চিকিৎসালয়ত এতিয়াও অনশন অব্যাহত ৰাখিছে শিক্ষাবিদ তথা সমাজকৰ্মী সোণম ৱাংচুকে। আনহাতে যন্তৰ মন্তৰ এৰিবলৈ কোনো পধ্যে সন্মত নহয় ককৰোচ জনতা পাৰ্টি বা চিজেপি। বুধবাৰে পুৱাৰে পৰাই যন্তৰ মন্তৰত প্ৰতিবাদকাৰীৰ ভিৰ বাঢ়িবলৈ ধৰিছে। তেওঁলোকৰ এতিয়া এটাই দাবী, কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ তৎকালীন পদত্যাগ। কেৱল ভাৰততে নহয়, এই আন্দোলনৰ প্ৰভাৱ এতিয়া নিউয়ৰ্ক আৰু লণ্ডনলৈকো বিয়পি পৰিছে। ৱাংচুকৰ সমৰ্থনত এই দুখন চহৰতো তীব্ৰ প্ৰতিবাদ সাব্যস্ত কৰা হৈছে। ইপিনে বিজেপি বিৰোধী মিত্ৰজোঁটেও ৰাজপথলৈ ওলাই আহিছে। দিল্লীত ছাত্ৰ-যুৱকৰ সমদলত লাঠীচালনা আৰু কন্দুৱা গেছ নিক্ষেপ কৰি আৰক্ষীয়ে চলোৱা আক্ৰমণৰ প্ৰতিবাদত মঙলবাৰে প্ৰধানমন্ত্ৰী নৰেন্দ্ৰ মোদীৰ বাসভৱনৰ সন্মুখত ধৰ্ণা দিয়ে কংগ্ৰেছ নেতা ৰাহুল গান্ধীয়ে। আৰক্ষীৰ জিম্মাত আটক হৈ থকা অৱস্থাত তেওঁ চৰকাৰৰ ওচৰত পাঁচ দফীয়া দাবীও উত্থাপন কৰে। এই প্ৰতিবাদ চৰকাৰৰ বাবে আউট অৱ চিলেবাছ বুলি কটাক্ষ কৰিছে তৃণমূল কংগ্ৰেছৰ সাংসদ মহুৱা মৈত্ৰই।
নিট কেলেংকাৰীৰ পৰিপ্ৰেক্ষিতত আৰম্ভ হোৱা এই আন্দোলন এতিয়া এক অন্য পৰ্যায় পাইছেগৈ। দেশৰ বাহিৰতো এই আন্দোলন বিয়পিবলৈ ধৰিছে। সংবাদ সংস্থা পিটিআইৰ সূত্ৰ অনুসৰি, অনশনৰত ৱাংচুকৰ প্ৰতি সমৰ্থন জনাই আমেৰিকাৰ এটা এডভকেচি গ্ৰুপৰ সদস্যসকলে নিউয়ৰ্ক আৰু ছান হোছে চহৰত প্ৰতিবাদ সাব্যস্ত কৰে। হিন্দুজ ফৰ হিউমেন ৰাইটছ নামৰ এই গ্ৰুপটোৰ সদস্যসকলে নিউয়ৰ্কৰ ইউনিয়ন স্কোৱাৰ আৰু ছান হোছে চহৰত মহাত্মা গান্ধীৰ মূৰ্তিৰ সন্মুখত সমবেত হয়। সেই সমাৱেশৰ পৰাই শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবী উত্থাপন হয়। কেৱল নিউয়ৰ্ক বা ছান হোছেতেই নহয়, লণ্ডন আৰু ডাবলিনতো একেদৰেই প্ৰতিবাদ সাব্যস্ত কৰিছে গ্ৰুপটোৰ সদস্যসকলে।
নিটৰ প্ৰশ্নকাকত ফাদিলৰ প্ৰতিবাদত সোমবাৰে চিজেপিৰ সংসদ অভিযানক কেন্দ্ৰ কৰি উত্তপ্ত হৈ পৰিছিল দিল্লী। আৰক্ষীৰ লাঠী আৰু কন্দুৱা গেছৰ বাধা নেওচি সোমবাৰে দুপৰীয়া সংসদ ভৱনৰ কাষ পাইছিলগৈ প্ৰতিবাদকাৰীসকল। অৱশ্যে শেষ পৰ্যন্ত তেওঁলোকে সংসদত উপস্থিত হ’ব নোৱাৰিলে। চিজেপি আৰু বিৰোধী নেতাসকলৰ অভিযোগ যে শান্তিপূৰ্ণ আন্দোলনত আৰক্ষীয়ে