বিমান সেৱিকাক নিৰ্যাতন চলোৱাৰ অপৰাধত এগৰাকী ভাৰতীয় যুৱকক কঠোৰ শাস্তি প্ৰদান কৰিছে ছিংগাপুৰৰ এখন আদালতে। দোষী যুৱকজনক ছয় মাহৰ কাৰাদণ্ডৰ লগতে প্ৰায় এক লাখ টকাৰ জৰিমনাও বিহা হৈছে। চলিত বৰ্ষৰ আৰম্ভণিতে তেওঁৰ বিৰুদ্ধে এই গুৰুতৰ অভিযোগ উত্থাপন হৈছিল। অৱশেষত সমগ্ৰ ঘটনাৰ বিচাৰ প্ৰক্ৰিয়াৰ অন্তত আদালতে তেওঁক দোষী সাব্যস্ত কৰি এই শাস্তি শুনায়।
জানিব পৰা মতে, দোষী যুৱকজনৰ নাম আকাশ তিৱাৰী। তেওঁৰ বিৰুদ্ধে এগৰাকী বিমান সেৱিকাক নিৰ্যাতন চলোৱাৰ লগতে ভাবুকি দি মানসিক কষ্ট আৰু অস্বস্তি প্ৰদান কৰাৰ অভিযোগ আছিল। আদালতৰ তথ্য অনুসৰি, যোৱা ফেব্ৰুৱাৰী মাহত ছিংগাপুৰৰ এখন আভ্যন্তৰীণ বিমানত এই লজ্জাজনক ঘটনা সংঘটিত হৈছিল। অৱশ্যে নিৰ্যাতিতা গৰাকীৰ নাম আৰু নিৰ্দিষ্ট বিমানখনৰ সবিশেষ তথ্য সংবাদ মাধ্যমৰ আগত প্ৰকাশ কৰা হোৱা নাই।
শুনানিৰ সময়ত প্ৰকাশ পায় যে আকাশে তেওঁৰ চাৰিজন বন্ধুৰ সৈতে যাত্ৰী হিচাপে বিমানখনত উঠিছিল। সমগ্ৰ যাত্ৰাপথত তেওঁলোকে অতি বিশৃংখল আচৰণ কৰিছিল। বিমানৰ আন কৰ্মীসকলে লক্ষ্য কৰিছিল যে মহিলা কৰ্মীসকল যেতিয়াই সেইখাদিয়ে পাৰ হৈ গৈছিল, তেতিয়াই তেওঁলোকে হাত জোকাৰিছিল আৰু অশালীন ভংগীমাৰে হাঁহিছিল। প্ৰথমটো ঘটনা সংঘটিত হৈছিল বিমানখন আকাশলৈ উৰা মৰাৰ আগতেই। সেই সময়ত আকাশে কথা পাতি থকাৰ চলেৰে বিমান সেৱিকাগৰাকীৰ উৰুৰ ওপৰৰ অংশত স্পৰ্শ কৰিছিল। স্বাভাৱিকতেই এনে আচৰণত যুৱতীগৰাকী হতভম্ব হৈ পৰিছিল। কিন্তু আকাশ আৰু তেওঁৰ সংগীসকলে নিজৰ ভুল স্বীকাৰ কৰাৰ সলনি এই কাৰ্যত হাঁহিবলৈ ধৰে।
ইয়াৰ পিছত একেখন বিমানতে আন এটা ঘটনা সংঘটিত হয়। যুৱতীগৰাকীয়ে যাত্ৰীসকলক খাদ্য পৰিৱেশন কৰা গাড়ীখন ঠেলি নি থকা অৱস্থাত আকাশে ইচ্ছাকৃতভাৱে নিজৰ আসনৰ পৰা হাউলি পুনৰ আপত্তিজনকভাৱে তেওঁক স্পৰ্শ কৰে। সেই সময়তে যুৱকজনৰ এজন বন্ধুৱে হাঁহি হাঁহি কয় যে তেওঁ সুৰাপান কৰি এই কাণ্ড চাই আনন্দ লব বিচাৰে। ইয়াৰ পিছতে যুৱতীগৰাকীয়ে প্ৰধান বিমান সেৱিকাগৰাকীৰ ওচৰত সমগ্ৰ ঘটনাৰ অভিযোগ দাখিল কৰে। প্ৰধান সেৱিকাগৰাকীয়ে আকাশক এই বিষয়ে সোধাপোচা কৰোঁতেও যুৱকজনৰ মনত কোনো ধৰণৰ অনুশোচনা দেখা পোৱা নগৈছিল। সকলো প্ৰমাণ আৰু সাক্ষীৰ ভিত্তিত অৱশেষত আদালতে তেওঁক দোষী সাব্যস্ত কৰি কাৰাগাৰলৈ প্ৰেৰণ কৰাৰ নিৰ্দেশ দিয়ে।
