আজিৰ পৰা ২২ বছৰ পূৰ্বে ওড়িশাৰ নবৰংপুৰ থানাৰ অন্তৰ্গত হিৰলী গাঁৱত তিনিজন লোকক নৃশংসভাৱে হত্যা কৰাৰ অভিযোগত অভিযুক্ত অৰ্জুন জানীক অৱশেষত উচ্চতম ন্যায়ালয়ৰ নিৰ্দেশত দুটা দশকৰো অধিক কাল কাৰাগাৰত কটাবলগীয়া হোৱাৰ পিছত মুকলি কৰি দিয়া হ’ল।
এই ন্যায়িক ত্ৰুটিক লৈ গভীৰ উদ্বেগ প্ৰকাশ কৰি উচ্চতম ন্যায়ালয়ৰ তিনিজনীয়া বিচাৰপীঠে কয় যে পৰ্যাপ্ত প্ৰমাণ অবিহনে ২২ বছৰৰ বাবে এজন ব্যক্তিৰ স্বাধীনতা কাঢ়ি লোৱা হৈছিল।
২০০৪ চনত নবৰংপুৰ আৰক্ষী থানাৰ অন্তৰ্গত হিৰলী গাঁৱত তিনিগৰাকী মহিলাক নৃশংসভাৱে হত্যা কৰা হৈছিল। ঘটনাৰ পিছত এজন মাত্ৰ সম্ভাৱ্য প্ৰত্যক্ষদৰ্শীয়ে ঘটনাস্থলীত লোকজনক দেখা বুলি দাবী কৰাত অৰ্জুন জানীক গ্ৰেপ্তাৰ কৰা হয়।
এই গোচৰৰ প্ৰেক্ষাপটত শীৰ্ষ ন্যায়ালয়ে কয় যে পৰ্যাপ্ত প্ৰমাণ অবিহনে এজন ব্যক্তিক দুটা দশকৰো অধিক সময় কাৰাগাৰত ৰখাটো দেশৰ ন্যায়িক ব্যৱস্থাৰ সামূহিক বিফলতা।
উচ্চতম ন্যায়ালয়ৰ নিৰ্দেশত এক তদন্তত প্ৰকাশ পাইছে যে নবৰংপুৰ থানাৰ আৰক্ষীয়ে প্ৰথমে তেওঁক সন্দেহজনকভাৱে গ্ৰেপ্তাৰ কৰিছিল। তাৰ পিছত জেৰাৰ সময়ত তেওঁলোকে তেওঁৰ পৰা স্বীকাৰোক্তি উলিয়াবলৈ ‘থাৰ্ড ডিগ্ৰী’ পদ্ধতি ব্যৱহাৰ কৰিছিল অভিযোগ উত্থাপন হৈছে।
আৰক্ষীৰ নিৰ্মম প্ৰহাৰত অৰ্জুন জানীয়ে যি স্বীকাৰোক্তি দিছিল তাৰ ওপৰত ভিত্তি কৰিয়েই শেষলৈকে চৰকাৰী পক্ষৰ গোচৰটো টিকিছিল। ফলত অৰ্জুন জানীক দোষী সাব্যস্ত কৰি দীৰ্ঘদিনীয়া কাৰাদণ্ডৰ শাস্তি প্ৰদান কৰা হয়। তিনিগৰাকী মহিলাক হত্যা কৰাৰ অপৰাধত তেওঁ ২২ বছৰ কাৰাদণ্ড ভুগিছে।
তদন্তৰ সৈতে জড়িত প্ৰমাণ আৰু পৰিস্থিতিসমূহ পুনৰীক্ষণ কৰাৰ পিছত উচ্চতম ন্যায়ালয়ে এই সিদ্ধান্তত উপনীত হয় যে ৰাষ্ট্ৰপক্ষই যুক্তিসংগত সন্দেহৰ বাহিৰত অভিযুক্তৰ দোষী প্ৰমাণ কৰিব নোৱাৰে।
সকলো তদন্তৰ অন্তত ন্যায়াধীশ জে.বি.পাৰদিৱালা, ন্যায়াধীশ কে বিনোদ চন্দ্ৰন আৰু ন্যায়াধীশ এছ.কে. সিঙৰ বিচাৰপীঠে ৰায় দিয়ে যে বিশ্বাসযোগ্য আৰু আইনী প্ৰমাণৰ অভাৱত এই দণ্ডাদেশ আৰু বাহাল ৰাখিব নোৱাৰি।
অৰ্জুন জানীক সকলো অভিযোগৰ পৰা মুক্ত কৰি উচ্চতম ন্যায়ালয়ে তেওঁৰ স্বাধীনতা পুনৰ ঘূৰাই অনাই নহয়, এজন নিৰীহ লোকৰ ২২ বছৰ নষ্ট কৰাৰ বাবে ন্যায়িক ব্যৱস্থাৰ ত্ৰুটিসমূহৰো তীব্ৰ সমালোচনা কৰে।
