আমেৰিকাই চীনৰ ওপৰত উচ্চ শুল্ক আৰোপ কৰিছে। কিন্তু এইবাৰ ভাৰতৰ বিৰুদ্ধে, সেই শুল্ক পৰিহাৰ কৰি চীনৰ সামগ্ৰী আমেৰিকাৰ বজাৰলৈ আমদানি কৰা বুলি অভিযোগ উঠিছে। এই সন্দৰ্ভত ভাৰতৰ নাম উল্লেখ কৰি হোৱাইট হাউছৰ নতুন প্ৰতিবেদন প্ৰকাশ পাইছে।
‘দ্য গ্ৰেট ট্ৰেন্সশ্বিপমেণ্ট কেলেংকাৰী’ শীৰ্ষক প্ৰতিবেদনত ভাৰতক চীনৰ সামগ্ৰীৰ বৃহৎ ‘ছেডো ট্ৰেন্সশ্বিপমেণ্ট নেটৱৰ্ক’ৰ এক গুৰুত্বপূৰ্ণ অংশ হিচাপে চিনাক্ত কৰা হৈছে। ট্ৰাম্প প্ৰশাসনৰ অন্যতম গুৰুত্বপূৰ্ণ উপদেষ্টা পিটাৰ নাভাৰোৱে এই প্ৰতিবেদনক চৰ্চালৈ আনিছে।
প্ৰতিবেদনত দাবী কৰা হৈছে যে আমেৰিকাই চীনৰ সামগ্ৰীৰ ওপৰত অধিক শুল্ক আৰোপ কৰাৰ পিছত পোনপটীয়াকৈ আমেৰিকালৈ পঠোৱাৰ পৰিৱৰ্তে তৃতীয় দেশৰ জৰিয়তে সামগ্ৰী প্ৰেৰণ কৰাৰ প্ৰৱণতা বাঢ়িছে।
এই প্ৰক্ৰিয়াত সামগ্ৰী, পেকেজিং, লেবেল বা নথি-পত্ৰৰ সামান্য পৰিৱৰ্তন কৰি আন দেশৰ সামগ্ৰী হিচাপে দেখুওৱাৰ অভিযোগ উত্থাপন হৈছে। ফলত চীনৰ সামগ্ৰীৰ ক্ষেত্ৰত প্ৰযোজ্য উচ্চ শুল্ক পৰিহাৰ কৰি তুলনামূলকভাৱে কম শুল্ক দি তেওঁলোকে আমেৰিকাৰ বজাৰত প্ৰৱেশ কৰিবলৈ সক্ষম হোৱা বুলি প্ৰতিবেদনত দাবী কৰা হৈছে।
২০১৮ চনৰ পৰাই এই অভিযোগৰ সূচনা হৈছিল। সেই সময়ত তেতিয়াৰ ট্ৰাম্প প্ৰশাসনে চীনৰ সৈতে আমেৰিকাৰ ক্ৰমবৰ্ধমান বাণিজ্যিক ঘাটি হ্ৰাস কৰিবলৈ ৩০১ নং ধাৰাত চীনৰ সামগ্ৰীৰ ওপৰত একাধিক শুল্ক আৰোপ কৰিছিল। হোৱাইট হাউছে দাবী কৰিছে যে তেতিয়াৰ পৰাই চীনৰ ৰপ্তানিকাৰীসকলে ক্ৰমান্বয়ে তৃতীয় দেশৰ জৰিয়তে সামগ্ৰী প্ৰেৰণৰ পথ অধিক ব্যৱহাৰ কৰিবলৈ আৰম্ভ কৰিছে।
প্ৰতিবেদনত উল্লেখ কৰা হৈছে যে বিশ্বৰ প্ৰায় ৪০খন দেশ এই ট্ৰেন্সশ্বিপমেণ্ট নেটৱৰ্কৰ সৈতে জড়িত। দেশসমূহৰ ভূমিকাৰ ওপৰত ভিত্তি কৰি তিনিটা স্তৰত ভাগ কৰা হৈছে। ভাৰতক আটাইতকৈ গুৰুত্বপূৰ্ণ টায়াৰ ১ ত স্থান দিয়া হৈছে। একেখন তালিকাতে কানাডা, জাপান, ইউৰোপীয় ইউনিয়ন, ইজৰাইল আৰু মেক্সিকোৰ দৰে গুৰুত্বপূৰ্ণ আমেৰিকাৰ বাণিজ্যিক অংশীদাৰ দেশসমূহো অন্তৰ্ভুক্ত কৰা হৈছে।
