মহানগৰীত সংঘটিত এক অতি শোকাবহ পথ দুৰ্ঘটনাত হৰ্ষিত বৰা নামৰ এগৰাকী ছাত্ৰৰ অকাল মৃত্যু ঘটিছে। এই খবৰে ছাত্ৰজনৰ পৰিয়ালৰ লগতে সমগ্ৰ বিদ্যালয় পৰিয়াল আৰু অঞ্চলটোত গভীৰ শোকৰ ছাঁ পেলাইছে। প্ৰাপ্ত তথ্য অনুসৰি, যোৱা নিশা প্ৰায় ৯ বজাত এই কৰুণ দুৰ্ঘটনাটো সংঘটিত হয়। হৰ্ষিত বৰাই মহানগৰীৰ ডাউন টাউন চিকিৎসালয়ত (Down Town Hospital) চিকিৎসাধীন হৈ থকা ককাকৰ খবৰ লৈ ঘৰলৈ উভতি আহি থকা অৱস্থাতে পথ দুৰ্ঘটনাত পতিত হয়। দুৰ্ঘটনাত গুৰুতৰভাৱে আঘাতপ্ৰাপ্ত হৰ্ষিতক লগে লগে চিকিৎসালয়ত ভৰ্তি কৰোৱা হয় যদিও চিকিৎসকৰ সকলো অহোপুৰুষাৰ্থ ব্যৰ্থ কৰি আজি পুৱতি নিশা প্ৰায় ৩ বজাত তেওঁ চিকিৎসালয়তে শেষ নিশ্বাস ত্যাগ কৰে।
হৰ্ষিত বৰা আছিল এছ এছ এ ৰ দ্বাদশ শ্ৰেণীৰ (বাণিজ্য শাখা) সদ্যোত্তীৰ্ণ ছাত্ৰ। তেওঁ প্ৰথম শ্ৰেণীৰ পৰাই একেখন বিদ্যালয়তে অধ্যয়ন কৰি আছিল। পিতৃ-মাতৃৰ একমাত্ৰ সন্তান হৰ্ষিত আছিল বিদ্যালয়খনৰে শিক্ষক লক্ষ্যণ ছাৰৰ ভতিজাক।
অমায়িক ছাত্ৰজনৰ এনে আকস্মিক আৰু অকাল বিয়োগ পিতৃ-মাতৃ, আত্মীয়-স্বজন, বন্ধু-বৰ্গ, শিক্ষক-শিক্ষয়িত্ৰী আৰু সমগ্ৰ বিদ্যালয় পৰিয়ালৰ বাবে এক অপূৰণীয় ক্ষতি। হৰ্ষিতৰ মৃত্যুত সমগ্ৰ বিদ্যালয় পৰিয়ালে গভীৰ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ আন্তৰিক সমবেদনা জ্ঞাপন কৰিছে আৰু শোককূল পৰিয়ালটোক এই অনাকাংক্ষিত দুখ সহ্য কৰিবলৈ শক্তি প্ৰদান কৰাৰ বাবে ভগৱানৰ ওচৰত প্ৰাৰ্থনা জনাইছে। তেওঁৰ বিদেহ আত্মাৰ চিৰশান্তি কামনা কৰা হৈছে।
