ফুটবল বিশ্বকাপৰ ২০২৬ৰ এখন গুৰুত্বপূৰ্ণ মেচত অষ্ট্ৰিয়াৰ বিৰুদ্ধে প্ৰথমটো গ‘ল স্ক‘ৰ কৰাৰ লগে লগে ইতিহাস ৰছিলে আৰ্জেণ্টিনাৰ তাৰকা ফুটবলাৰ লিয়নেল মেছিয়ে। এই মেচখনত দুটা গ‘লৰ ব্যৱধানত দলৰ জয় নিশ্চিত কৰাৰ সমান্তৰালভাৱে মেছিয়ে বিশ্বকাপৰ ইতিহাসত চাৰিটাকৈ গিনিজ বিশ্ব ৰেকৰ্ড নিজৰ নামলৈ আনিবলৈ সক্ষম হৈছে। দলটোৱে এই গুৰুত্বপূৰ্ণ জয়ৰ জৰিয়তে প্ৰতিযোগিতাখনৰ নকআউট পৰ্যায়ত প্ৰৱেশ কৰাৰ লগতে মেছিয়ে প্ৰাক্তন তাৰকা খেলুৱৈসকলৰ কেইবাটাও পুৰণি অভিলেখ ভংগ কৰিছে।
গিনিজ কৰ্তৃপক্ষই প্ৰকাশ কৰা অনুসৰি মেছিয়ে স্থাপন কৰা প্ৰথমটো বিশ্ব ৰেকৰ্ড হৈছে বিশ্বকাপত সৰ্বাধিক গ‘লৰ অভিলেখ। বৰ্তমান মেছিৰ গ‘লৰ সংখ্যা হৈছে ওঠৰটা, যাৰ জৰিয়তে তেওঁ জাৰ্মানিৰ মিৰোস্লাভ ক্লোজৰ অভিলেখ ভংগ কৰিছে। ক্লোজিয়ে ২০১৪ চনত ষোল্লটা গ‘লৰ ৰেকৰ্ড গঢ়িছিল। এই তালিকাত ব্ৰাজিলৰ ৰোনাল্ডোৰ পোন্ধৰটা গ‘লৰে পৰৱৰ্তী স্থানত আছে। দ্বিতীয়টো ৰেকৰ্ড হৈছে বিশ্বকাপত সৰ্বাধিক মেচ খেলাৰ অভিলেখ। মেছিয়ে ইতিমধ্যে আঠাইশখন বিশ্বকাপ মেচ খেলিছে। ২০২২ চনৰ কাটাৰ বিশ্বকাপৰ ফাইনেলতেই তেওঁ ইটালীৰ পাওলো মালদিনিৰ পঁচিশখন মেচৰ পূৰ্বৰ অভিলেখ ভংগ কৰিছিল।
মেছিয়ে গঢ়া তৃতীয়টো বিশ্ব ৰেকৰ্ড হৈছে বিশ্বকাপত সৰ্বাধিক মেচ জয়ৰ অভিলেখ। সোমবাৰৰ নিশা অষ্ট্ৰিয়াৰ বিৰুদ্ধে মেচখনত জয়লাভ কৰাৰ লগে লগে মেছিয়ে বিশ্বকাপত নিজৰ ওঠৰসংখ্যক জয় সাব্যস্ত কৰে আৰু ক্লোজৰ সোতৰখন মেচ জয়ৰ পূৰ্বৰ ৰেকৰ্ড অতিক্ৰম কৰে। ব্ৰাজিলৰ কাফু ষোল্লখন জয়েৰে এই তালিকাত তৃতীয় স্থানত আছে। ইয়াৰ উপৰিও, মেছিয়ে বিশ্বকাপত সৰ্বাধিক সময় অতিবাহিত কৰাৰ চতুৰ্থটো অভিলেখ গঢ়িছে। প্ৰায় বিয়াল্লিশ ঘণ্টা অৰ্থাৎ দুহেজাৰ চাৰিশ উননব্বৈ মিনিট বিশ্বকাপৰ খেলপথাৰত কটোৱা মেছিয়ে মালদিনিৰ দুহেজাৰ দুশ সোতৰ মিনিটৰ পূৰ্বৰ ৰেকৰ্ড অতিক্ৰম কৰিছে।