প্ৰতিবেদনখনত অধিক চাঞ্চল্যকৰ দাবী কৰা হৈছে যে ২০২৫ চনত মেক্সিকো, ভাৰত আৰু ভিয়েটনামৰ দৰে ডাঙৰ হাবৰ জৰিয়তে চীনৰ পৰা আমেৰিকালৈ প্ৰায় ৬৭ বিলিয়ন ডলাৰৰ সামগ্ৰী ট্ৰেন্সশ্বিপ কৰা হৈছিল। ফলত আমেৰিকাই শুল্ক ৰাজহৰ পৰা প্ৰায় ২৮ বিলিয়ন ডলাৰ হেৰুৱাইছে – এনেকুৱা এটা হিচাপ দাখিল কৰা হৈছে।
হোৱাইট হাউছে দাবী কৰিছে যে চীনৰ এই সামগ্ৰীৰ প্ৰবাহে আমেৰিকাৰ নিজৰ উদ্যোগৰ ওপৰতো চাপ সৃষ্টি কৰিছে। প্ৰতিবেদনত মডেল ভিত্তিক হিচাপ অনুসৰি বছৰি প্ৰায় ৭৫ বিলিয়ন ডলাৰৰ অবৈধ ট্ৰেন্সশ্বিপমেণ্টে আমেৰিকাত প্ৰায় ৪ লাখ ৫০ হাজাৰ চাকৰিৰ ক্ষতি কৰিব পাৰে। ইয়াৰ উপৰিও দেশখনৰ জিডিপিত ১১৩ৰ পৰা ১৫০ বিলিয়ন ডলাৰ আৰু ফেডাৰেল চৰকাৰৰ ১৯ৰ পৰা ২৬ বিলিয়ন ডলাৰৰ ৰাজহৰ লোকচান হ’ব বুলি অনুমান কৰা হৈছে। কিন্তু প্ৰতিবেদনতে কোৱা হৈছে যে এইবোৰ মডেল ভিত্তিক অনুমান, প্ৰত্যক্ষভাৱে পৰ্যবেক্ষণ কৰা চাকৰি হেৰুৱাৰ সংখ্যা নহয়।
ভাৰতৰ ক্ষেত্ৰতো প্ৰতিবেদনত নিৰ্দিষ্ট ঔদ্যোগিক কৰিডৰৰ কথা উল্লেখ কৰা হৈছে। ইয়াত দাবী কৰা হৈছে যে চীনৰ বৈদ্যুতিক পাম্প আৰু কম্প্ৰেছাৰৰ ট্ৰেন্সশ্বিপমেণ্টৰ ফলত পুনে-গুজৰাট-চেন্নাই কৰিড’ৰ অৰ্থনৈতিকভাৱে লাভৱান হৈছে। আনহাতে, প্ৰতিবেদনত উল্লেখ কৰা হৈছে যে আমেৰিকাৰ অহাইঅ’ ৰাজ্যৰ চিনচিনাটি, ডেটন আৰু কলম্বাছৰ দৰে চহৰৰ নিৰ্মাতাসকলে একেবোৰ সামগ্ৰীৰ বাবেই প্ৰতিযোগিতামূলক ক্ষতিৰ সন্মুখীন হৈছে।
এই পৰিস্থিতিত আমেৰিকাই এতিয়া কঠোৰ ব্যৱস্থা গ্ৰহণৰ কথা সকীয়াই দিছে। চীনৰ সামগ্ৰীক শুল্ক পৰিহাৰ কৰাত সহায় কৰা দেশসমূহৰ বিৰুদ্ধে সামগ্ৰী জব্দ কৰা, অতিৰিক্ত শুল্ক, নিষেধাজ্ঞা আৰু প্ৰয়োজন হ’লে আমেৰিকাৰ বজাৰত প্ৰৱেশ সীমিত কৰাৰ দৰে ব্যৱস্থা গ্ৰহণ কৰাৰ পৰামৰ্শ দিছে।
অৰ্থাৎ এই প্ৰতিবেদন ভাৰতৰ বাবে কেৱল বাণিজ্যিক অভিযোগ নহয়। প্ৰতিবেদনত উত্থাপিত অভিযোগৰ ভিত্তিত যদি আমেৰিকাই ব্যৱস্থা গ্ৰহণ কৰে তেন্তে ভাৰত-আমেৰিকাৰ বাণিজ্যৰ ওপৰতো নতুন হেঁচা সৃষ্টি কৰিব পাৰে। বিশেষকৈ চীনৰ সামগ্ৰীৰ পুনৰ ৰপ্তানি আৰু ট্ৰেন্সশ্বিপমেণ্টৰ ক্ষেত্ৰত নতুন দিল্লীয়ে হয়তো ৱাশ্বিংটনক অধিক ব্যাখ্যা দিব লাগিব।
