আমেৰিকাৰ কেলিফৰ্ণিয়া প্ৰদেশত দুৰ্ঘটনাগ্ৰস্ত হৈছে এখন এফ-৩৫বি যুদ্ধ বিমান। শুকুৰবাৰে পুৱা ছান ডিয়েগোৰ মেৰিন কৰ্পছ এয়াৰ ষ্টেচন মিৰামাৰ সমীপত সংঘটিত হয় এই দুৰ্ঘটনা। অৱশ্যে দুৰ্ঘটনাৰ পূৰ্বে পাইলটজনে সফলতাৰে বাহিৰলৈ ওলাই আহিবলৈ সক্ষম হয় আৰু ৰক্ষা পৰে।
মেৰিন কৰ্পছ এয়াৰ ষ্টেচনৰ এগৰাকী মুখপাত্ৰই জনোৱা মতে, স্থানীয় সময় অনুসৰি পুৱা প্ৰায় ১০ বজাত বিমানখন দুৰ্ঘটনাগ্ৰস্ত হয়। শীঘ্ৰে পাইলটজনক উদ্ধাৰ কৰি চিকিৎসাৰ বাবে চিকিৎসালয়লৈ প্ৰেৰণ কৰা হয়। অৱশ্যে তেওঁ আহত হৈছে নে নাই সেই সন্দৰ্ভত সবিশেষ এতিয়াও প্ৰকাশ কৰা হোৱা নাই।
এই দুৰ্ঘটনাত আন কোনো লোক আহত হৈছে নে নাই সেয়াও এতিয়াও স্পষ্ট কৰা হোৱা নাই। আমেৰিকাৰ সেনাই এই সন্দৰ্ভত তদন্ত আৰম্ভ কৰা বুলি জানিবলৈ দিয়ে আৰু পিছত অধিক সবিশেষ প্ৰকাশ কৰা হ’ব বুলি জনায়।
ছ’চিয়েল মিডিয়াত প্ৰচাৰিত এটা ভিডিঅ’ত দুৰ্ঘটনাস্থলীৰ পৰা ডাঠ ক’লা ধোঁৱা ওলোৱা দেখা গৈছে। পিছত ঘটনাস্থলীত অগ্নিনিৰ্বাপক বাহিনীৰ লোক উপস্থিত হৈ জুই নিয়ন্ত্ৰণ কৰে।
উল্লেখ্য যে মেৰিন কৰ্পছ এয়াৰ ষ্টেচন মিৰামাৰ আমেৰিকাৰ নৌসেনাৰ কিংবদন্তি “টপ গান” প্ৰশিক্ষণ কেন্দ্ৰৰ বাবে বিশ্বজুৰি পৰিচিত। ১৯৮৬ চনত টম ক্ৰুজ অভিনীত জনপ্ৰিয় ছবি “টপ গান”ৰ জৰিয়তে এই ঘাটিটো আন্তঃৰাষ্ট্ৰীয় পৰ্যায়ত পৰিচিত হৈছিল।
প্ৰাথমিকভাৱে দুৰ্ঘটনাৰ কাৰণ জানিব পৰা হোৱা নাই। এই সন্দৰ্ভত আমেৰিকাৰ সামৰিক কৰ্তৃপক্ষই বিতং তদন্ত আৰম্ভ কৰিছে।
