কৰাচীৰ সিন্ধ ৰেঞ্জাৰ্ছৰ মুখ্য কাৰ্যালয়ত শনিবাৰে উগ্ৰপন্থীৰ আক্ৰমণত নিহত হৈছিল চাৰিজন পাকিস্তানী সেনা জোৱান। তাৰ ২৪ ঘন্টা নৌহওঁতেই দেওবাৰে মাজনিশা পাকিস্তানে আফগানিস্তানত বিমান আক্ৰমণ চলায়। এই পৰ্যন্ত এই ঘটনাত ২৯ জন লোকৰ মৃত্যু হোৱা বুলি জানিব পৰা গৈছে। শতাধিক লোক আহত হয়। অৱশ্যে পাকিস্তানৰ শ্বেহবাজ শ্বৰীফৰ চৰকাৰে নিহত আটাইকেইজন উগ্ৰপন্থী বুলি দাবী কৰিছে। সংশ্লিষ্ট মহলৰ একাংশই ধাৰণা কৰে যে এই কাণ্ডই পাক-আফগান সীমান্তত পুনৰ উত্তেজনাৰ সৃষ্টি কৰিছে।
পাকিস্তানৰ তথ্য মন্ত্ৰী আট্টাউল্লাহ তাৰাৰে কয় যে পাকিস্তানী সেনাই প্ৰথমে আফগান সীমান্তৰ গাতে লাগি থকা খাইবাৰ পখতুনখোৱা বাজাউৰ জিলাত স্থল অভিযান চলাইছিল। তেওঁ দাবী কৰে যে এই অভিযানত তেহৰিক-ই-তালিবান পাকিস্তানৰ শীৰ্ষ অধিনায়ক খান ফৰোছকে ধৰি চাৰিজন উগ্ৰপন্থী নিহত হৈছে। ইয়াৰ পিছত পাকিস্তানী সেনাই আফগানিস্তানৰ পাকটিয়া, পাক্তিকা আৰু কুনাৰ প্ৰদেশৰ উগ্ৰপন্থী ঘাটিসমূহক লক্ষ্য কৰি ‘নিখুঁত আক্ৰমণ’ চলায়। এই আক্ৰমণত ২৫ জন উগ্ৰপন্থী নিহত হয়।
কেইবাটাও উগ্ৰপন্থী ঘাটিৰ লগতে অস্ত্ৰ-শস্ত্ৰ আৰু গোলাবাৰুদৰ বিশাল ভাণ্ডাৰ ধ্বংস কৰাৰ দাবী কৰি আটাউল্লাহে নিজৰ এক্স হেণ্ডেলত লিখিছে, ‘পাকিস্তানে সদায় শান্তি বজাই ৰাখিব বিচাৰে। কিন্তু দেশৰ নাগৰিকৰ নিৰাপত্তাৰ ক্ষেত্ৰত আমি আপোচ নকৰো।’ তেওঁ লগতে দাবী কৰে যে বিমান আক্ৰমণত কেৱল তেহৰিক-ই-তালিবান পাকিস্তানৰ ঘাটিকহে লক্ষ্য কৰি লোৱা হৈছিল। অৱশ্যে এই সন্দৰ্ভত এতিয়ালৈকে আফগান তালিবান চৰকাৰে মুখ খোলা নাই।
বিগত কেইমাহমানৰ ভিতৰত পাকিস্তানী আৰক্ষী আৰু সেনাবাহিনীৰ ওপৰত কেইবাটাও উগ্ৰপন্থী আক্ৰমণ সংঘটিত হৈছে। শ্বেহবাজ চৰকাৰে দাবী কৰিছে যে এইবোৰৰ আঁৰত আছে তেহৰিক-ই-তালিবান পাকিস্তান। যদিও টিটিপি তালিবানৰ পৰা পৃথক, তথাপিও তেওঁলোকৰ মাজত ঘনিষ্ঠ সম্পৰ্ক থকাৰ অভিযোগ উত্থাপন হৈছে। ২০২১ চনত আফগানিস্তানত তালিবানে পুনৰ ক্ষমতালৈ অহাৰ পিছত সীমান্ত অঞ্চলত উগ্ৰপন্থী কাৰ্যকলাপ বৃদ্ধি পোৱা বুলিও পাকিস্তানে দাবী কৰিছে। আফগানৰ তালিবান চৰকাৰে টিটিপি উগ্ৰপন্থীক আশ্ৰয় দিয়াৰ অভিযোগ উত্থাপন কৰিছে পাকিস্তানে। অৱশ্যে কাবুলে এই অভিযোগ সদায় অস্বীকাৰ কৰি আহিছে।
ইপিনে শনিবাৰে কৰাচীৰ গুলিস্তান-ই-জৌহাৰ অঞ্চলত থকা সিন্ধ ৰেঞ্জাৰ্ছৰ ভিত্তাই-ই- উইংৰ মুখ্য কাৰ্যালয়ত উগ্ৰপন্থীয়ে আক্ৰমণ কৰে। প্ৰথমে বিস্ফোৰণ ঘটাই নিৰাপত্তা বলয় ভাঙিবলৈ চেষ্টা কৰিছিল। ইয়াৰ পিছত নিৰ্বিচাৰ গুলীচালনা আৰম্ভ হয়। এই আক্ৰমণত চাৰিজন পাকিস্তানী সেনা নিহত হয়। পাকিস্তানে অভিযোগ কৰিছিল যে এই আক্ৰমণৰ আঁৰতো টিটিপি আছে।
