অসমৰ ষ্টেট কেন্সাৰ ইনষ্টিটিউট, গুৱাহাটীত চিকিৎসা গ্ৰহণ কৰি থকা ৰোগীসকলে এতিয়াৰে পৰা ৰোগ নিৰ্ণয়ৰ পৰীক্ষা আৰু চিকিৎসালয়ৰ সেৱাৰ বাবে অধিক ধন ভৰিব লাগিব। যোৱা ২২ জুলাইৰ পৰা প্ৰতিষ্ঠানটোত কাৰ্যকৰী হোৱা নতুন মাচুল গাঁথনিৰ ফলত কৰ্কট ৰোগী আৰু তেওঁলোকৰ পৰিয়ালৰ মাজত অতিৰিক্ত আৰ্থিক বোজাক লৈ গভীৰ উদ্বেগৰ সৃষ্টি হৈছে।
নতুন নিৰিখ অনুসৰি চিকিৎসালয়ৰ কেইবাটাও অত্যাৱশ্যকীয় চিকিৎসা প্ৰক্ৰিয়া আৰু পৰীক্ষাৰ মাচুল অস্বাভাৱিকভাৱে বৃদ্ধি পাইছে। সংশোধিত গাঁথনিৰ অধীনত চিকিৎসালয়ৰ এখন বিচনাৰ দৈনিক ভাড়া আঠগুণলৈকে বৃদ্ধি হৈছে। পূৰ্বৰ ২০০ টকাৰ পৰিৱৰ্তে ৰোগীয়ে এতিয়া প্ৰতিদিনে ১৬০০ টকা পৰিশোধ কৰিব লাগিব। একেদৰে চাইট’লজী পৰীক্ষাৰ মাচুল ৫০ টকাৰ পৰা ৬৩০ টকালৈ বৃদ্ধি কৰা হৈছে। কৰ্কট ৰোগ নিৰ্ণয়ৰ বাবে অত্যন্ত গুৰুত্বপূৰ্ণ বায়’প্সী পৰীক্ষাৰ বাবে পূৰ্বৰ ১০০০ টকাৰ ঠাইত এতিয়া ২৭০০ টকা নিৰ্ধাৰণ কৰা হৈছে। ইয়াৰ উপৰি তেজৰ বিভিন্ন পৰীক্ষাৰ মাচুল প্ৰায় ৬০ শতাংশলৈকে বৃদ্ধি পাইছে।
চিকিৎসকসকলক কৰ্কট ৰোগৰ অৱস্থা নিৰ্ণয় কৰাত সহায় কৰা পৰীক্ষাসমূহৰ ক্ষেত্ৰতো এই সংশোধিত নিৰিখ প্ৰযোজ্য হৈছে। পূৰ্বে ৯০০ টকাত উপলব্ধ এই পৰীক্ষাৰ মাচুল এতিয়া ২০০০ টকালৈ বৃদ্ধি কৰা হৈছে। ইয়াৰ সমান্তৰালকৈ প্ৰতিষ্ঠানটোত বিনামূলীয়া ঔষধ যোগান বন্ধ হোৱা বুলি প্ৰকাশ পোৱা খবৰে পৰিস্থিতি অধিক জটিল কৰি তুলিছে। যিসকল ৰোগী পূৰ্বে চৰকাৰীভাৱে যোগান ধৰা ঔষধৰ ওপৰত নিৰ্ভৰশীল আছিল, তেওঁলোকে এতিয়া চিকিৎসাৰ সময়ত অতিৰিক্ত ব্যয়ৰ সন্মুখীন হ’বলগীয়া হৈছে।
যোৱা ২২ জুলাইৰ পৰা আনুষ্ঠানিকভাৱে বলৱৎ হোৱা এই নতুন মাচুল গাঁথনি প্ৰতিষ্ঠানটোত প্ৰদান কৰা বিভিন্ন পৰীক্ষা আৰু সেৱাৰ ক্ষেত্ৰত প্ৰযোজ্য হৈছে। অত্যাৱশ্যকীয় চিকিৎসা সেৱাৰ অস্বাভাৱিক মূল্যবৃদ্ধিয়ে সাধাৰণ আৰু দৰিদ্ৰ শ্ৰেণীৰ ৰোগীসকলৰ চিকিৎসা গ্ৰহণৰ ক্ষেত্ৰত এক ডাঙৰ প্ৰত্যাহ্বানৰ সৃষ্টি কৰিছে।
