প্ৰতিশোধ? পাৰিবাৰিক শত্ৰুতা? নে ধন-সম্পত্তি? পুনেৰ ব্যৱসায়ীৰ পুত্ৰ কেতন আগৰৱালাৰ হত্যাৰ প্ৰকৃত কাৰণ কি, তাক লৈ যেতিয়া এটাৰ পিছত এটাকৈ নতুন কথা পোহৰলৈ আহিছে, তেতিয়াই আৰক্ষীৰ ওচৰত চিয়াই এক নতুন দাবী কৰিছে। তদন্তকাৰীসকলৰো সন্দেহ হৈছে যে এই হত্যাৰ আঁৰত প্ৰতিশোধ, পাৰিবাৰিক শত্ৰুতা বা টকা-পইচা একোৱেই নহয়। তেনেহ’লে কাৰণটো কি? অভিযুক্ত চিয়াৰ এই নতুন দাবীয়ে সকলোৰে মাজত চাঞ্চল্যৰ সৃষ্টি কৰিছে।
তদন্তকাৰী সূত্ৰৰ খবৰ অনুসৰি, চিয়াই তেওঁলোকৰ আগত প্ৰকাশ কৰিছে যে তেওঁ কেতনক বিয়া কৰাবলৈ একেবাৰেই সন্মত নাছিল। কেৱল সেয়াই নহয়, তেওঁৰ বিশ্বাস আছিল যে যদি কেতনক হত্যা কৰা হয়, তেন্তে পৰৱৰ্তী বিয়াৰ বাবে হাতত যথেষ্ট সময় পোৱা যাব। কমেও তিনি বছৰ সময় হাতত পোৱা যাব বুলি তেওঁ ভাবিছিল। তদন্তকাৰীৰ ওচৰত চিয়াই এনেধৰণৰ দাবীয়েই কৰিছে। ইয়াৰ পৰাই আৰক্ষীৰ সন্দেহ হৈছে যে বিয়া কৰাবলৈ এই তিনি বছৰ সময় চিয়াৰ পৰা তেওঁৰ প্ৰেমিক চেতনে বিচাৰিছিল নেকি? বৰ্তমান চিয়াক সোধা-পোছা কৰি এই তিনি বছৰ সময়ৰ ৰহস্য ফাদিল কৰিবলৈ চেষ্টা চলাইছে তদন্তকাৰীসকলে।
আৰক্ষী সূত্ৰৰ খবৰ অনুসৰি, বিয়াৰ বাবে সেই সময়খিনি পাবলৈ কেতনক ৰাস্তাৰ পৰা আঁতৰাই দিয়াটোৱেই আটাইতকৈ সহজ কাম বুলি ভাবিছিল চিয়া আৰু তেওঁৰ প্ৰেমিক চেতনে। তদন্তকাৰীসকলৰ দাবী অনুসৰি, চিয়া আৰু চেতনে যোৱা জানুৱাৰী মাহত গোপনে ৰাজস্থানৰ উদয়পুৰলৈ গৈছিল আৰু তাত তেওঁলোকে একেলগে পাঁচ দিন কটাইছিল। তাৰ কেইদিনমান পিছতেই কেতনৰ সৈতে চিয়াৰ বাগদান বা আঙুঠি পিন্ধোৱা পৰ্ব সম্পন্ন হয়। আৰক্ষীয়ে জনাইছে যে পুনেত থাকিলেও চেতন প্ৰকৃততে ৰাজস্থানৰহে বাসিন্দা। উল্লেখ্য যে যোৱা ১৮ জুন তাৰিখে লোনাৱালাৰ লোহাগড় দুৰ্গৰ পৰা তললৈ ঠেলি পেলাই কেতনক হত্যা কৰাৰ অভিযোগ উত্থাপন হৈছে। এই ভয়ংকৰ অভিযোগত ইতিমধ্যে আৰক্ষীয়ে চিয়া আৰু তেওঁৰ প্ৰেমিক চেতনক গ্ৰেপ্তাৰ কৰিছে।
