গ্ৰেপ্তাৰৰ পৰা ৰক্ষা পৰিবলৈ এইবাৰ ত্ৰিপুৰা উচ্চ ন্যায়ালয়ৰ দ্বাৰস্থ হৈছে তৃণমূল কংগ্ৰেছৰ সৰ্বভাৰতীয় সাধাৰণ সম্পাদক অভিষেক বন্দ্যোপাধ্যায়। শুকুৰবাৰে এই গোচৰৰ শুনানি গ্ৰহণ কৰি আদালতে এক গুৰুত্বপূৰ্ণ নিৰ্দেশ প্ৰদান কৰে। আদালতৰ নিৰ্দেশ অনুসৰি অহা একৈশ আগষ্ট পৰ্যন্ত অভিষেক বন্দ্যোপাধ্যায়ে আৰক্ষী বা আদালতৰ ওচৰত হাজিৰা দিব নালাগে। সেই দিনাই এই স্পৰ্শকাতৰ গোচৰটোৰ পৰৱৰ্তী শুনানি গ্ৰহণ কৰা হ’ব।
উল্লেখ্য যে দুহেজাৰ একৈশ চনৰ আগষ্ট মাহৰ আৰম্ভণিতে এটা দলীয় কাৰ্যসূচীত অংশগ্ৰহণ কৰিবলৈ যোৱাৰ সময়ত ত্ৰিপুৰাত তৃণমূল কংগ্ৰেছৰ যুৱ নেতৃত্বক পথত বাধা প্ৰদান কৰা হৈছিল। তাত দেবাংশু ভট্টাচাৰ্য, সুদীপ ৰাহা আৰু জয়া দত্তৰ ওপৰত আক্ৰমণ চলোৱাৰ গুৰুতৰ অভিযোগ উত্থাপন হৈছিল। এই ঘটনাক কেন্দ্ৰ কৰি সমগ্ৰ এলেকাত তীব্ৰ উত্তেজনাৰ সৃষ্টি হৈছিল আৰু পৰিস্থিতি উত্তপ্ত হৈ পৰিছিল। ইয়াৰ পিছত যুৱ নেতাসকলক আৰক্ষীয়ে গ্ৰেপ্তাৰ কৰাত অভিষেক বন্দ্যোপাধ্যায় আৰু কুণাল ঘোষকে ধৰি অন্যান্য জ্যেষ্ঠ নেতাসকলে খোৱাই থানাত ধৰ্মঘট কাৰ্যসূচী ৰূপায়ণ কৰে আৰু ধৃতসকলৰ মুক্তিৰ দাবী উত্থাপন কৰে।
জামিন অযোগ্য ধাৰাত গোচৰ ৰুজু হোৱাৰ বাবে ধৃত নেতাসকলক আদালতত হাজিৰ কৰোৱা হৈছিল আৰু সেই সময়তো অভিষেক বন্দ্যোপাধ্যায় থানাতে বহি সমগ্ৰ পৰিস্থিতি পৰ্যবেক্ষণ কৰি আছিল। দলৰ নেতাসকলে জামিন লাভ কৰাৰ পিছত তেওঁ ত্ৰিপুৰাৰ চৰকাৰৰ বিৰুদ্ধে তীব্ৰ ক্ষোভ উজাৰি দিছিল। সিদিনা থানাত তৃণমূল কংগ্ৰেছৰ এই ধৰ্মঘট কাৰ্যসূচীৰ বাবেই ত্ৰিপুৰা আৰক্ষীয়ে এটা গোচৰ ৰুজু কৰিছিল। সেই গোচৰতে খোৱাই আদালতে অভিষেক বন্দ্যোপাধ্যায়নৈ সমন প্ৰেৰণ কৰিছিল আৰু ইয়াৰ পিছতে গ্ৰেপ্তাৰ হোৱাৰ আশংকাত তেওঁ ত্ৰিপুৰা উচ্চ ন্যায়ালয়ৰ কাষ চাপে।
আনহাতে অভিষেক বন্দ্যোপাধ্যায়ৰ বিৰুদ্ধে দুৰ্নীতিৰ বহুতো অভিযোগ উত্থাপিত হৈছে, যাৰ বাবে তেওঁ দীৰ্ঘদিন ধৰি কেন্দ্ৰীয় তদন্তকাৰী সংস্থাৰ নজৰত আছে। শেহতীয়াকৈ স্বাক্ষৰ জালিয়াতিৰ গোচৰ আৰু শিক্ষক নিযুক্তি কেলেংকাৰীৰ গোচৰতো তেওঁ কেন্দ্ৰীয় সংস্থাৰ সোধা-পোছাৰ সন্মুখীন হৈছে। ইয়াৰ উপৰি মধ্যপ্ৰদেশ উচ্চ ন্যায়ালয়েও এটা মানহানিৰ গোচৰত তেওঁ লাভ কৰা আইনী সুৰক্ষা কৱচ প্ৰত্যাহাৰ কৰিছে। ইয়াৰ ফলত তৃণমূলৰ এইগৰাকী শীৰ্ষ নেতাৰ আইনী সংকট যে ক্ৰমাৎ বৃদ্ধি পাইছে, সেই বিষয়ে কোনো সন্দেহ নাই।
