সংসদৰ বৰ্ষাকালীন অধিৱেশনৰ অচলাৱস্থা তৃতীয় সপ্তাহত ভৰি দিয়াৰ সময়তে সংসদীয় পৰিক্ৰমা মন্ত্ৰী কিৰেন ৰিজিজুৱে বুধবাৰে বিৰোধী দলৰ নেতা ৰাহুল গান্ধীক সাক্ষাৎ কৰে। সূত্ৰৰ পৰা জানিব পৰা মতে, সদনৰ এই অচলাৱস্থা দূৰ কৰাৰ উদ্দেশ্যে মন্ত্ৰীগৰাকীয়ে এই পদক্ষেপ গ্ৰহণ কৰে।
বিৰোধীৰ শ্ল’গানৰ মাজতে লোকসভা আৰম্ভ হোৱাৰ কেইমিনিটমানৰ ভিতৰতে স্থগিত ৰখা হয়। ইয়াৰ কিছু সময়ৰ পিছতেই ৰিজিজুৱে ৰাহুল গান্ধীক তেওঁৰ কক্ষত গৈ সাক্ষাৎ কৰে বুলি সূত্ৰই প্ৰকাশ কৰিছে।
জানিব পৰা মতে, চৰকাৰে চলিত অধিৱেশনত পুনৰ উত্থাপন কৰিব বিচৰা সমষ্টি নিৰ্ধাৰণ বিধেয়ক আৰু মহিলা সংৰক্ষণ সংশোধনী বিধেয়কৰ ক্ষেত্ৰত কিৰেন ৰিজিজুৱে কংগ্ৰেছৰ সহযোগিতা বিচাৰিছিল।
কিন্তু ৰাহুল গান্ধীয়ে চৰকাৰৰ এই অনুৰোধ পোনচাতেই নাকচ কৰে। সূত্ৰৰ মতে, বিৰোধী দলৰ নেতাগৰাকীয়ে কিৰেন ৰিজিজুক স্পষ্টভাৱে জনাই দিয়ে যে ৰাম মন্দিৰৰ বৰঙণি চুৰিৰ অভিযোগৰ ওপৰত আলোচনা নোহোৱালৈকে সদনত কোনো কাম-কাজ হ’ব নোৱাৰে। ইয়াৰ লগতে ২০ জুলাইত ৰাজধানীত ছাত্ৰ-ছাত্ৰীৰ প্ৰতিবাদৰ সময়ত আৰক্ষীয়ে গ্ৰহণ কৰা ব্যৱস্থাৰ সন্দৰ্ভত গৃহমন্ত্ৰী অমিত শ্বাহে বিবৃতি নিদিয়ালৈকে সদনৰ কাম-কাজ স্বাভাৱিক নহ’ব বুলিও তেওঁ স্পষ্ট কৰি দিয়ে।
