শুকুৰবাৰে ৰাজ্যৰ বিত্তমন্ত্ৰী জয়ন্ত মল্ল বৰুৱাই চলিত বৰ্ষৰ আগষ্টৰ পৰা নিজুত মইনা আৰু নিজুত বাবুকে ধৰি গুৰুত্বপূৰ্ণ কল্যাণমূলক আঁচনি পুনৰ আৰম্ভ কৰাৰ কথা ঘোষণা কৰে।
২০২৬–২৭ বৰ্ষৰ ৰাজ্যিক বাজেট দাখিল কৰি বৰুৱাই কয় যে এই আঁচনিসমূহৰ অধীনত এই পৰ্যন্ত মুঠ ৫,৪৪,৪৭৯ গৰাকী ছাত্ৰী উপকৃত হৈছে, ইতিমধ্যে ৩৭৪ কোটি টকাৰ আৰ্থিক সাহায্য বিতৰণ কৰা হৈছে। তেওঁ লগতে কয় যে চলিত বিত্তীয় বৰ্ষত প্ৰায় ৫,৩০,৭১৮ গৰাকী ছাত্ৰ-ছাত্ৰীয়ে আঁচনিসমূহৰ দ্বাৰা উপকৃত হোৱাৰ সম্ভাৱনা আছে।
ড০ বাণীকান্ত কাকতি মেধাৱী বঁটা সন্দৰ্ভতো এক উল্লেখযোগ্য ঘোষণা কৰে বিত্তমন্ত্ৰীগৰাকীয়ে। তেওঁ কয় যে এই আঁচনিৰ অধীনত এইবাৰ প্ৰায় ১৮ হাজাৰ ছাত্ৰ-ছাত্ৰীয়ে স্কুটাৰ লাভ কৰিব। অৱশ্যে পৰৱৰ্তী শিক্ষাবৰ্ষৰ পৰা শৈক্ষিক সাহায্য অধিক সুষম আৰু বিস্তৃত হোৱাটো নিশ্চিত কৰিবলৈ স্কুটি বিতৰণ কাৰ্যসূচী বন্ধ কৰা হ’ব।
বৰুৱাই কয় যে স্কুটি বিতৰণৰ বাবে আবণ্টিত ধনৰ পৰিৱৰ্তে নিজুত মইনা আৰু নিজুত বাবু আঁচনি শক্তিশালী আৰু সম্প্ৰসাৰণৰ বাবে ব্যৱহাৰ কৰা হ’ব যাতে অধিক যোগ্য ছাত্ৰ-ছাত্ৰীয়ে আৰ্থিক সাহায্য লাভ কৰিব পাৰে।
আন এক ঘোষণাত চৰকাৰে আগষ্টৰ পৰা সত্ৰানুষ্ঠানৰ সৈতে জড়িত ৬২১গৰাকী উদাসীন ভকতলৈ ১৫০০ টকাৰ মাহিলী আৰ্থিক সাহায্য পুনৰ আৰম্ভ কৰিব।
বিত্তমন্ত্ৰীগৰাকীয়ে লগতে কয় যে মুখ্যমন্ত্ৰী কৃষি সা-সঁজুলি যোজনাৰ অধীনত কৃষকৰ প্ৰতি সমৰ্থন অব্যাহত থাকিব। এই পদক্ষেপৰ অধীনত যোগ্য ক্ষুদ্ৰ আৰু প্ৰান্তীয় কৃষকসকলে পি এম-কিষান আঁচনিৰ লগত সংগতি ৰাখি বছৰি ১১ হাজাৰ টকাৰ আৰ্থিক সাহায্য লাভ কৰিব।
