হায়দৰাবাদৰ নেশ্যনেল একাডেমী অৱ লিগেল ষ্টাডিজ এণ্ড ৰিচাৰ্চ ইউনিভাৰ্চিটিৰ (NALSAR) সমাৱৰ্তন অনুষ্ঠানত মুখ্য অতিথি হিচাপে আমন্ত্ৰণ জনোৱা হৈছিল উচ্চতম ন্যায়ালয়ৰ মুখ্য ন্যায়াধীশ সূৰ্য কান্তক। ইয়াৰ বিৰোধিতা কৰিছিল ছাত্ৰ-ছাত্ৰীৰ এটা অংশই। এই ঘটনাৰ বাবে ভাৰতীয় বাৰ কাউন্সিলে কঠোৰ সিদ্ধান্ত গ্ৰহণ কৰিছে।
বিচিআইয়ে এক নিৰ্দেশনাত কয় যে পৰৱৰ্তী নিৰ্দেশ নিদিয়ালৈকে হায়দৰাবাদৰ নেশ্যনেল একাডেমী অৱ লিগেল ষ্টাডিজ এণ্ড ৰিচাৰ্চৰ ২০২৬ চনৰ বেচৰ কোনো স্নাতককে কোনো ৰাজ্যিক বাৰ কাউন্সিলত অধিবক্তা হিচাপে তালিকাভুক্ত কৰা নহ’ব।
মুখ্য ন্যায়াধীশক সমাৱৰ্তন অনুষ্ঠানলৈ আমন্ত্ৰণ জনোৱাৰ সন্দৰ্ভত সঠিকভাৱে কি হৈছিল সেই সন্দৰ্ভতো বিচিআইয়ে ‘নালছা’ৰ উপাচাৰ্যৰ পৰা বিতং প্ৰতিবেদন বিচাৰিছে।
সৰ্বভাৰতীয় উকীল সন্থাৰ কাৰ্যনিৰ্বাহক সমিতিৰ সদস্য অধিবক্তা ভি পি শৰ্মাই কয় যে এই সিদ্ধান্ত সমিতিৰ অনুমোদন সাপেক্ষে লোৱা হৈছে। ছাত্ৰ-ছাত্ৰীৰ মাজত অনুশাসন বজাই ৰখাৰ স্বাৰ্থত এইটো প্ৰয়োজনীয় আছিল।
ভিপি শৰ্মাই কয় যে এই পৰ্যায়ত বিচিআইয়ে কেৱল বিশ্ববিদ্যালয়ৰ পৰা প্ৰতিবেদন বিচাৰিছে। যদিহে তদন্তত কোনো ধৰণৰ উলংঘা বা অনিয়মৰ সন্ধান পোৱা নাযায় তেন্তে পৰৱৰ্তী প্ৰক্ৰিয়া আৰম্ভ কৰা হ’ব।
তেওঁ কয়, “যদি কোনো নিয়ম উলংঘা নহয়, তেন্তে আমি স্বাভাৱিক প্ৰক্ৰিয়াৰে ‘নালছা’ৰ স্নাতকসকলক উকীল হিচাপে তালিকাভুক্ত কৰিম।” তেওঁ লগতে কয় যে বিচিআইৰ এই সিদ্ধান্তক যিয়েই প্ৰত্যাহ্বান জনাব বিচাৰে তেওঁ কৰিব পাৰে।
উল্লেখ্য যে হায়দৰাবাদৰ নেশ্যনেল একাডেমী অৱ লিগেল ষ্টাডিজ এণ্ড ৰিচাৰ্চ ইউনিভাৰ্চিটিৰ ৪০০ৰো অধিক ছাত্ৰ-ছাত্ৰীয়ে বিশ্ববিদ্যালয়খনৰ সমাৱৰ্তন অনুষ্ঠানত মুখ্য অতিথি (মুখ্য ন্যায়াধীশ সূৰ্য্য কান্ত)ৰ নাম পুনৰ বিবেচনা কৰিবলৈ দাবী জনাই এখন আবেদনত স্বাক্ষৰ কৰিছিল।
আইন বিশ্ববিদ্যালয়ৰ ছাত্ৰ-ছাত্ৰীসকলে কিয় এই দাবী কৰিছে? মুখ্য ন্যায়াধীশৰ ‘ককৰোচ’ মন্তব্যক লৈ তেওঁলোকে প্ৰশ্ন উত্থাপন কৰিছে। যন্তৰ মন্তৰত প্ৰতিবাদকাৰীৰ গোচৰৰ ভিডিঅ’ সন্দৰ্ভত সোধাত তেওঁ কৈছিল যে এইবোৰ চাবলৈ সময় নাই।
ছাত্ৰ-ছাত্ৰীসকলৰ মতে, ‘এনেধৰণৰ মন্তব্য কৰি মুখ্য ন্যায়াধীশে আমাৰ প্ৰতি উদাসীনতা প্ৰকাশ কৰিছে। তেওঁক আমাৰ কলেজলৈ নিমন্ত্ৰণ কৰা, তেওঁৰ হাতত আমাৰ ডিগ্ৰী গতাই দিয়া – এইবোৰ গ্ৰহণযোগ্য নহয়। আমি মহাবিদ্যালয় কৰ্তৃপক্ষক এই আমন্ত্ৰণৰ বিষয়ে পুনৰ চিন্তা কৰিবলৈ অনুৰোধ জনাইছো।’
মন কৰিবলগীয়া যে ইয়াৰ পূৰ্বেও মুম্বাইৰ টাটা ইনষ্টিটিউট অৱ ছ’চিয়েল চাইন্সেছ (টিআইএছএছ) কলেজত একেধৰণৰ কাণ্ড সংঘটিত হৈছিল। তাত মুখ্য অতিথি হিচাপে আমন্ত্ৰণ জনোৱা হৈছিল উচ্চতম ন্যায়ালয়ৰ মুখ্য ন্যায়াধীশক। কিন্তু কলেজ কৰ্তৃপক্ষই সেই সমাৱৰ্তন অনুষ্ঠান বাতিল কৰে। কলেজৰ পঞ্জীয়কে ‘অপ্ৰত্যাশিত পৰিস্থিতি’ৰ উল্লেখ কৰে। কিন্তু শেষ মুহূৰ্তত কিয় এই অনুষ্ঠান বাতিল কৰা হ’ল সেই বিষয়ে তেওঁ স্পষ্ট নকৰিলে।
