হৰিয়ানাৰ ফৰিদাবাদত এক অতিকে কৰুণ আৰু চাঞ্চল্যকৰ ঘটনা সংঘটিত হৈছে। এজন ৩৩ বছৰীয়া যুৱকে ব্ৰত ভাঙিবলৈ বজাৰৰ পৰা কিনি অনা ফ্ৰুটী খোৱাৰ পিছতে হঠাত অসুস্থ হৈ পৰে আৰু পৰৱৰ্তী সময়ত চিকিৎসালয়লৈ নি থকা অৱস্থাতে তেওঁৰ কৰুণ মৃত্যু ঘটে। স্থানীয় আৰক্ষীৰ ভাষ্য অনুসৰি যুৱকজনৰ মৃত্যুৰ প্ৰকৃত কাৰণ মৰণোত্তৰ পৰীক্ষাৰ প্ৰতিবেদন অহাৰ পিছতহে সম্পূৰ্ণৰূপে স্পষ্ট হ’ব।
মৃত যুৱকজনক অংকুশ বুলি চিনাক্ত কৰা হৈছে আৰু তেওঁ ফৰিদাবাদৰ হনুমান নগৰ অঞ্চলৰ বাসিন্দা আছিল। বৃহস্পতিবাৰে নিশা তেওঁ ব্ৰত পালন কৰি আছিল আৰু নিশা পৰিয়ালৰ লোকসকলৰ সৈতে ব্ৰত ভাঙিবলৈ পেকেটত থকা পেয় পদাৰ্থ ফ্ৰুটী খাইছিল। আত্মীয়সকলে জনোৱা মতে ফ্ৰুটী খোৱাৰ কিছু সময়ৰ পিছতে তেওঁৰ ধাৰাবাহিকভাৱে বমি হ’বলৈ ধৰে আৰু পেটৰ অসহ্য বিষ অনুভৱ কৰে। ইয়াৰ পিছতে তেওঁৰ স্বাস্থ্যৰ অৱস্থা অতি দ্ৰুতগতিত বেয়াৰ ফালে ঢলিবলৈ ধৰে।
ঘটনাৰ পিছতে পৰিয়ালৰ লোকে তেওঁক ততাতৈয়াকৈ ওচৰৰে এখন ব্যক্তিগত চিকিৎসালয়লৈ লৈ যায় যদিও স্বাস্থ্যৰ অৱস্থা সংকটজনক হোৱাৰ বাবে তাত থকা চিকিৎসকে তেওঁক ফৰিদাবাদৰ বাদশা খান অসামৰিক চিকিৎসালয়লৈ প্ৰেৰণ কৰে। অসামৰিক চিকিৎসালয়ৰ চিকিৎসকেও উন্নত চিকিৎসাৰ বাবে তেওঁক তৎকালীনভাৱে দিল্লীৰ চফদৰজং চিকিৎসালয়লৈ লৈ যাবলৈ পৰামৰ্শ দিয়ে। কিন্তু আন এখন চিকিৎসালয়লৈ স্থানান্তৰ কৰাৰ প্ৰস্তুতি চলাই থকাৰ মাজতে অংকুশৰ শাৰীৰিক অৱস্থা আৰু অধিক অৱনতি ঘটে আৰু পথতে তেওঁ শেষ নিশ্বাস ত্যাগ কৰে।
খেড়ী পুল আৰক্ষী থানাৰ ভাৰপ্ৰাপ্ত বিষয়া দেৱেন্দ্ৰ সিঙে জানিবলৈ দিয়া মতে নিশা প্ৰায় ডেৰ বজাত সৰ্বোদয় চিকিৎসালয়ৰ পৰা তেওঁলোকে তথ্য লাভ কৰে যে এজন যুৱকক মৃত অৱস্থাত চিকিৎসালয়লৈ অনা হৈছে। সোধা-পোছাৰ সময়ত পৰিয়ালৰ লোকে আৰক্ষীক অৱগত কৰে যে অংকুশে দিনটো ব্ৰত ৰাখিছিল আৰু ব্ৰত ভাঙিবলৈ ফ্ৰুটী খোৱাৰ পিছতে তেওঁৰ শৰীৰত এই মাৰাত্মক লক্ষণসমূহে দেখা দিছিল। আৰক্ষীয়ে পৰিয়ালৰ এজাহাৰ আনুষ্ঠানিকভাৱে পঞ্জীয়ন কৰি মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে। যাৱতীয় প্ৰক্ৰিয়া সমাপ্ত হোৱাৰ পিছত মৃতদেহটো পৰিয়ালক গতাই দিয়া হৈছে। আৰক্ষীয়ে জনোৱা মতে মৰণোত্তৰ পৰীক্ষাৰ প্ৰতিবেদন অহাৰ পিছতহে মৃত্যুৰ প্ৰকৃত কাৰণ জানিব পৰা যাব আৰু সেই অনুসৰি পৰৱৰ্তী আইনী ব্যৱস্থা গ্ৰহণ কৰা হ’ব।
