২০২৬ চনৰ ফিফা বিশ্বকাপৰ অন্যতম প্ৰতিযোগিতামূলক গ্ৰুপ আছিল ‘এফ’। প্ৰতিযোগিতা আৰম্ভ হোৱাৰ আগতেই এই গ্ৰুপটোক লৈ যথেষ্ট চৰ্চা হৈছিল আৰু চূড়ান্ত ৰাউণ্ডৰ মেচবোৰে সেই প্ৰত্যাশাক সম্পূৰ্ণৰূপে প্ৰতিফলিত কৰিছিল। নাটকীয় যুঁজৰ অন্তত নেদাৰলেণ্ডে গ্ৰুপ চেম্পিয়ন হিচাপে আত্মপ্ৰকাশ কৰি নক আউটত উপনীত হয়। জাপানে দ্বিতীয় স্থান দখল কৰে আৰু ছুইডেনে তৃতীয় শ্ৰেষ্ঠ দল হিচাপে শেষ ৩২ত স্থান লাভ কৰে। ফলত পাঁচবাৰৰ বিশ্ব চেম্পিয়ন ব্ৰাজিলে ৩২ ৰাউণ্ডত জাপানৰ বিৰুদ্ধে খেলিব।
মেচৰ আগৰ সমীকৰণটো একেবাৰে স্পষ্ট আছিল। ড্ৰ’ হ’লে জাপানৰ দ্বিতীয় স্থান আৰু নকআউট নিশ্চিত হ’ব। আনহাতে, ছুইডেনৰ হাতত জয়ৰ বাহিৰে আন উপায় নাছিল। ইয়াৰ উপৰিও টিউনিছিয়াই যদি নেদাৰলেণ্ডক পৰাস্ত কৰিব পাৰিলেহেঁতেন বা অন্ততঃ আনখন মেচত ড্ৰ’ কৰিব পাৰিলেহেঁতেন তেন্তে গ্ৰুপৰ সমীকৰণ আৰু অধিক সলনি হ’লহেঁতেন। অৱশ্যে শেষত সেয়া নহ’ল।
আমেৰিকাৰ ডালাছ ষ্টেডিয়ামত অনুষ্ঠিত মেচখনৰ আৰম্ভণিৰে পৰা দুয়োটা দলে যথেষ্ট সতৰ্ক আছিল। নকআউট পৰ্যায়লৈ যোৱাৰ হেঁচা খেলখনত স্পষ্টকৈ দেখা গ’ল। ফলত দুয়োটা দলে প্ৰথমাৰ্ধত আক্ৰমণাত্মক ফুটবলতকৈ ডিফেন্সৰ ওপৰত অধিক গুৰুত্ব দিছিল।
খেলখনৰ ৩০ মিনিটত ছুইডেনে এক বৃহৎ বিপৰ্যয়ৰ সন্মুখীন হ’বলগীয়া হয়। আঘাতৰ বাবে চেণ্টাৰ বেক ইছাক হিয়েনে খেলপথাৰ এৰিবলৈ বাধ্য হয়। অলপ পিছতে জাপানেও এটা আচৰিত সিদ্ধান্ত লৈ প্ৰথমাৰ্ধত নিজৰ অধিনায়কক বাহিৰলৈ নিয়ে। দুয়োটা দলৰ সঘনাই ফাউল, বিৰতি আৰু অত্যধিক সতৰ্ক ফুটবলৰ বাবে প্ৰথমাৰ্ধত মেচখনে কেতিয়াও ছন্দ বিচাৰি নাপালে। প্ৰথমাৰ্ধত আক্ৰমণ বুলিবলৈ বিৰতিৰ পূৰ্বে জাপানৰ আক্ৰমণ। ডি বক্সৰ বাহিৰৰ পৰা নাকামুৰাৰ এটা শ্বট পোষ্টৰ তলৰ সোঁফালৰ চুকটো স্পৰ্শ কৰি বাহিৰলৈ গৈছিল।
বিৰতিৰ পিছত মেচখনৰ গতিবেগ সলনি হ’ল। ৫৬ মিনিটত জাপানে এটা ডাঙৰ দলীয় আক্ৰমণেৰে অগ্ৰগতি লাভ কৰে। ৰিটছু ড’য়ানৰ নিখুঁত থ্ৰু পাছৰ পিছত ছুইডেনৰ ডিফেন্স ভাঙি পেলায় ডাইজেন মায়েডাই। তেওঁ মসৃনভাৱে গ’লৰক্ষকক পৰাস্ত কৰি দলটোক আগুৱাই লৈ যায়। অৱশ্যে জাপানৰ আনন্দ বেছি সময় নাথাকিল। মাত্ৰ ছয় মিনিটৰ পিছতে ছুইডেনে সমতা স্থাপন কৰে। এন্থনী এলেংগাৰে বাওঁ ভৰিৰ পৰা এটা শক্তিশালী ক্ৰছ লয়। জাপানৰ গ’লপোষ্টৰ কোণত সোমাই গ’ল। জাপানৰ গ’লৰক্ষক জেন চুজুকিয়ে সোঁফালে বহুখিনি ডাইভ মাৰিলেও বলটো ৰখাব নোৱাৰিলে।
গ’লটো দিয়াৰ পিছত সচেতন হৈ পৰে চুজুকি । প্ৰথমে আলেকজেণ্ডাৰ ইছাকৰ দীৰ্ঘ দূৰত্বৰ শ্বটটো দুৰ্দান্তভাৱে ৰখাই দিয়ে। তাৰ পাছত মেচৰ শেষৰ ফালে ইছাকৰ শক্তিশালী হেডাৰো অসাধাৰণ দক্ষতাৰে ব্লক কৰি জাপানক বিপদৰ পৰা আঁতৰাই ৰাখে।
শেষত দুয়োটা দল জয়ৰ বাবে আগ্ৰাসী হৈ পৰিল। কেইবাটাও সুযোগৰ সৃষ্টি হ’ল। কিন্তু নিৰ্ধাৰিত সময়ত আৰু গ’ল নোহোৱাৰ বাবে খেলখন ১-১ গ’লত ড্ৰ’ত সমাপ্ত হয়।
আনহাতে, একে সময়তে অনুষ্ঠিত হোৱা মেচখনত নেদাৰলেণ্ডে আশা কৰা মতে টিউনিছিয়াক পৰাস্ত কৰি গ্ৰুপৰ শীৰ্ষস্থান দখল কৰে। ফলত ডাচ দলটোৱে চেম্পিয়ন হিচাপে গ্ৰুপ ‘এফ’ৰ পৰা নকআউট হয়, দ্বিতীয় স্থানত জাপান আৰু শ্ৰেষ্ঠ তৃতীয় দল হিচাপে ছুইডেনেও অন্তিম ৩২ত স্থান লাভ কৰে।
