দক্ষিণ আমেৰিকাৰ ৰাষ্ট্ৰ ভেনিজুৱেলাত যোৱা মে‘ মাহত ৰহস্যজনকভাৱে মৃত্যু হোৱা এজন ৩৩ বছৰীয়া ভাৰতীয় নাৱিকৰ মৃতদেহ স্বগৃহলৈ ওভতাই অনাৰ পিছতে এক চাঞ্চল্যকৰ তথ্য পোহৰলৈ আহিছে। উত্তৰ প্ৰদেশৰ দেওৰিয়া জিলাৰ ৰাকেশ চৌহান নামৰ নাৱিকজনৰ মৃতদেহৰ পৰা মগজু, হৃদযন্ত্ৰ আৰু হাওঁফাওঁকে ধৰি একাধিক গুৰুত্বপূৰ্ণ আভ্যন্তৰীণ অংগ সন্ধানহীন হৈ থকাৰ গুৰুতৰ অভিযোগ উত্থাপন হৈছে। এন ডি টি ভিৰ এক প্ৰতিবেদন অনুসৰি, ভেনিজুৱেলাৰ কৰ্তৃপক্ষই কোনো মৰণোত্তৰ পৰীক্ষাৰ প্ৰতিবেদন প্ৰদান নকৰাকৈ মৃতদেহটো ভাৰতলৈ প্ৰেৰণ কৰাৰ পিছত পৰিয়ালৰ লোকে ন্যায়ৰ দাবীত তদন্তৰ আহ্বান জনাইছে।
ৰাকেশ চৌহানে যোৱা ২০২৫ চনৰ নৱেম্বৰ মাহত এক্সফিনিটী নামৰ এটা কোম্পানীৰ জৰিয়তে মাৰ্চেণ্ট নেভীৰ জাহাজৰ কৰ্মচাৰী হিচাপে ভেনিজুৱেলালৈ গৈছিল। পৰিয়ালৰ ভাষ্য অনুসৰি, কোম্পানীটোৱে প্ৰথমতে তেওঁলোকক টেলিফোনযোগে জনাইছিল যে ৰাকেশে জাহাজত পৰি আঘাতপ্ৰাপ্ত হৈ চিকিৎসাধীন হৈ আছে। পৰৱৰ্তী সময়ত তেওঁৰ জীয়াই থকাৰ সম্ভাৱনা ক্ষীণ বুলি জানিবলৈ দিয়াৰ পিছত সন্ধিয়ালৈ তেওঁৰ মৃত্যু হোৱা বুলি নিশ্চিত কৰে। কোম্পানীটোৱে এমাহৰ ভিতৰত মৃতদেহ ঘূৰাই অনাৰ প্ৰতিশ্ৰুতি দিছিল যদিও যোৱা চাৰি জুনতহে মৃতদেহটো দেওৰিয়াত উপস্থিত হয়।
মৃতদেহটো স্বগৃহলৈ অনাৰ পিছত জিলা দণ্ডাধীশৰ নিৰ্দেশত দেওৰিয়াত পুনৰ মৰণোত্তৰ পৰীক্ষা সম্পন্ন কৰা হয়। এই পৰীক্ষাৰ প্ৰতিবেদনত পোহৰলৈ আহে যে মৃতদেহটোৰ পৰা মগজু, হৃদযন্ত্ৰ, দুয়োটা হাওঁফাওঁ, যকৃৎ, বৃক্ক, প্লীহা, অগ্ন্যাশয়, পাকস্থলী আৰু অন্ত্রকে ধৰি প্ৰায় সকলোবোৰ আভ্যন্তৰীণ অংগ কাঢ়ি নিয়া হৈছে। মৰণোত্তৰ পৰীক্ষাৰ প্ৰতিবেদনত লগতে প্ৰকাশ পাইছে যে, মৃতদেহটোত পূৰ্বেই কৰা অসংখ্য চিলাইৰ দাগ আছিল। ডিঙিৰ পৰা তলপেটলৈকে ২২টা আৰু এখন কাণৰ পৰা আনখন কাণলৈকে ২১টা চিলাই কৰা হৈছিল। মৃত্যুৰ পূৰ্বে তেওঁ কোনো আঘাত পোৱাৰ চিন শৰীৰত নাছিল। প্ৰায় এমাহ ধৰি ডীপ ফ্ৰীজত সংৰক্ষণ কৰি ৰখা মৃতদেহটোৰ সকলো প্ৰধান অংগ কাঢ়ি নিয়াৰ ফলত মৃত্যুৰ প্ৰকৃত কাৰণ নিশ্চিত কৰাটো অসম্ভৱ হৈ পৰিছে।
এই সমগ্ৰ ঘটনাক লৈ ফেদাৰেচন অৱ ছীফেয়াৰাৰ্ছ ইউনিয়ন্স অৱ ইণ্ডিয়াই (এফ এছ ইউ আই) তীব্ৰ প্ৰতিক্ৰিয়া প্ৰকাশ কৰিছে। যোৱা ত্ৰিশ জুনত সামাজিক মাধ্যম এক্সত এটা পোষ্টযোগে সংগঠনটোৱে কয় যে ভাৰতীয় শ্ৰমিকসকলক বিদেশত বলীৰ পঠা সজোৱা হৈছে আৰু এইটো কোনো কাৰণতে গ্ৰহণযোগ্য নহয়। সাধাৰণতে প্ৰথমটো মৰণোত্তৰ পৰীক্ষাত পৰীক্ষণৰ বাবে কিছু অংগ ৰাখি থোৱা হয় যদিও ভেনিজুৱেলাৰ কৰ্তৃপক্ষ বা কোম্পানীটোৱে এই সন্দৰ্ভত কোনো স্পষ্টীকৰণ বা প্ৰতিবেদন নিদিয়াটোৱে সন্দেহৰ অৱকাশ বৃদ্ধি কৰিছে।
বৰ্তমান এই ঘটনাক কেন্দ্ৰ কৰি ৰাষ্ট্ৰীয় পৰ্যায়ত প্ৰতিক্ৰিয়াৰ সৃষ্টি হৈছে। নাৱিক সংগঠনটোৱে ভেনিজুৱেলাৰ কৰ্তৃপক্ষৰ পৰা উত্তৰদায়ীত্ব দাবী কৰাৰ লগতে ভেনিজুৱেলাত থকা ভাৰতীয় দূতাবাসৰ তাৎক্ষণিক হস্তক্ষেপ বিচাৰিছে। আনহাতে মৃতকৰ পিতৃ ৰাম দেৱ চৌহানে ভাৰত চৰকাৰক কোম্পানীটোৰ বিৰুদ্ধে কঠোৰ ব্যৱস্থা গ্ৰহণ কৰিবলৈ আহ্বান জনাইছে। চৰকাৰী পৰ্যায়ত এই সন্দৰ্ভত কি আনুষ্ঠানিক পদক্ষেপ গ্ৰহণ কৰা হয় আৰু কূটনৈতিক স্তৰত ভেনিজুৱেলাৰ পৰা কেনে সঁহাৰি পোৱা যায়, সেয়া পৰৱৰ্তী সময়তহে স্পষ্ট হ‘ব।
