ইণ্টাৰ মিয়ামি। লিয়নেল মেছিৰ চহৰ। যিখন চহৰত কেইবছৰমান আগতেও ফুটবলৰ প্ৰতি বিশেষ আগ্ৰহ নাছিল, এতিয়া মেছিৰ কৃপাত প্ৰতিটো ঘৰতে ফুটবলৰ অনুশীলন চলে। আজি ফুটবলৰ আন এগৰাকী কিংবদন্তি ক্রিষ্টিয়ানো ৰোনাল্ডো নামিছিল মেচিৰ চহৰৰ খেলপথাৰত৷ আশা কৰা হৈছিল যে মেছিৰ চহৰতো চি আৰ ৭ উজলি উঠিব। তেওঁ নিজৰ দেশক অনবদ্য ফুটবল উপহাৰ দি গ্ৰুপ চেম্পিয়ন কৰি নকআউটত তুলিব।
আনকি বিশ্বকাপ আৰম্ভ হোৱাৰ আগতেই পৰ্তুগালক এইবাৰ ট্ৰফী জয়ৰ অন্যতম প্ৰতিদ্বন্দ্বী হিচাপে গণ্য কৰা হৈছিল। কিন্তু দেওবাৰে পুৱা কলম্বিয়াৰ বিৰুদ্ধে কঠোৰ যুঁজ দি ড্ৰ’ কৰিবলগীয়া হয় ক্রিষ্টিয়ানো ৰোনাল্ডোৰ দলটোৱে৷ সকলোৰে চকু আছিল লিয়নেল মেছিৰ মিয়ামিৰ খেলপথাৰত তেওঁলোকে কেনে প্ৰদৰ্শন কৰে। অৱশ্যে তেওঁলোক হতাশ হ’ব। এই ড্ৰ’ৰ ফলত পৰ্তুগালে দ্বিতীয় স্থানত নকআউটত প্ৰৱেশ কৰে।
আনহাতে, কলম্বিয়াই ৰোনাল্ডোৰ আক্ৰমণ সফলতাৰে চম্ভালি গ্ৰুপৰ শ্ৰেষ্ঠ হিচাপে নকআউটৰ বাবে যোগ্যতা অৰ্জন কৰি অপৰাজিত হৈ থাকে। গোটেই খেলখনত পৰ্তুগালে এটা গ’ল বিচাৰি চেষ্টা চলাইছিল যদিও শেষ বাধা অতিক্ৰম কৰিব নোৱাৰিলে। ফলত অৱশেষত কলম্বিয়াই এই বহু চৰ্চিত যুঁজত ৰোনাল্ডোক প্ৰতিহত কৰি নিজৰ শক্তি প্ৰমাণ কৰিলে।
দ্বিতীয়াৰ্ধৰ এটা সময়ত এনে লাগিছিল যে কলম্বিয়াই যিকোনো সময়তে পৰ্তুগালৰ নেটত বলটো সোমাব। ৭০ মিনিটৰ পাছত পৰ্তুগালে প্ৰথমটো কৰ্ণাৰ লাভ কৰে। যিটো সঁচাকৈয়ে আচৰিত আছিল।
খেলখনৰ পূৰ্বে দুয়োটা দলে নকআউট পৰ্যায়ত উপনীত হৈছিল। কিন্তু পৰ্তুগালে গ্ৰুপ চেম্পিয়ন হ’বলৈ আৰু ৰাউণ্ড অৱ ৩২ত সহজ প্ৰতিদ্বন্দ্বী লাভ কৰিবলৈ এই মেচখনত জয়ী হ’বলগীয়া হৈছিল। বিশ্বকাপৰ এক সুন্দৰ আৰম্ভণি কৰা কলম্বিয়াইও দলৰ ধাৰাবাহিকতা বজাই ৰাখিবলৈ ৰোনাল্ডোৰ বিৰুদ্ধে নিজৰ সৰ্বোত্তম প্ৰদৰ্শন কৰিব বিচাৰিছিল। দুয়োটা দলে উত্তেজনাপূৰ্ণভাৱে খেলখন আৰম্ভ কৰে। দুয়োটা দলেই অত্যধিক ৰক্ষণাত্মক মানসিকতাৰে নমা নাছিল, যাৰ ফলত প্ৰথম মিনিটৰ পৰাই উত্তেজনাপূৰ্ণ যুঁজৰ সৃষ্টি হয়।
প্ৰথম মিনিটত নেষ্টৰ লৰেঞ্জোৰ দলটোৱে এটা ভাল সুযোগ লাভ কৰে। যদিও গ’ল নাহিল। দৰাচলতে হাইড্ৰেচন ব্ৰেকলৈকে কলম্বিয়াই আধিপত্য দেখুৱাইছিল। কেইটামান সুযোগো সৃষ্টি কৰিলে। হাইড্ৰেচন ব্ৰেকৰ পিছত ছবিখন সলনি হৈ গ’ল। এইবাৰ আগ্ৰাসী হোৱাৰ পাল পৰ্তুগালৰ। খেলখনৰ ৩২ মিনিটত পেড্ৰ’ নেটোৱে এটা ডাঙৰ সুযোগ লাভ কৰিছিল যদিও তেওঁ গ’ল নাপালে। কিছু মুহূৰ্তৰ পিছত ৰোনাল্ডোৰ চাইকেল কিকটোও কলম্বিয়াৰ ডিফেণ্ডাৰসকলে ব্লক কৰে।
এই ড্ৰ’ৰ ফলত কলম্বিয়া গ্ৰুপৰ শীৰ্ষৰ পৰা নক আউট পৰ্যায়লৈ যায়। দ্বিতীয় স্থানত অন্ত পেলায় পৰ্তুগালে। আনহাতে, কংগোৱে উজবেকিস্তানক পৰাস্ত কৰি গ্ৰুপত তৃতীয় স্থান দখল কৰে। নক আউট পৰ্যায়লৈও গৈছে। অন্তিম ৩২ত কলম্বিয়াৰ প্ৰতিদ্বন্দ্বী ঘানা। আৰু ৰোনাল্ডোৰ দলৰ প্ৰতিদ্বন্দ্বী ক্ৰ’ৱেচিয়া।
কিন্তু গ্ৰুপত দ্বিতীয় স্থান দখল কৰাত কোৱাৰ্টাৰ ফাইনেলত মেছি-ৰ’নাল্ডোৰ মুখামুখিৰ যি সম্ভাৱনা সৃষ্টি হৈছিল সেয়া এতিয়া মাৰ গ’ল। যদিহে পৰ্তুগালে কোৱাৰ্টাৰ ফাইনেলত প্ৰৱেশ কৰে তেন্তে স্পেইনৰ মুখামুখি হ’ব পাৰে।