অষ্ট্ৰিয়াৰ বিৰুদ্ধে জয়লাভৰ পাছত মেছিয়ে সংবাদ মাধ্যমৰ আগত প্ৰতিক্ৰিয়া ব্যক্ত কৰি কয় যে দলৰ জয়ে তেওঁক আটাইতকৈ বেছি আনন্দিত কৰিছে। তেওঁ জনায় যে এই জয় তেওঁলোকৰ বাবে অতি প্ৰয়োজনীয় আছিল আৰু ইয়াৰ বাবে দলটোৱে কঠোৰ পৰিশ্ৰম কৰিবলগীয়া হৈছে। দলটো নকআউট পৰ্যায়লৈ উন্নীত হোৱাৰ পাছত তেওঁ মানসিক শান্তি লাভ কৰা বুলি মন্তব্য কৰি কয় যে ই ভৱিষ্যতে তেওঁলোকক সহায় কৰিব। মেছিয়ে লগতে কয় যে এই বিশ্বকাপৰ প্ৰতিখন মেচেই তীব্ৰ প্ৰতিযোগিতামূলক হ‘ব আৰু মেচ জিকিবলৈ হ‘লে কঠোৰ পৰিশ্ৰম কৰিব লাগিব। তেওঁ প্ৰতিটো মুহূৰ্ত উপভোগ কৰিছে আৰু সতীৰ্থসকলৰ সৈতে আনন্দ উদযাপন কৰিবলৈ অধীৰ আগ্ৰহেৰে অপেক্ষা কৰি আছে বুলিও মন্তব্য কৰে।
ছটা পইণ্ট লাভ কৰাটো দলৰ বাবে অতি প্ৰয়োজনীয় আছিল বুলি উল্লেখ কৰি মেছিয়ে কয় যে তেওঁলোক জয়ৰ লক্ষ্যৰেই পথাৰত নামিছিল। বৰ্তমানৰ ফুটবলত কোনো দলেই সহজে হাৰ মানি নলয় বাবে প্ৰতিখন মেচেই সম্পূৰ্ণ মনোযোগেৰে খেলিব লাগে বুলিও তেওঁ মত প্ৰকাশ কৰে।
উল্লেখ্য যে চলিত ফুটবল বিশ্বকাপ এঘাৰ জুনৰ পৰা আৰম্ভ হৈছে আৰু ই ঊনৈশ জুলাইলৈকে চলিব। ফিফাই প্ৰথমবাৰৰ বাবে আঠচল্লিশখন দেশক লৈ এই প্ৰতিযোগিতাখন আয়োজন কৰিছে। আমেৰিকা যুক্তৰাষ্ট্ৰ, কানাডা আৰু মেক্সিকোৱে যৌথভাৱে এই বিশ্বকাপ আয়োজন কৰিছে আৰু তিনিওখন দেশতে সুকীয়া উদ্বোধনী অনুষ্ঠান অনুষ্ঠিত হৈছে। প্ৰতিযোগিতাখনৰ উদ্বোধনী মেচখন মেক্সিকোৰ এজটেকা ষ্টেডিয়ামত মেক্সিকো আৰু দক্ষিণ আফ্ৰিকাৰ মাজত অনুষ্ঠিত হৈছিল।
বৰ্তমান আৰ্জেণ্টিনাই নকআউট পৰ্যায়লৈ অগ্ৰসৰ হোৱাৰ পাছত দলটোৰ পৰৱৰ্তী মেচসমূহৰ প্ৰতি ক্ৰীড়াপ্ৰেমীসকলৰ আকৰ্ষণ বৃদ্ধি পাইছে। মেছিৰ বিশ্ব ৰেকৰ্ড আৰু দলৰ বৰ্তমানৰ প্ৰদৰ্শনে আৰ্জেণ্টিনাৰ শিবিৰলৈ আশাৰ বতৰা কঢ়িয়াই আনিছে আৰু পৰৱৰ্তী মেচসমূহত দলটোৱে এই ধাৰাবাহিকতা অক্ষুণ্ণ ৰাখিব পাৰিব নে নাই সেয়া লক্ষণীয় হ‘ব।
