সংসদত এতিয়াও বিদেশী অনুদান নিয়ন্ত্ৰণ সংশোধনী বিধেয়ক (FCRA) উত্থাপন হোৱা নাই। চলিত অধিৱেশনতে এই বিধেয়কখন উত্থাপন হোৱাৰ কথা আছে। কিন্তু তাৰ আগতেই আমেৰিকাৰ আইন প্ৰণেতা ৰাইলি মূৰে এই বিধেয়কখনক লৈ নিজৰ উদ্বেগ প্ৰকাশ কৰি এক বিতৰ্কৰ সৃষ্টি কৰিছে।
ৰাইলিৰ এই মন্তব্যৰ কঠোৰ উত্তৰ দিছে ভাৰতৰ বৈদেশিক মন্ত্ৰালয়ে। নতুন দিল্লীয়ে স্পষ্ট কৰি দিছে যে এই বিধেয়কখন ভাৰতৰ সম্পূৰ্ণ আভ্যন্তৰীণ বিষয়। অৰ্থাৎ, এই ক্ষেত্ৰত আমেৰিকা বা আন কোনো দেশে হস্তক্ষেপ কৰা উচিত নহয়। ভাৰতৰ বৈদেশিক মন্ত্ৰালয়ে লগতে আঙুলিয়াই দিছে যে আমেৰিকাকে ধৰি বহুতো দেশে নিজৰ দেশত বিদেশী পুঁজি কঠোৰভাৱে নিয়ন্ত্ৰণ কৰে।
শেহতীয়াকৈ মাৰ্কিন কংগ্ৰেছৰ সদস্য ৰাইলিয়ে দাবী কৰিছিল যে এই বিধেয়কখনৰ জৰিয়তে পোনে পোনে খ্ৰীষ্টানসকলৰ ওপৰত আক্ৰমণ কৰা হৈছে। তেওঁ সতৰ্ক কৰি দিছিল যে এই আইনে ভাৰত আৰু আমেৰিকাৰ দ্বিপাক্ষিক সম্পৰ্কতো বেয়া প্ৰভাৱ পেলাব পাৰে। তেওঁ লগতে কয় যে এই বিধেয়কখন আইনলৈ ৰূপান্তৰিত হ’লে চৰকাৰে গীৰ্জা আৰু ধৰ্মীয় সংস্থাসমূহৰ ওপৰত নিজৰ নিয়ন্ত্ৰণ সাব্যস্ত কৰিব পাৰিব। তেওঁৰ এই মন্তব্যৰ প্ৰতিক্ৰিয়া স্বৰূপে শুকুৰবাৰে নতুন দিল্লীয়ে স্পষ্ট কৰি দিয়ে যে আমেৰিকাই ভাৰতৰ আভ্যন্তৰীণ বিষয়ৰ পৰা নিজকে আঁতৰাই ৰখাই ভাল। বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে ভাৰতৰ আইন প্ৰণয়নৰ বিষয়টো আমাৰ নিজৰ কথা আৰু এই সম্পৰ্কীয় সিদ্ধান্ত কেৱল আমাৰ সংসদেহে ল’ব।
নৰেন্দ্ৰ মোদী চৰকাৰে ভাৰতলৈ অহা বিদেশী অনুদান কঠোৰভাৱে নিয়ন্ত্ৰণ কৰাৰ বাবে এই বিধেয়কখন অনাৰ কথা ভাবিছে। আগৰ পৰাই ভাৰতত এনে আইন আছে যদিও নতুন সংশোধনীটো ২০১০ চনৰ আইনৰ ওপৰত ভিত্তি কৰি প্ৰণয়ন কৰা হ’ব। এই বিধেয়কৰ জৰিয়তে কেন্দ্ৰীয় চৰকাৰে বিদেশৰ পৰা অহা ধন আৰু সেই ধনেৰে নিৰ্মাণ কৰা সম্পত্তিৰ ওপৰত কঠোৰ চকু ৰাখিব বিচাৰিছে। নিয়ম অনুসৰি, বিদেশী অনুদানৰ জৰিয়তে সৃষ্টি হোৱা সম্পত্তি প্ৰাথমিকভাৱে চৰকাৰৰ নিয়ন্ত্ৰণত থাকিব। লগতে কোনো সংস্থাই যদি নিজৰ পঞ্জীয়ন নবীকৰণ নকৰে, তেন্তে তেওঁলোকৰ অনুদান পোৱাৰ অধিকাৰ বাতিল হ’ব আৰু চৰকাৰে সম্পত্তিও বাজেয়াপ্ত কৰিব পাৰে। ইফালে এই বিধেয়কখনক লৈ দেশৰ ভিতৰতো তীব্ৰ বিৰোধিতা দেখা গৈছে। কংগ্ৰেছকে ধৰি বিৰোধী দলসমূহে ইয়াৰ বিৰোধিতা কৰিব বুলি জানিবলৈ দিছে। আনহাতে মিজোৰামৰ মুখ্যমন্ত্ৰী লালডুহোমাই কেন্দ্ৰীয় গৃহমন্ত্ৰী অমিত শ্বাহৰ ওচৰত আপত্তি দৰ্শাইছে যদিও গৃহমন্ত্ৰীয়ে তেওঁক আশ্বাস দিছে যে নতুন বিধেয়কখন গৃহীত হ’লেও ইয়াৰ ফলত পূৰ্বৰ নীতিত কোনো প্ৰভাৱ নপৰে।