দমনমূলক আচৰণ কৰিছে। সেই আচৰণৰ প্ৰতিবাদত মঙলবাৰে ৰাজপথলৈ ওলাই আহে ৰাহুল গান্ধী, প্ৰিয়ংকা গান্ধী আৰু উদ্ধৱ থাকৰে। মঙলবাৰে মোদীৰ বাসভৱনৰ সন্মুখত কংগ্ৰেছৰ প্ৰতিবাদ, তাৰ পিছত ৰাহুলহঁতক আটক কৰি থানালৈ লৈ যোৱা আৰু নিশা আৰক্ষীক লক্ষ্য কৰি যন্তৰ মন্তৰত ইটা-শিল নিক্ষেপ কৰাৰ অভিযোগক কেন্দ্ৰ কৰি উত্তেজনা বহুগুণে বৃদ্ধি পায়।
এই পৰিৱেশৰ মাজতে লোকসভাৰ বিৰোধী দলপতি ৰাহুল গান্ধীয়ে কেন্দ্ৰৰ ওচৰত পাঁচ দফীয়া দাবী জনাইছে। আটক হৈ থকাৰ সময়তে ৰাহুলে এটা ভিডিঅ’ পোষ্ট কৰে। কেৱল ধৰ্মেন্দ্ৰ প্ৰধানেই নহয়, কেন্দ্ৰীয় গৃহমন্ত্ৰী অমিত শ্বাহৰো পদত্যাগৰ দাবী জনাইছে কংগ্ৰেছ নেতাজনে। ইয়াৰ উপৰিও তেওঁৰ দাবী যে সোমবাৰে প্ৰতিবাদকাৰীৰ ওপৰত আক্ৰমণ চলোৱা আৰক্ষীৰ বিৰুদ্ধে ব্যৱস্থা গ্ৰহণ কৰিব লাগিব আৰু শিক্ষাৰ্থীসকলৰ বিৰুদ্ধে ৰুজু হোৱা এফআইআৰ প্ৰত্যাহাৰ কৰিব লাগিব। লগতে আৰক্ষীৰ অত্যাচাৰৰ দায়িত্ব স্বীকাৰ কৰি মোদী চৰকাৰে ক্ষমা বিচৰা, সংসদত শ্বাহৰ বিবৃতি আৰু কেন্দ্ৰীয় শিক্ষানীতিক লৈ সংসদৰ বৰ্ষাকালীন অধিৱেশনত আলোচনাৰ দাবী জনায় কংগ্ৰেছ নেতৃত্বই। ২১ জুলাইৰ মঞ্চৰ পৰা ককৰোচসকলৰ কাষত থিয় দিয়াৰ কথা কৈছিল তৃণমূল নেত্ৰী মমতা বেনাৰ্জীয়ে। তাৰ পিছদিনাই ছাত্ৰ-যুৱকৰ সমদলত আৰক্ষীৰ আক্ৰমণৰ সন্দৰ্ভত আলোচনা বিচাৰি ৰাজ্যসভাত জাননী দিয়ে তৃণমূলৰ মুখ্য সচেতক নাদিমুল হকে।
প্ৰথমৰে পৰাই চিজেপিৰ আন্দোলনৰ কাষত থিয় দিছে তৃণমূল সাংসদ মহুৱা মৈত্ৰ। যন্তৰ মন্তৰলৈ গৈ তেওঁ ৱাংচুকক সাক্ষাৎ কৰি আহিছিল। মঙলবাৰেও তেওঁক দিল্লীৰ ৰাজপথৰ প্ৰতিবাদত অংশগ্ৰহণ কৰা দেখা গৈছিল। বুধবাৰে পুৱা নিজৰ ছচিয়েল মিডিয়াত এটা ভিডিঅ’ বাৰ্তা পোষ্ট কৰে মহুৱাই। সাংসদগৰাকীৰ মতে, চৰকাৰে যিমানেই চেষ্টা নকৰক কিয়, প্ৰতিবাদকাৰীসকলে যন্তৰ মন্তৰ এৰি নাযায়। এই প্ৰতিবাদ চৰকাৰৰ বাবে আউট অৱ চিলেবাছ বুলিও কটাক্ষ কৰে মহুৱাই। তেওঁৰ দাবী, মোদী আৰু শ্বাহে নাজানে কেনেকৈ পৰিস্থিতি নিয়ন্ত্ৰণ কৰিব লাগে, তেওঁলোকে কেৱল ভয় খোৱা লোকসকলকহে নিয়ন্ত্ৰণ কৰিবলৈ জানে। আনহাতে, চিজেপিৰ প্ৰধান মুখপাত্ৰ সৌৰভ দাসে দাবী কৰিছে যে তেওঁৰ হোৱাটছএপ একাউণ্ট ব্লক কৰা হৈছে। তেওঁৰ প্ৰশ্ন, মেটাই চিজেপিৰ একাউণ্ট বন্ধ কৰিব পাৰিবনে?
