চলন্ত গাড়ীৰ ভিতৰত ঘটিল ভয়ংকৰ বিস্ফোৰণ। মুহূৰ্ততে জ্বলি উঠিল গাড়ীখন। কৰ্ণাটকৰ টুমাকুৰু জিলাৰ ৪৮ নং ৰাষ্ট্ৰীয় ঘাইপথত দেওবাৰে পুৱা ৭ বজাত সংঘটিত হয় এক চাঞ্চল্যকৰ ঘটনা। বিস্ফোৰণৰ কেইটামান মুহূৰ্ত পূৰ্বে গাড়ীৰ পৰা জপিয়াই নামি এগৰাকী যুৱতীয়ে নিজৰ প্ৰাণ ৰক্ষা কৰে।
অৱশ্যে গাড়ীৰ ভিতৰতে প্ৰাণ হেৰুৱালে এজন যুৱকে। মৃত যুৱকজনৰ নাম নাগেন্দ্ৰ (৩০)। প্ৰবীণ নামৰ চালকজনক গুৰুতৰভাৱে আঘাতপ্ৰাপ্ত অৱস্থাত চিকিৎসালয়ত ভৰ্তি কৰোৱা হৈছে। অৱশ্যে প্ৰাৰম্ভিক তদন্তৰ অন্তত আৰক্ষীয়ে কয় যে এইটো কোনো দুৰ্ঘটনা নহয়, পৰিকল্পিত আত্মঘাতী আক্ৰমণৰ ঘটনাহে।
উত্তৰ কানাড়া জিলাৰ অংকোলাৰ বাসিন্দা নাগেন্দ্ৰ। আহত ৰম্যা নামৰ যুৱতীগৰাকীও একে অঞ্চলৰ বাসিন্দা আৰু বেংগালুৰুৰ এটা প্ৰতিষ্ঠানত লেব/অ’টি টেকনিচিয়ান হিচাপে কাম কৰে। দুয়োৰে মাজত দীৰ্ঘদিনীয়া সম্পৰ্ক আছিল। অৱশ্যে বিবাহৰ প্ৰস্তাৱ নাকচ কৰাত নাগেন্দ্ৰৰ ক্ষুব্ধ হৈছিল বুলি অভিযোগ উঠিছে।
শনিবাৰে পুৱা নাগেন্দ্ৰই বলপূৰ্বকভাৱে বেংগালুৰুৰ জয়নগৰ অঞ্চলৰ পেইং গেষ্ট আৱাসৰ পৰা ৰম্যাক ভাড়া কৰা কেবত লৈ যায়। ঘটনাটো দেখি ৰম্যাৰ এগৰাকী বন্ধুৱে অপহৰণৰ এজাহাৰ দাখিল কৰে। ৪৮ নং ৰাষ্ট্ৰীয় ঘাইপথেৰে আংকোলা অভিমুখে ৰাওনা হয় গাড়ীখন।
আৰক্ষীয়ে জনোৱা মতে, নাগেন্দ্ৰই গাড়ীৰ ভিতৰত বোমা লৈ উঠিছিল। সেই বোমাৰে বিস্ফোৰণ ঘটে। গাড়ীখন সম্পূৰ্ণৰূপে জ্বলি যোৱাত নাগেন্দ্ৰৰ থিতাতে মৃত্যু হয়। ঘটনাস্থলীৰ পৰা আৰক্ষীয়ে উদ্ধাৰ কৰে আন এটা নুফুটা বোমা।
টুমাকুৰুৰ আৰক্ষী অধীক্ষক অশোক কে ভিয়ে কয় যে নাগেন্দ্ৰই কেনেকৈ বোমাটো সংগ্ৰহ কৰিছিল আৰু সমগ্ৰ কাণ্ডটো পূৰ্ব পৰিকল্পিত আছিল নেকি সেই বিষয়ে তদন্ত চলি আছে। বেংগালুৰুৰ সিদ্ধপুৰা থানা আৰু টুমাকুৰুৰ কল্লামবেলা থানাৰ আৰক্ষীয়ে যৌথভাৱে এই ঘটনাৰ তদন্ত অব্যাহত ৰাখিছে। আহত যুৱতীগৰাকী চিকিৎসাধীন হৈ আছে।
