বলিউডৰ জনপ্ৰিয় অভিনেতা অক্ষয় কুমাৰৰ জীৱনত তেওঁৰ পত্নী টুইংকল খান্নাৰ গুৰুত্ব কিমান, সেই কথা নতুনকৈ কোৱাৰ প্ৰয়োজন নাই। কিন্তু শেহতীয়াকৈ এক সাক্ষাৎকাৰত অক্ষয়ে পত্নীৰ বিষয়ে এনে এটা মন্তব্য কৰিছে যিটো শুনি বহুতো মানুহ আচৰিত হৈ পৰিছে। অভিনেতাজনে মুকলিকৈ স্বীকাৰ কৰিছে যে টুইংকল তেওঁৰ জীৱনৰ আটাইতকৈ কঠোৰ সমালোচক। অক্ষয়ে ধেমালি কৰি কয় যে টুইংকলৰ সমালোচনা ইমানেই কঠোৰ হয় যে মাজে মাজে তেওঁৰ এনে অনুভৱ হয় যেন পত্নীয়ে তেওঁক যিকোনো মুহূৰ্ততে মাৰিয়েই পেলাব।
অৱশ্যে পত্নীৰ এই কঠোৰ সমালোচনাই অভিনেতাজনক এতিয়াও সহজ-সৰল হৈ থাকিবলৈ সহায় কৰে বুলি তেওঁ জানিবলৈ দিয়ে। অক্ষয়ে উল্লেখ কৰা মতে তেওঁৰ বহুতো ছবি টুইংকলৰ মুঠেই পছন্দ নহয়। ছবি চাই টুইংকলে একেবাৰে পোণপটীয়াভাৱে প্ৰশ্ন কৰে যে এইবোৰ বাৰু কি চলি আছে। সেইবাবেই পত্নীৰ মুখৰ পৰা অলপ প্ৰশংসা পোৱাটো অক্ষয় কুমাৰৰ বাবে এক অতি বিশেষ অনুভৱ। শেহতীয়াকৈ অক্ষয়ৰ আহিবলগীয়া ছবি ‘ৱেলকাম টু দ্য জংগল’ৰ ট্ৰেইলাৰ চাই যেতিয়া টুইংকলে ভাল বুলি কৈছিল, তেতিয়া অভিনেতাজন ইমানেই আনন্দিত হৈছিল যে তেওঁ লগে লগে এই কথা পৰিচালক প্ৰিয়দৰ্শনক জনাইছিল।
অক্ষয় আৰু টুইংকলৰ ২৫ বছৰীয়া বৈবাহিক জীৱনক লৈ সাধাৰণতে ইমান বেছি চৰ্চা নহয়। কিন্তু শেহতীয়াকৈ অভিনেত্ৰী কাজলৰ সৈতে কৰা টুইংকলৰ শ্ব’ ‘টু মাচ’ত তেওঁ কৰা বিভিন্ন মন্তব্যক লৈ বৰ্তমান ছচিয়েল মিডিয়াত যথেষ্ট চৰ্চা চলি থকা দেখা গৈছে।
