য আৰু আৰ্থিকভাৱে পিছপৰা শ্ৰেণীৰ ছাত্ৰ-ছাত্ৰীসকল আটাইতকৈ বেছি ক্ষতিগ্ৰস্ত হৈছে।
উল্লেখ্য যে তামিলনাডুৱে দীৰ্ঘদিন ধৰি নীট পৰীক্ষাৰ বিৰোধিতা কৰি আহিছে। ৰাজ্য চৰকাৰৰ মতে, এই পৰীক্ষাত কেৱল সেইসকল ছাত্ৰ-ছাত্ৰীয়েহে বেছি সুবিধা পায়, যিসকলে চহৰৰ ব্যয়বহুল ব্যক্তিগত কোচিং কেন্দ্ৰসমূহত পঢ়াৰ সুযোগ পায়। যাৰ ফলত চৰকাৰী বিদ্যালয় বা গ্ৰাম্য অঞ্চলৰ মেধাৱী ছাত্ৰ-ছাত্ৰীসকল প্ৰতিযোগিতাত পিছপৰি ৰয়।
নীট পৰীক্ষা আৰম্ভ হোৱাৰ পূৰ্বে তামিলনাডুত প্ৰায় এটা দশক ধৰি উচ্চতৰ মাধ্যমিকৰ নম্বৰৰ ভিত্তিতহে চিকিৎসা বিজ্ঞানৰ পাঠ্যক্ৰমত নামভৰ্তি কৰা হৈছিল। ৰাজ্যখনৰ একাংশৰ মতে, সেই পুৰণি ব্যৱস্থাটোৰ বাবে পিছপৰা পৰিয়ালৰ ল’ৰা-ছোৱালীয়েও ডাক্তৰ হোৱাৰ সুযোগ পাইছিল। কিন্তু নীট আৰম্ভ হোৱাৰ পিছৰে পৰা ছাত্ৰ-ছাত্ৰীসকল চৰম হতাশাৰ বলি হৈছে আৰু অকালতে বহু মূল্যবান জীৱন হেৰুৱাবলগীয়া হৈছে। ইয়াৰ পূৰ্বেও তামিলনাডু বিধানসভাত নীটৰ পৰা ৰেহাই বিচাৰি এখন বিধেয়ক গৃহীত কৰা হৈছিল যদিও ৰাষ্ট্ৰপতিৰ অনুমোদন লাভ নকৰাৰ বাবে সেয়া কাৰ্যকৰী হ’ব পৰা নাছিল।
