সৰ্বভাৰতীয় ফুটবল ফেডাৰেচনৰ নাম সলনি হ’বলৈ গৈ আছে নেকি? বৰ্তমান তেনেকুৱা এক সম্ভাৱনাই দেখা দিছে। শনিবাৰে অনুষ্ঠিত হোৱা অল ইণ্ডিয়া ফুটবল ফেডাৰেচনৰ এক গুৰুত্বপূৰ্ণ বৈঠকত সংস্থাটোৰ নাম সলনি কৰি ফুটবল ফেডাৰেচন অব ভাৰত কৰাৰ উদ্যোগ গ্ৰহণ কৰা হৈছে। এই সন্দৰ্ভত কেন্দ্ৰীয় ক্ৰীড়া মন্ত্ৰালয়ৰ কাষ চাপিবলৈ সাজু হৈছে ফুটবল ফেডাৰেচন।
নতুন দিল্লীত অনুষ্ঠিত হোৱা ফেডাৰেচনৰ বিশেষ সাধাৰণ সভাত এই নাম সলনিৰ প্ৰস্তাৱত অনুমোদন জনোৱা হয়। অৱশ্যে নাম পৰিৱৰ্তন কৰাৰ পূৰ্বে কেন্দ্ৰীয় ক্ৰীড়া মন্ত্ৰালয় আৰু বিশ্ব ফুটবলৰ সৰ্বোচ্চ সংস্থা ফিফাৰ অনুমতিৰ প্ৰয়োজন হ’ব। ইয়াৰ উপৰিও কাৰ্যবাহী সমিতিতেও এই প্ৰস্তাৱ পাছ কৰাব লাগিব। ফেডাৰেচনৰ সভাপতি কল্যাণ চৌবেই জানিবলৈ দিয়ে যে তেওঁলোকে এই প্ৰক্ৰিয়া আৰম্ভ কৰিছে আৰু ক্ৰীড়া মন্ত্ৰালয়ে সন্মতি দিলে পৰৱৰ্তী পৰ্যায়ত এই বিষয়টো ফিফালৈ প্ৰেৰণ কৰা হ’ব। তেওঁ লগতে উল্লেখ কৰে যে তুৰস্ক আৰু চেকিয়াৰ দৰে দেশেও পূৰ্বে নিজৰ ফুটবল সংস্থাৰ নাম সলনি কৰিছে।
আনহাতে এই গুৰুত্বপূৰ্ণ বৈঠকত অহা ৪ ছেপ্টেম্বৰৰ পৰা ইণ্ডিয়ান ছুপাৰ লীগ আৰম্ভ কৰাৰ সিদ্ধান্তও লোৱা হৈছে। মুঠ চৈধ্যটা দলক লৈ প্ৰায় সাত মাহ ধৰি নিজৰ আৰু বিপক্ষৰ খেলপথাৰত মেচ খেলাৰ নিয়মেৰে এই লীগ চলিব। অৱশ্যে লীগৰ ভৱিষ্যত গাঁথনিক লৈ এতিয়াও চূড়ান্ত সিদ্ধান্ত লোৱা হোৱা নাই। বৰ্তমানৰ বাবে এই বিষয়টো ক্লাবসমূহ, ফেডাৰেচন আৰু পৰিচালনা সমিতিৰ ওপৰত এৰি দিয়া হৈছে। ইয়াৰ উপৰিও অহা ৩০ জুনৰ ভিতৰত ফেডাৰেচনৰ সংবিধানৰো কিছু সালসলনি হ’ব পাৰে বুলি জানিব পৰা গৈছে।
লীগৰ ব্যৱসায়িক স্বত্ব লাভৰ বাবে জিনিয়াছ স্পৰ্টছ নামৰ সংস্থাই আবেদন জনাইছিল। অৱশ্যে চূড়ান্ত সিদ্ধান্ত জনাবলৈ কিছু সময়ৰ প্ৰয়োজন হ’ব বুলি ফেডাৰেচনে সংস্থাটোক লিখিতভাৱে জনাইছে। ইয়াৰ সমান্তৰালভাৱে ফেডাৰেচনৰ আৰ্থিক গাঁথনিতো ডাঙৰ পৰিৱৰ্তন অনা হ’ব। বিগত সপ্তাহত কেন্দ্ৰীয় ক্ৰীড়া মন্ত্ৰী মনসুখ মাণ্ডব্যৰ সৈতে হোৱা বৈঠকৰ পিছত এটা নতুন আৰ্হি প্ৰস্তুত কৰা হৈছে যিটো আগন্তুক চাৰি বছৰৰ বাবে চলিব। ক্লাবসমূহৰ স্বাৰ্থ ৰক্ষা কৰি লীগ পৰিচালনা কৰিবলৈ এটা সুকীয়া গোট গঠন কৰা হ’ব আৰু ফেডাৰেচনে পৰিবহন তথা পৰিচালনাৰ দায়িত্ব ল’ব। ইয়াৰ বাবে ফেডাৰেচনে বছৰি ষোল্ল কোটি টকা লাভ কৰিব। বৰ্তমান ফেডাৰেচনে জিনিয়াছ স্পৰ্টছৰ উত্তৰলৈ অপেক্ষা কৰিছে আৰু তাৰ পিছতে পৰিচালনা সমিতিৰ বৈঠকত এই সন্দৰ্ভত চূড়ান্ত সিদ্ধান্ত লোৱা হ’ব।
