অসমৰ সাংস্কৃতিক জগতৰ বাবে এক গৌৰৱৰ মুহূৰ্ত। গুৱাহাটীৰ উদীয়মান চলচ্চিত্ৰ নিৰ্মাতা কৌশিক শৰ্মাৰ প্ৰথমখন ছুটি ছবি ‘দ্য স্ক্ৰ’ল দেট ষ্ট’ল টাইম’য়ে (The Scroll That Stole Time) স্পেইনৰ মাদ্ৰিদত অনুষ্ঠিত এক আন্তঃৰাষ্ট্ৰীয় চলচ্চিত্ৰ মহোৎসৱত ‘শ্ৰেষ্ঠ প্ৰবন্ধধৰ্মী ছবি’ (Best Essay Film) ৰ সন্মান লাভ কৰিবলৈ সক্ষম হৈছে। স্পেইনৰ আগশাৰীৰ স্বতন্ত্ৰ চলচ্চিত্ৰ মহোৎসৱ ‘এফ আই চি আই এম এ ডি ২০২৬’ (FICIMAD 2026) ত এই বঁটা আগবঢ়োৱা হৈছে। গুৱাহাটীত সম্পূৰ্ণ শূন্য বাজেটৰ আৰ্হিত নিৰ্মিত এই ব্যতিক্ৰমী ছবিখনে বৰ্তমান সমাজৰ প্ৰযুক্তি আৰু সামাজিক মাধ্যমৰ আসক্তিৰ ভয়াৱহ প্ৰভাৱক মূল বিষয়বস্তু হিচাপে উপস্থাপন কৰি এই আন্তঃৰাষ্ট্ৰীয় স্বীকৃতি লাভ কৰিছে।
তেওঁৰ নিজা প্ৰযোজনাত নিৰ্মিত চলচ্চিত্ৰখনৰ চিত্ৰনাট্য, পৰিচালনা, দৃশ্যগ্ৰহণ আৰু সম্পাদনাৰ দায়িত্ব কৌশিক শৰ্মাই নিজেই এককভাৱে বহন কৰিছে। নিউজিলেণ্ডৰ ৱাইকাটো ইনষ্টিটিউট অৱ টেকন’লজি আৰু মুম্বাইৰ হুইছলিং উডছ ইণ্টাৰনেচনেলৰ প্ৰাক্তন ছাত্ৰ শৰ্মাৰ এই প্ৰথম স্বাধীন প্ৰয়াস। ছবিখনৰ মূল চৰিত্ৰত অভিনয় কৰিছে ফিলিপছ নেওগে। ইয়াৰ উপৰিও ছবিখনত অৰুন্ধতী বৰা, অৰুন্ধতী শৰ্মা, সিন্ধু কাশ্যপ বৰপূজাৰী আৰু ৰ’নিল কাটকীৰ দৰে অসমৰ স্থানীয় প্ৰতিভাই গুৰুত্বপূৰ্ণ চৰিত্ৰ ৰূপায়ণ কৰিছে। মহোৎসৱৰ সঞ্চালক টমাছ পেৰেজ ট’ৰেলা আৰু প্ৰগ্ৰামিং টীমে ছবিখনৰ কলাত্মক দিশৰ ভূয়সী প্ৰশংসা কৰাৰ লগতে উৎসৱৰ ২০২৬ বৰ্ষৰ আনুষ্ঠানিক আলোচনীতো ইয়াক বিশেষভাৱে স্থান দিছে।
ছবিখনৰ কাহিনীভাগ ‘আৰৱ’ নামৰ এজন ব্যক্তিৰ মনস্তত্ত্বক কেন্দ্ৰ কৰি গঢ়ি উথিছে, য’ত ডিজিটেল বিভ্ৰান্তি আৰু আধুনিক সমাজৰ নিঃসংগতাৰ এক নিখুঁত চিত্ৰ ডাঙি ধৰা হৈছে। বৰ্তমান সময়ত মানুহ আৰু মোবাইল ফোনৰ সম্পৰ্কক লৈ ছবিখনে এক গভীৰ প্ৰশ্ন উত্থাপন কৰিছে। এই আন্তঃৰাষ্ট্ৰীয় স্বীকৃতি লাভৰ সন্দৰ্ভত পৰিচালক কৌশিক শৰ্মাই সামাজিক মাধ্যমত নিজৰ সন্তোষ প্ৰকাশ কৰি কয় যে এক সীমিত সম্পদ আৰু সামান্য পৰীক্ষা-নিৰীক্ষাৰে পৃথিৱীৰ এটা সৰু চুকত আৰম্ভ হোৱা এই যাত্ৰাই আশা কৰাতকৈ বহু দূৰ অগ্ৰসৰ হ’বলৈ সক্ষম হৈছে। স্পেইনৰ উপৰিও ব্ৰাজিলৰ বিখ্যাত ‘এফ আই চি এচ এ এম এচ’ (FICSAMAS) চলচ্চিত্ৰ মহোৎসৱতো ছবিখন আনুষ্ঠানিকভাৱে নিৰ্বাচিত হৈছে বুলি তেওঁ জানিবলৈ দিয়ে।
