চলিত বিশ্বকাপত কেপ ভাৰ্ডে ইতিহাস ৰচনা কৰি নকআউট পৰ্যায়ত প্ৰৱেশ কৰিছে। কিন্তু ৪ জুলাইৰ পুৱা লিয়নেল মেছিৰ আৰ্জেণ্টিনাৰ বিৰুদ্ধে অন্তিম ৩২ৰ হাই ভল্টেজ মেচৰ পূৰ্বে সৃষ্টি হৈছে বিতৰ্কৰ। ব্ৰাজিলৰ সংবাদ মাধ্যম ‘গ্ল’ব’’ৰ এক প্ৰতিবেদন অনুসৰি কেপ ভাৰ্ডেৰ অধিনায়ক ৰিয়ান মেণ্ডেছ ধৰ্ষণৰ অভিযোগৰ সৈতে জড়িত হৈ পৰিছে।
ইতিমধ্যে দলটোৰ এই ফৰৱাৰ্ডজনৰ বিৰুদ্ধে তদন্ত আৰম্ভ কৰা হৈছে। অভিযোগ অনুসৰি যোৱা মাৰ্চ মাহত নিউজিলেণ্ডত অনুষ্ঠিত ফিফাৰ ছিৰিজৰ সময়ত মেণ্ডেছে দলটোৰ এগৰাকী অনুবাদকক যৌন নিৰ্যাতন চলাইছিল।
এই বিশ্বকাপত কেপ ভাৰ্ডেৰ তিনিওখন গ্ৰুপ মেচতে মেণ্ডেছ খেলপথাৰত আছিল। এগৰাকী গুৰুত্বপূৰ্ণ খেলুৱৈৰ বিৰুদ্ধে এনে গুৰুতৰ অভিযোগে প্ৰতিযোগিতাখনৰ এটা চমক দিয়া দলটোৰ বাবে ডাঙৰ বিপৰ্যয়ৰ সৃষ্টি কৰিছে। যিহেতু ফৰেনছিক বিশ্লেষণকে ধৰি সমগ্ৰ তদন্ত এতিয়াও চলি আছে, গতিকে মেণ্ডেছৰ বিৰুদ্ধে অপৰাধমূলক অভিযোগ দাখিল কৰিব নে নকৰে সেই সন্দৰ্ভত এতিয়াও কোনো চূড়ান্ত সিদ্ধান্ত লোৱা হোৱা নাই।
গ্ল’ব’ৰ প্ৰতিবেদন অনুসৰি অভিযোগকাৰী এগৰাকী ব্ৰাজিলৰ মহিলা। মাৰ্চ মাহত নিউজিলেণ্ডত অনুষ্ঠিত হোৱা প্ৰতিযোগিতাখনৰ সময়ত তেওঁ কেপ ভাৰ্ডে জাতীয় দলৰ অনুবাদক হিচাপে কাম কৰি আছিল। অভিযোগ অনুসৰি দলটোৱে থকা অকলেণ্ড হোটেলখনৰ তেওঁৰ কোঠাত জোৰকৈ সোমাইছিল মেণ্ডেছে। ইয়াৰ পিছতে মেণ্ডেছে তেওঁক শাৰীৰিক আৰু যৌন নিৰ্যাতন চলায়।
মহিলাগৰাকীয়ে খৰধৰকৈ স্থানীয় আৰক্ষীক খবৰ দিয়ে, যিয়ে তেওঁৰ চিকিৎসা পৰীক্ষা কৰে। গ্ল’ব’ৰ প্ৰতিবেদন অনুসৰি পৰীক্ষাত মহিলাগৰাকীৰ শৰীৰত একাধিক আঘাত পোৱা গৈছে। যৌনাংগৰ আঘাতৰ উপৰিও তেওঁৰ স্তন, ডিঙি আৰু ওঁঠতো দাগ আছিল। মহিলাগৰাকীয়ে নিউজিলেণ্ড আৰক্ষী আৰু গ্ল’ব’ক আঘাতৰ ফটো প্ৰদান কৰে।
ইয়াতেই শেষ নহয়, প্ৰতিবেদনত লগতে দাবী কৰা হৈছে যে অভিযোগকাৰীয়ে কেপ ভাৰ্ডে ফুটবল দলৰ সৈতে জড়িত তিনিজন বিষয়াকো এই বিষয়ে অৱগত কৰিছিল। কিন্তু তেওঁলোকৰ পৰা তেওঁ কোনো সঁহাৰি বা সহায় নাপালে।
