গাড়ী বা বাইকৰ বৈধ বীমা নাথাকিলে এতিয়াৰে পৰা পেট্ৰ’ল পাম্পত ইন্ধন লাভ নকৰিবও পাৰে। মঙলবাৰে ন্যায়ধীশ সঞ্জয় কাৰোল আৰু ন্যায়ধীশ প্ৰশান্ত কুমাৰ মিশ্ৰাৰ বিচাৰপীঠে এই সন্দৰ্ভত পৰীক্ষামূলকভাৱে কি পদক্ষেপ গ্ৰহণ কৰিব পাৰি, সেই বিষয়ে চিন্তা-চৰ্চা কৰিবলৈ কেন্দ্ৰীয় চৰকাৰক নিৰ্দেশ দিছে। দেশৰ ৰাস্তাত বৈধ বীমা অবিহনে চলাচল কৰা গাড়ীৰ সংখ্যা লক্ষ্য কৰি ন্যায়ালয়ে সমগ্ৰ দেশৰ পেট্ৰ’ল পাম্পসমূহৰ বাবে এক নতুন প্ৰকল্প আৰম্ভ কৰাৰ প্ৰস্তাৱ আগবঢ়াইছে।
উচ্চতম ন্যায়ালয়ৰ নিৰ্দেশ মৰ্মে, কেন্দ্ৰীয় পথ পৰিবহণ মন্ত্ৰালয় আৰু ‘ভাৰতীয় বীমা নিয়ন্ত্ৰণ আৰু উন্নয়ন কৰ্তৃপক্ষ’ই যুটীয়াভাৱে এক নতুন প্ৰকল্পৰ পৰিকল্পনা কৰিছে। এই প্ৰস্তাৱিত ব্যৱস্থা অনুসৰি, পেট্ৰ’ল পাম্পত ইন্ধন ভৰোৱাৰ আগতে কৰ্মচাৰীসকলে বাহনখনৰ বীমা বৈধ হয় নে নহয় বা তাৰ নৱীকৰণ কৰা হৈছে নে নাই, সেয়া পৰীক্ষা কৰিব পাৰিব। যদি গাড়ীখনৰ বৈধ বীমা নাথাকে, তেন্তে বীমা নৱীকৰণ নকৰা পৰ্যন্ত ইন্ধন যোগান বন্ধ কৰাৰ ব্যৱস্থাও থাকিব। অৱশ্যে, একেবাৰে আৰম্ভণিতে কৰ্মচাৰীসকলে গ্ৰাহকক ইন্ধন দিয়াৰ পৰা বিৰত নাথাকি কেৱল সতৰ্কহে কৰি দিব। ইয়াৰ উপৰিও, পথত ট্ৰেফিক আৰক্ষীয়েও বীমা পৰীক্ষা কৰাৰ ক্ষমতা লাভ কৰিব। যিদৰে ট্ৰেফিক নিয়ম ভংগ কৰিলে ‘স্বয়ংক্ৰিয় নম্বৰ প্লেট চিনাক্তকৰণ’ কেমেৰাৰ জৰিয়তে ধৰা পেলোৱা হয়, একেদৰে বীমাবিহীন বাহনসমূহকো এই প্ৰযুক্তিৰে চিনাক্ত কৰাৰ প্ৰস্তাৱ দিয়া হৈছে। লগতে, ট্ৰেফিক আৰক্ষীক তাৎক্ষণিকভাৱে বীমা পৰীক্ষা কৰিবলৈ বিশেষ ম’বাইল এপ বা যন্ত্ৰ প্ৰদান কৰাৰ পৰামৰ্শও আগবঢ়োৱা হৈছে।
ইয়াৰ উপৰি, ন্যায়ালয়ে নতুন গাড়ীৰ ক্ষেত্ৰত ‘থাৰ্ড পাৰ্টী বীমা’ৰ ম্যাদ বৃদ্ধিৰো প্ৰস্তাৱ দিছে। ২০১৮ চনৰ নিৰ্দেশ অনুসৰি বৰ্তমান ব্যক্তিগত চাৰিচকীয়া গাড়ীৰ ক্ষেত্ৰত এই ম্যাদ ৩ বছৰ আৰু বাইকৰ ক্ষেত্ৰত ৫ বছৰ, যিটো ন্যায়ালয়ে ক্ৰমে ৪ বছৰ আৰু ৬ বছৰলৈ বৃদ্ধি কৰিবলৈ পৰামৰ্শ দিছে।
উচ্চতম ন্যায়ালয়ে বৈধ বীমা অবিহনে গাড়ী চলোৱাৰ প্ৰৱণতাক লৈ গভীৰ উদ্বেগ প্ৰকাশ কৰিছে। বিত্ত বিষয়ক সংসদীয় স্থায়ী সমিতিৰ ২০২৪-২৫ বৰ্ষৰ প্ৰতিবেদনৰ উদ্ধৃতি দি ন্যায়ালয়ে কয় যে, ভাৰতৰ ৰাস্তাত চলাচল কৰা প্ৰায় ৫৬ শতাংশ গাড়ীৰেই বৈধ বীমা নাই। দেশৰ মুঠ ৩০ কোটি ৪৮ লাখ গাড়ীৰ ভিতৰত প্ৰায় ১৬ কোটি ৫৪ লাখ গাড়ীয়েই বৰ্তমান বীমাৰ আওতাৰ বাহিৰত।
ন্যায়ালয়ে কৈছে যে বীমাবিহীন গাড়ী চিনাক্তকৰণৰ এই ব্যৱস্থাৰ দুটা লাভ হ’ব প্ৰথমতে, ইয়াৰ জৰিয়তে বীমাবিহীন বা অপঞ্জীয়নকৃত গাড়ী সহজে চিনাক্ত কৰিব পৰা যাব; দ্বিতীয়তে, ইয়াৰ ফলত গাড়ীৰ গৰাকীসকল বৈধ বীমা বজাই ৰাখিবলৈ বাধ্য হ’ব। ইয়াৰ ফলত পথ দুৰ্ঘটনাত পতিত লোকসকলে সময়মতে ক্ষতিপূৰণ লাভ নকৰাৰ লগতে দীঘলীয়া আইনী প্ৰক্ৰিয়াৰ সন্মুখীন হ’বলগীয়া হোৱাৰ সমস্যাটোও কমিব। উল্লেখযোগ্য যে পেট্ৰ’লিয়াম আৰু প্ৰাকৃতিক গেছ মন্ত্ৰালয়েও এই প্ৰস্তাৱত নীতিগতভাৱে কোনো আপত্তি নাই বুলি ন্যায়ালয়ক অৱগত কৰিছে। এই সমস্যাৰ স্থায়ী সমাধান কৰিবলৈ আৰু মানুহক নিয়ম মানি চলিবলৈ বাধ্য কৰোৱাৰ উদ্দেশ্যেই উচ্চতম ন্যায়ালয়ে কেন্দ্ৰক এই কঠোৰ পদক্ষেপসমূহ গ্ৰহণ কৰিবলৈ পৰামৰ্শ দিছে।
