স্বাধীনতা দিৱসত লালকিল্লাৰ মূল চৰকাৰী অনুষ্ঠানত এইবাৰ এক নতুন অধ্যায় সংযোজন হ’বলৈ গৈ আছে। ইতিহাস সৃষ্টি কৰি প্ৰথমবাৰৰ বাবে লালকিল্লাৰ ৰাষ্ট্ৰীয় মঞ্চত গোৱা হ’ব ৰাষ্ট্ৰীয় গীত ‘বন্দে মাতৰম’। প্ৰতিৰক্ষা মন্ত্ৰালয়ৰ এক বিবৃতিত এই সিদ্ধান্তৰ কথা জনোৱা হৈছে। একে সময়তে ২০২৬ চনৰ লালকিল্লাৰ স্বাধীনতা দিৱস উদযাপনৰ মূল বিষয়বস্তু বা থীম হিচাপে ‘যুৱ শক্তি’ক নিৰ্বাচন কৰা হৈছে। সমগ্ৰ দেশজুৰি চলি থকা ব্যাপক ছাত্ৰ আন্দোলনৰ পটভূমিত ৰাজনৈতিক মহলে ইয়াক অতি তাৎপৰ্যপূৰ্ণ বুলি গণ্য কৰিছে।
প্ৰতি বছৰে ১৫ আগষ্টত প্ৰধানমন্ত্ৰীয়ে লালকিল্লাত ৰাষ্ট্ৰীয় পতাকা উত্তোলন কৰাৰ পিছত পৰম্পৰা অনুসৰি কেৱল ৰাষ্ট্ৰীয় সংগীত ‘জন গণ মন’ গোৱা হৈছিল। কিন্তু এইবাৰৰ পৰা সেই নিয়মৰ সলনি হ’ব। নতুন কাৰ্যসূচী অনুসৰি, ৰাষ্ট্ৰীয় পতাকা উত্তোলনৰ সময়ত প্ৰথমে ৰাষ্ট্ৰীয় গীত ‘বন্দে মাতৰম’ গোৱা হ’ব আৰু তাৰ পিছতহে ৰাষ্ট্ৰীয় সংগীত বজোৱা হ’ব। বংকিমচন্দ্ৰ চট্টোপাধ্যায় ৰচিত এই কালজয়ী দেশপ্ৰেমমূলক গীতটোৰ ১৫০ বছৰ সম্পূৰ্ণ হোৱা উপলক্ষে ৰাষ্ট্ৰীয় গীতৰ মৰ্যাদা পুনৰ প্ৰতিষ্ঠা কৰিবলৈ কেন্দ্ৰীয় চৰকাৰে বিভিন্ন পদক্ষেপ গ্ৰহণ কৰিছে। খবৰ অনুসৰি, এইবাৰৰ স্বাধীনতা দিৱসৰ চৰকাৰী নিমন্ত্ৰণী পত্ৰতো ‘বন্দে মাতৰম’ৰ ছটা স্তৱক অন্তৰ্ভুক্ত কৰা হৈছে। উল্লেখ্য যে, ২০২৬ চনৰ ফেব্ৰুৱাৰী মাহত চৰকাৰী অনুষ্ঠানত ‘বন্দে মাতৰম’ পৰিৱেশনৰ এক নিৰ্দিষ্ট সময়সীমা আৰু নীতি-নিয়ম কেন্দ্ৰই জাৰি কৰিছিল। সেই নিয়ম অনুসৰি, ৩ মিনিট ১০ ছেকেণ্ড বা ১৯০ ছেকেণ্ডত গীতটোৰ ছটা স্তৱক গাব লাগিব। ৰাষ্ট্ৰীয় পতাকাৰ দৰেই ৰাষ্ট্ৰীয় গীতৰ অৱমাননাকো কঠোৰ শাস্তিযোগ্য অপৰাধ হিচাপে গণ্য কৰিবলৈ শেহতীয়াকৈ সংসদত এখন বিশেষ বিধেয়কো মোদী চৰকাৰে গৃহীত কৰিছে।
‘বিকশিত ভাৰত’ গঠনত তৰুণ প্ৰজন্মৰ ভূমিকাক স্বীকৃতি দিবলৈকে এইবাৰৰ মূল ভাৱনা ‘যুৱ শক্তি’ ৰখা হৈছে। শেহতীয়াকৈ দেশজুৰি প্ৰশ্নকাকত ফাদিল কাণ্ডৰ ফলত সৃষ্টি হোৱা ব্যাপক ছাত্ৰ প্ৰতিবাদৰ সন্মুখীন হৈ তদানীন্তন কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে পদত্যাগ কৰিবলগীয়া হৈছিল। নৰেন্দ্ৰ মোদীৰ নেতৃত্বাধীন চৰকাৰৰ আমোলত এইটোৱেই প্ৰথম ঘটনা য‘ত এজন পূৰ্ণ পৰ্যায়ৰ কেন্দ্ৰীয় মন্ত্ৰীয়ে চাপৰ মাজত পদত্যাগ কৰিবলগীয়া হয়। এনে পৰিস্থিতিত তৰুণ সমাজলৈ এক স্পষ্ট বাৰ্তা প্ৰেৰণ কৰিবলৈ কেন্দ্ৰই দেশ গঠনত ছাত্ৰ আৰু যুৱপ্ৰজন্মৰ গুৰুত্ব দাঙি ধৰিব বিচাৰিছে। সেই কাৰ্যসূচীৰ অংশ হিচাপে পদাৰ্থ বিজ্ঞান, ৰসায়ন বিজ্ঞান, জীৱ বিজ্ঞান আৰু গণিত অলিম্পিয়াডত এইবাৰ পদক জয় কৰা ১৯ জন কৃতী শিক্ষাৰ্থী আৰু দিল্লীৰ বিভিন্ন চৰকাৰী বিদ্যালয়ৰ শিক্ষাৰ্থীসকলক লালকিল্লাত বিশেষ আমন্ত্ৰিত অতিথি হিচাপে উপস্থিত ৰখা হ’ব।
আনহাতে, প্ৰতিৰক্ষা সচিব আৰ কে সিঙে নিশ্চিত কৰিছে যে লোকসভাৰ বিৰোধী দলপতি ৰাহুল গান্ধীকো এই অনুষ্ঠানলৈ আমন্ত্ৰণ জনোৱা হৈছে। আইন অনুসৰি বিৰোধী দলপতিৰ পদটো কেবিনেট মন্ত্ৰীৰ সমতুল্য হোৱাৰ বাবে, পদমৰ্যাদাৰ প্ৰট’কল মানি কেবিনেট মন্ত্ৰীসকলৰ ঠিক পিছতেই তেওঁৰ আসন সংৰক্ষিত কৰি ৰখা হৈছে।
