আজি উচ্চতম ন্যায়ালয়ে কিংবদন্তি শিল্পী জুবিন গাৰ্গৰ মৃত্যুৰ সৈতে জড়িত হত্যাৰ গোচৰত শ্যামকানু মহন্তক জামিন দিবলৈ অস্বীকাৰ কৰাৰ পাছতে শিল্পীগৰাকীৰ ভগ্নী পামী বৰঠাকুৰে অভিযুক্তসকলৰ আইনী আৰু আৰ্থিক সহায়ৰ বিষয়ক লৈ প্ৰশ্ন উত্থাপন কৰিছে।
শুনানিৰ পূৰ্বে ছ’চিয়েল মিডিয়াত এটা পোষ্ট কৰি পামী বৰঠাকুৰে প্ৰশ্ন কৰে যে শ্যামকানু মহন্ত আৰু সিদ্ধাৰ্থ শৰ্মাৰ বেংক একাউণ্টসমূহ বন্ধ বা জব্দ কৰা বুলি কোৱা হোৱাৰ পাছতো তেওঁলোকে কেনেকৈ উচ্চতম ন্যায়ালয়ত আইনী প্ৰক্ৰিয়া আগবঢ়াব পাৰিছে।
তেওঁ লিখে যে গুৰুতৰ অভিযোগৰ সন্মুখীন হোৱা শ্যামকানু মহন্ত আৰু সিদ্ধাৰ্থ শৰ্মাই বেংক একাউণ্টসমূহ বন্ধ হৈ থকাৰ পাছতো উচ্চতম ন্যায়ালয়ত উপস্থিত হৈ শুনানিত অংশ লৈছে। এই ক্ষেত্ৰত তেওঁলোকক কোনে আইনী আৰু আৰ্থিক সহায় আগবঢ়াইছে আৰু তেওঁলোকৰ পৃষ্ঠপোষকতাত কোন শক্তি আছে, সেই লৈও তেওঁ প্ৰশ্ন কৰে।
একেটা পোষ্টতে পামী বৰঠাকুৰে ন্যায় ব্যৱস্থাৰ ওপৰত আস্থা প্ৰকাশ কৰি জুবিন গাৰ্গৰ বাবে ন্যায় বিচাৰি প্ৰাৰ্থনা কৰাৰ কথাও উল্লেখ কৰে। তেওঁ কয় যে জুবিন দাৰ ন্যায়ৰ বাবে তেওঁ অদৃশ্য শক্তিৰ ওপৰত বিশ্বাস ৰাখিছে আৰু ন্যায় ব্যৱস্থাৰ ওপৰত তেওঁৰ সম্পূৰ্ণ আস্থা আছে। আজিৰ দিনটো এই গোচৰৰ বাবে গুৰুত্বপূৰ্ণ বুলিও তেওঁ উল্লেখ কৰে।
উল্লেখযোগ্য যে গুৱাহাটী উচ্চ ন্যায়ালয়ে ২৯ মে’ত শ্যামকানু মহন্তৰ জামিন আবেদন নাকচ কৰিছিল। ইয়াৰ পাছতে সেই সিদ্ধান্তক প্ৰত্যাহ্বান জনাই মহন্তই উচ্চতম ন্যায়ালয়ৰ দ্বাৰস্থ হৈছিল। সোমবাৰে অনুষ্ঠিত শুনানিত অভিযুক্ত পক্ষৰ অধিবক্তাই জামিনৰ আবেদন জনোৱাৰ বিপৰীতে গোচৰৰ চৰকাৰী পক্ষই জামিনৰ বিৰোধিতা কৰে।
শেষত উচ্চতম ন্যায়ালয়ে শ্যামকানু মহন্তক জামিন প্ৰদান নকৰাৰ সিদ্ধান্ত লয়। ইয়াৰ ফলত গোচৰৰ বিচাৰ প্ৰক্ৰিয়া আগবঢ়াই নিয়াৰ পথ মুকলি থাকিল আৰু মহন্তই বৰ্তমানো জিম্মাত থাকিব লাগিব।
