পৰিচালক নীতেশ তিৱাৰীৰ মেগা প্ৰজেক্ট ‘ৰামায়ণ’ আৰু সেই ছবিখনত ‘ৰাম’ৰ চৰিত্ৰত ৰণবীৰ কাপুৰৰ অভিনয়ে ইতিমধ্যে দৰ্শকৰ মাজত যথেষ্ট আলোড়নৰ সৃষ্টি কৰিছে। কিন্তু বহু কোটি টকীয়া এই ছবিখন নিৰ্মাণৰ বহু আগতেই নব্বৈৰ দশকত ভাৰতীয় চিনেমাৰ ইতিহাসৰ এটা অচিনাকি অধ্যায় ৰচিত হৈও স্তব্ধ হৈছিল।
নব্বৈৰ দশকৰ মাজভাগত চোহেইল খানৰ পৰিচালনাত ‘ৰামায়ণ’ মহাকাব্যৰ আধাৰত এখন ছবি নিৰ্মাণৰ কাম আৰম্ভ হয়। য’ত ছলমান খানে ‘শ্ৰী ৰাম’ৰ চৰিত্ৰত অভিনয় কৰিছিল আৰু সোণালী বেন্দ্ৰেই ‘সীতা’ৰ চৰিত্ৰত অভিনয় কৰিছিল। ছবিখনৰ এটি গুৰুত্বপূৰ্ণ চৰিত্ৰত পূজা ভাটেও অভিনয় কৰিছিল।
প্ৰায় ৪০ শতাংশ শ্বুটিং সম্পূৰ্ণ হোৱাৰ পিছতো পাৰিবাৰিক সংঘাত আৰু সম্পৰ্কৰ জটিলতাৰ বাবেই ছবিখন চিৰদিনৰ বাবে বন্ধ কৰি দিয়া হৈছিল। শ্বুটিং চলি থকাৰ মাজতে পূজাই প্ৰজেক্ট এৰি গুচি যোৱাৰ বাবে ছবিখন বন্ধ হৈ পৰে।
সাধাৰণতে বলীউডৰ ছবি এখন বন্ধ হ’লে প্ৰি-প্ৰডাকচন বা প্লেনিং ষ্টেজত বন্ধ হৈ যায়। কিন্তু চোহেইল খানৰ ৰামায়ণৰ ক্ষেত্ৰত কথাটো বেলেগ আছিল। ছবিখনৰ প্ৰায় ৪০ শতাংশ কাম সম্পূৰ্ণ হৈছিল। ছবিখনৰ প্ৰচাৰৰ বাবে কেইবাটাও প্ৰচাৰমূলক ফটোশ্বুটও কৰা হৈছিল, য’ত ছলমান খানক হাতত ধনু-কাঁড় লৈ পৰম্পৰাগত ৰামৰ সাজ-পোছাকত দেখা গৈছিল, যিটোৱে সেই সময়ত এক বৃহৎ আলোড়নৰ সৃষ্টি কৰিছিল।
ছবিখন বাতিলৰ আঁৰত বাজেট সম্পৰ্কীয় কোনো সমস্যা নাছিল। পৰিচালক আৰু ছবিখনৰ মুখ্য অভিনেত্ৰীৰ মাজত ব্যক্তিগত বিবাদৰ বাবে ছবিখনৰ কাম মাজ আদবাটতে বন্ধ হৈ পৰে।
জানিব পৰা মতে, শ্বুটিং চলি থকাৰ মাজতে চোহেইল খান আৰু পূজা ভাটৰ মাজত ঘনিষ্ঠতা গঢ়ি উঠে। ১৯৯৫ চনৰ এক সাক্ষাৎকাৰত পূজা ভাটে বিবাহৰ সম্ভাৱনাৰ কথাও ব্যক্ত কৰিছিল।
ইপিনে, খান পৰিয়ালৰ মুৰব্বী চেলিম খানে এই সম্পৰ্কত হস্তক্ষেপ কৰে আৰু চোহেইলক সম্পৰ্কৰ পৰা ওলাই অহাৰ পৰামৰ্শ দিয়ে। ছলমান খানে গোটেই পৰিস্থিতিটো নিজৰ নিয়ন্ত্ৰণত ৰাখিব বিচাৰিছিল যদিও সেয়া সম্ভৱ নাছিল। অপমানিত হৈ পূজা ভাটে ছবিখনৰ পৰা আঁতৰি যায়। ইয়াৰ বাবেই গোটেই প্ৰকল্পটো পানী হৈ পৰে।
