শেহতীয়া বিধ্বংসী বানপানীৰ পিছত দুৰ্গতসকলৰ সাহায্য আৰু পুনৰ্সংস্থাপনৰ দাবীত সৰৱ হৈ পৰিছে ৰাজ্যৰ বিৰোধী দল আৰু বিভিন্ন দল-সংগঠন। ৰাইজৰ দলৰ বিধায়ক অখিল গগৈয়ে বানপীড়িত প্ৰতিটো পৰিয়ালক কমেও ১০ লাখ টকাকৈ ক্ষতিপূৰণ দিয়াৰ দাবী জনোৱাৰ সমান্তৰালকৈ টাই আহোম জাতীয় পৰিষদে উজনি অসমৰ বানপীড়িতৰ বাবে কেন্দ্ৰৰ পৰা ২০,০০০ কোটি টকাৰ এককালীন সাহায্য পেকেজ বিচাৰিছে। লগতে পৰিষদে আগন্তুক জাতিভিত্তিক লোকপিয়লৰ বাবেও টাই আহোম জনগোষ্ঠীৰ ৰাইজলৈ বিশেষ আহ্বান জনাইছে।
দেওবাৰে শিৱসাগৰত এখন সংবাদ মেল সম্বোধন কৰি ৰাইজৰ দলৰ বিধায়ক অখিল গগৈয়ে কয় যে ৰাজ্য চৰকাৰে শিৱসাগৰ আৰু চৰাইদেউ জিলাৰ বানপীড়িতৰ বাবে ঘোষণা কৰা ১৫,০০০ আৰু ২৫,০০০ টকাৰ সাহায্য পৰ্যাপ্ত নহয়। ঘৰ-দুৱাৰ, সা-সম্পত্তি আৰু জীৱিকা হেৰুওৱা লোকসকলৰ বাবে এই ধন একেবাৰেই নগণ্য বুলি তেওঁ কয়।
তেওঁ চৰকাৰক দাবী জনায় যে প্ৰতিটো পৰিয়ালক এককালীনভাৱে নহ’লেও পৰ্যায়ক্ৰমে কমেও ১০ লাখ টকাকৈ ক্ষতিপূৰণ দিব লাগে। “প্ৰথম অৱস্থাত পৰিয়ালবোৰক জীৱনটো পুনৰ গঢ়ি তুলিবলৈ ২ লাখ টকাকৈ দিব লাগে আৰু বাকীখিনি ধন পৰ্যায়ক্ৰমে মুকলি কৰি দিব লাগে,” গগৈয়ে কয়।
ইয়াৰ উপৰিও বিধায়কগৰাকীয়ে সাহায্য সামগ্ৰী বিতৰণত ব্যাপক অনিয়ম হোৱাৰো অভিযোগ উত্থাপন কৰে। মুখ্যমন্ত্ৰীৰ সাহায্যৰ টোপোলাত প্ৰতিটো পৰিয়ালক ৮ কিলোগ্ৰামকৈ চাউল দিয়াৰ প্ৰতিশ্ৰুতি দিয়া হৈছিল যদিও বহু হিতাধিকাৰীয়ে মাত্ৰ ৫ কিলোগ্ৰামকৈহে লাভ কৰা বুলি অভিযোগ কৰিছে। গগৈয়ে চৰকাৰক এই অমিলৰ তদন্ত কৰি বানপীড়িতক সম্পূৰ্ণ সাহায্য প্ৰদান নিশ্চিত কৰিবলৈ আহ্বান জনায়।
আনহাতে মৰাণত অনুষ্ঠিত টাই আহোম জাতীয় পৰিষদৰ বৰ্ধিত কাৰ্যনিৰ্বাহক সভাৰ অন্তত এখন সংবাদ মেল সম্বোধন কৰি সংগঠনটোৱে কেইবাটাও গুৰুত্বপূৰ্ণ প্ৰস্তাৱ গ্ৰহণ কৰে। সংগঠনটোৰ কাৰ্যকৰী সভাপতি ড° দয়ানন্দ বৰগোহাঁয়ে উজনি অসমৰ শেহতীয়া বানৰ ক্ষয়-ক্ষতি পূৰণৰ বাবে কেন্দ্ৰীয় চৰকাৰৰ পৰা ২০,০০০ কোটি টকাৰ এককালীন আৰ্থিক পেকেজৰ দাবী জনায়। বান পৰিস্থিতি আৰু ক্ষয়-ক্ষতিৰ বুজ ল’বলৈ সংগঠনটোৰ এটা কেন্দ্ৰীয় প্ৰতিনিধি দলে শীঘ্ৰেই বানপীড়িত অঞ্চলসমূহ পৰিদৰ্শন কৰিব বুলিও তেওঁ সদৰী কৰে।
আগন্তুক লোকপিয়ল সন্দৰ্ভত সংগঠনটোৱে আহোম সম্প্ৰদায়ৰ লোকসকলক নিজৰ সুকীয়া পৰিচয় বজাই ৰাখিবলৈ আহ্বান জনায়। লোকপিয়লৰ সময়ত ধৰ্মৰ কলমত “বান-ফি-ডাম” (Ban-Phi-Dam) বা “আহোম হিন্দু” বুলি লিখিবলৈ আৰু মাতৃভাষাৰ কলমত “টাই অসমীয়া” (Tai Axomiya) হিচাপে পঞ্জীয়ন কৰিবলৈ পৰিষদে অনুৰোধ জনাইছে।
এই সংবাদ মেলত পৰিষদৰ সাধাৰণ সম্পাদক অমৰজ্যোতি অৰন্ধৰা, টাই আহোম ছাত্ৰ সন্থাৰ সভাপতি মিলন বৰগোহাঁই আৰু কাৰ্যকৰী সভাপতি দেৱজিৎ গগৈও উপস্থিত থাকে।