ইমান ডাঙৰ অভিযোগ পোহৰলৈ অহাৰ পিছতো কেপ ভাৰ্ডে ফুটবল প্ৰশাসনে এতিয়ালৈকে মৌনতা অৱলম্বন কৰিছে। মুকলিকৈ এটা শব্দও উচ্চাৰণ কৰা নাই। আমেৰিকাৰ সংবাদ মাধ্যম ‘ইউ এছ এ টুডে’ৰ বাতৰি অনুসৰি এই সন্দৰ্ভত জাতীয় দলটোৰ মন্তব্য বিচৰা হৈছিল। তেওঁলোকে ইয়াৰ প্ৰতি কোনো সঁহাৰি নিদিলে। অৱশ্যে ফুটবলৰ সৰ্বোচ্চ শাসকীয় সংস্থা ফিফা কঠোৰ।
ইউ এছ এ টুডেত প্ৰকাশিত ফিফাৰ বিবৃতিত কোৱা হৈছে যে তেওঁলোকে ‘যিকোনো ধৰণৰ অসৎ আচৰণ’ক অতি গুৰুত্বসহকাৰে লয়। ইয়াৰ উপৰিও ফিফাই নিশ্চিত কৰিছে যে তেওঁলোকে নিউজিলেণ্ডৰ স্থানীয় প্ৰশাসনৰ সৈতে নিয়মীয়াকৈ যোগাযোগ কৰি আছে। অৱশ্যে ইয়াৰ বাহিৰেও এই তদন্ত সন্দৰ্ভত তেওঁলোকে কোনো মন্তব্য দিয়া নাই। দলটোৱে মুখ বন্ধ ৰাখিলেও ফিফাৰ পোনপটীয়া বাৰ্তাটো হ’ল: তেওঁলোকে সমগ্ৰ পৰিস্থিতিৰ ওপৰত তীক্ষ্ণ দৃষ্টি ৰাখিছে।
অফ-ফিল্ড বিতৰ্কক একাষৰীয়া কৰি ৰাখিলে চলিত বিশ্বকাপত কেপ ভাৰ্ডেৰ প্ৰদৰ্শন আচৰিত। এই সৰু দ্বীপ ৰাষ্ট্ৰখন প্ৰাক্তন বিশ্ব চেম্পিয়ন স্পেইন আৰু উৰুগুৱেৰ দৰে শক্তিশালী দলৰ সৈতে একেটা গ্ৰুপতে আছিল। তথাপিও নিৰুৎসাহিত নোহোৱাকৈয়ে অভিজ্ঞ গ’লৰক্ষক ভোজিনহাৰ নেতৃত্বত তেওঁলোকে নিজৰ সামৰ্থ্যৰ বাহিৰত চকু কপালত তুলিব পৰা ফুটবল খেলিছে।
সমগ্ৰ গ্ৰুপ পৰ্যায়ত এখনো মেচত পৰাস্ত নোহোৱাকৈয়ে কেপ ভাৰ্ডে নকআউট পৰ্যায়ত প্ৰৱেশ কৰে। অহা ৪ জুলাইত, ভাৰতীয় সময় অনুসৰি পুৱা ৩:৩০ বজাত অনুষ্ঠিত হ’ব প্ৰি কোৱাৰ্টাৰ ফাইনেল খেলখন। সন্মুখত লিয়নেল মেছিৰ আৰ্জেণ্টিনা।
এনে ঐতিহাসিক খেলৰ আগতে দলৰ অধিনায়কৰ বিৰুদ্ধে উত্থাপিত গুৰুতৰ অভিযোগে সেই অভিলেখত ডাঙৰ দাগ পেলাইছে। এই দ্বিধাদ্বন্দ্ব চম্ভালি আৰ্জেণ্টিনাৰ বিৰুদ্ধে খেলপথাৰত নামি কেপ ভাৰ্ডে নিজৰ সপোনৰ দৌৰ অব্যাহত ৰাখিব পাৰিবনে সেয়া লক্ষ্যণীয় হ’ব?
