মধ্যপ্ৰদেশৰ শিৱপুৰী জিলাৰ ঐতিহাসিক নৰৱাৰ দুৰ্গৰ পৰা প্ৰায় ৪০০ বছৰ পুৰণি এটা বৰটোপ চুৰি হোৱাৰ খবৰ পোহৰলৈ আহিছে। শুকুৰবাৰে আৰক্ষীৰ এগৰাকী বিষয়াই এই কথা প্ৰকাশ কৰে। বুধবাৰে আৰু বৃহস্পতিবাৰে নিশাৰ ভিতৰত এই ঘটনা সংঘটিত হোৱা বুলি সন্দেহ কৰা হৈছে। প্ৰাথমিক তদন্তৰ পৰা জানিব পৰা গৈছে যে কিছুমান লোকে এখন বাহন লৈ দুৰ্গটোৰ পিছফালে গৈ তাত থকা বৰটোপটো চুৰি কৰি লৈ যায়। কাৰেৰাৰ উপ-আৰক্ষী অধীক্ষক প্ৰশান্ত শৰ্মাই কয় যে খবৰ পোৱাৰ পিছতেই আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰে।
আৰক্ষীয়ে এই ঘটনাত কোনো আন্তঃৰাজ্যিক বা আন্তঃৰাষ্ট্ৰীয় চোৰাং সৰবৰাহকাৰী চক্ৰ জড়িত থাকিব পাৰে নেকি, সেই সকলো দিশ পৰীক্ষা কৰি আছে। প্ৰাথমিক তথ্য অনুসৰি, কেইদিনমানৰ আগতে বৰটোপটো তাৰ নিৰ্দিষ্ট ঠাইৰ পৰা পৰি গৈছিল, কিন্তু তাক নিৰাপদে ৰখাৰ কোনো ব্যৱস্থা কৰা হোৱা নাছিল। ৰাজ্যিক প্ৰত্নতত্ত্ব বিভাগৰ উপ-সঞ্চালক তৰুণ কুমাৰ শ্ৰীবাস্তৱে এই সমগ্ৰ বিষয়টোক অতি গুৰুতৰ বুলি উল্লেখ কৰিছে। তেওঁ জানিবলৈ দিয়ে যে ঐতিহাসিক স্থানটোৰ নিৰাপত্তা ব্যৱস্থা পৰীক্ষা কৰিবলৈ তেওঁ অতি সোনকালেই নৰৱাৰ দুৰ্গলৈ যাব।
বিষয়াসকলে জনোৱা মতে, দশম শতিকাত কচ্ছৱাহা ৰাজপুতসকলে পুনৰ নিৰ্মাণ কৰা এই দুৰ্গটোত মুঠ ১৪টা ঐতিহাসিক বৰটোপ আছিল। কিন্তু এই চুৰিকাৰ্যৰ পিছত এতিয়া তাত মাত্ৰ ১৩টা বৰটোপহে বাকী আছে। বৰ্তমান আৰক্ষীয়ে ওচৰ-পাজৰৰ অঞ্চলৰ চিচিটিভি ফুটেজ, চোৰে ব্যৱহাৰ কৰিব পৰা পথ আৰু অন্যান্য প্ৰযুক্তিগত প্ৰমাণসমূহ চালি-জাৰি চাই আছে।
