গুৱাহাটীৰ পৰিৱেশভিত্তিক সংগঠন ধৰিত্ৰী সুৰক্ষা মঞ্চ, অসমে অহা ৮ আগষ্ট, শনিবাৰে “উন্নয়ন আৰু বহনক্ষমতা: শেহতীয়া ধাৰা” শীৰ্ষক এক বিশেষ বক্তৃতানুষ্ঠানৰ আয়োজন কৰিছে। সন্ধিয়া ৫ বজাত গুৱাহাটীৰ বিবেকানন্দ কেন্দ্ৰ, উজানবজাৰত অনুষ্ঠিত হ’বলগীয়া এই অনুষ্ঠানত মুখ্য বক্তা হিচাপে উপস্থিত থাকিব ভাৰতৰ উচ্চতম ন্যায়ালয়ৰ ন্যায়াধীশ উজ্জ্বল ভূঞা।
অনুষ্ঠানত ন্যায়াধীশ উজ্জ্বল ভূঞাই “উন্নয়ন আৰু বহনক্ষমতা: শেহতীয়া ধাৰা” বিষয়ত মূল বক্তৃতা আগবঢ়াব। উন্নয়ন আৰু পৰিৱেশ সংৰক্ষণৰ মাজত সমতা ৰক্ষাৰ প্ৰয়োজনীয়তা, লগতে বহনক্ষম উন্নয়নৰ নতুন দিশসমূহ তেওঁ আলোচনাত সামৰি লোৱাৰ সম্ভাৱনা আছে।
ইয়াৰ উপৰিও গুৱাহাটী উচ্চ ন্যায়ালয় বাৰ এছ’চিয়েশ্যনৰ সভাপতি তথা জ্যেষ্ঠ অধিবক্তা কে. এন. চৌধুৰীয়ে “পৰিৱেশ আইন আৰু ন্যায়িক হস্তক্ষেপ” বিষয়ত বিশেষ ভাষণ প্ৰদান কৰিব। তেওঁ উন্নয়নমূলক প্ৰকল্পসমূহে সৃষ্টি কৰা বৰ্ধিত পৰিৱেশজনিত প্ৰত্যাহ্বান আৰু সাংবিধানিক তথা পৰিৱেশ আইনসমূহৰ জৰিয়তে ন্যায় ব্যৱস্থাই কেনেদৰে উন্নয়ন আৰু পৰিৱেশ সংৰক্ষণৰ মাজত ভাৰসাম্য ৰক্ষা কৰিব পাৰে, সেই বিষয়সমূহৰ ওপৰত আলোকপাত কৰিব।
ধৰিত্ৰী সুৰক্ষা মঞ্চ, অসমৰ মুখ্য আহ্বায়ক মহেশ ডেকাই কয় যে, এই বক্তৃতাৰ মূল উদ্দেশ্য হৈছে উন্নয়নৰ সৈতে পৰিৱেশগত বহনক্ষমতা নিশ্চিত কৰাৰ প্ৰত্যাহ্বানসমূহক লৈ সচেতন জনআলোচনাৰ পৰিৱেশ সৃষ্টি কৰা। এই অনুষ্ঠানত আইনী ক্ষেত্ৰৰ ব্যক্তি, পৰিৱেশবিদ, শিক্ষাবিদ, শিক্ষাৰ্থী, নীতিনিৰ্ধাৰক, নাগৰিক সমাজৰ প্ৰতিনিধি আৰু সচেতন নাগৰিকসকলক একেলগে মত-বিনিময়ৰ বাবে এক মঞ্চ প্ৰদান কৰা হ’ব।
ধৰিত্ৰী সুৰক্ষা মঞ্চ, অসমে দীৰ্ঘদিন ধৰি ৰাজ্যখনত পৰিৱেশ সজাগতা বৃদ্ধি, প্ৰাকৃতিক সম্পদ সংৰক্ষণ আৰু পৰিৱেশ সম্পৰ্কীয় বিষয়ত জনসম্পৃক্ততা গঢ়ি তোলাৰ ক্ষেত্ৰত কাম কৰি আহিছে। সংগঠনটোৰ মতে, বহনক্ষম আৰু ন্যায়সঙ্গত উন্নয়ন নিশ্চিত কৰিবলৈ ন্যায়ব্যৱস্থা, আইনজ্ঞ, নীতিনিৰ্ধাৰক আৰু সাধাৰণ নাগৰিকৰ মাজত গঠনমূলক সংলাপ অতি প্ৰয়োজনীয়।
আয়োজকসকলে অধিবক্তা, শিক্ষাৰ্থী, গৱেষক, পৰিৱেশ কৰ্মী, নাগৰিক সমাজৰ সদস্য, সংবাদ মাধ্যমৰ প্ৰতিনিধি আৰু সাধাৰণ ৰাইজক অনুষ্ঠানত উপস্থিত থাকিবলৈ আহ্বান জনাইছে।
