ইণ্ডোনেছিয়াত হিন্দু ধৰ্মক অপমান কৰাৰ অপৰাধত কাৰাগাৰত বন্দী হৈছে এজন ছুইজাৰলেণ্ডৰ পৰ্যটক। প্ৰতিবেদন অনুসৰি ছুইজাৰলেণ্ডৰ এজন যুৱকে বালিত ভ্ৰমণৰ সময়ত হিন্দু ধৰ্মৰ পবিত্ৰ দিনটোক লৈ অপমানজনক মন্তব্য কৰিছিল। ঘটনা সন্দৰ্ভত তেওঁক গ্ৰেপ্তাৰ কৰা হৈছে। দোষী সাব্যস্ত হোৱাৰ পিছত তেওঁক এবছৰৰ কাৰাদণ্ড বিহা হয়। প্ৰতিবেদনত কোৱা হৈছে যে যুৱকজনক চুইজাৰলেণ্ডৰ দূতাবাসে সহায় আগবঢ়াইছে।
গোটেই ঘটনাটো ঘটিছিল কেইমাহমান আগতে। ইনষ্টাগ্ৰামত এটা পোষ্ট সন্দৰ্ভত আৰক্ষীৰ ওচৰত এজাহাৰ দাখিল কৰাৰ পিছত মাৰ্চ মাহত গ্ৰেপ্তাৰ কৰা হৈছিল লুজান এণ্ড্ৰিন জাগ্ৰেগেন নামৰ যুৱকজনক।
বালি দ্বীপত নৱবৰ্ষ উদযাপনৰ অংশ হিচাপে পালন কৰা হিন্দুৰ ‘মৌন দিৱস’ বা ‘ন্যেপি’ক অপমান কৰাৰ উপৰিও তেওঁ অশ্লীল ভাষা ব্যৱহাৰ কৰাৰ অভিযোগ উত্থাপন হৈছিল। সেই সময়ত থকা নিষেধাজ্ঞা উলংঘা কৰি খালী বীচ্চৰ ভিডিঅ’ পোষ্ট কৰি কুৰুচিকৰ ভাষা ব্যৱহাৰ কৰাৰ অভিযোগ উত্থাপন হৈছিল।
‘ন্যেপি’ হৈছে বালিৰ এটা বাৰ্ষিক উৎসৱ, যাক ‘নিৰৱতাৰ দিৱস’ বুলিও কোৱা হয়। এই সময়ত মানুহে মৌনতা পালন কৰে, উপবাস কৰে আৰু ধ্যান কৰে। এই সময়ছোৱাত সমগ্ৰ দ্বীপটো প্ৰায় নিশ্চল বা বন্ধ হৈ থাকে আৰু সকলোৱে ২৪ ঘণ্টা ঘৰতে থাকিব লাগে। ধৰ্ম বা জাতি নিৰ্বিশেষে বালিৰ বাসিন্দা আৰু পৰ্যটকে এই নিষেধাজ্ঞা মানি চলাটো আশা কৰা হয়।
কিন্তু চুইজাৰলেণ্ডৰ পৰ্যটকগৰাকীয়ে এই নিষেধাজ্ঞা নামানিলে। প্ৰতিবেদন মতে, ন্যায়াধীশগৰাকীয়ে কয় যে ‘(যুৱকজনে) যি কৰিলে সেয়া বালিৰ জনসাধাৰণৰ বাবে আপত্তিজনক আছিল, তেওঁলোকৰ ধৰ্মীয় বিশ্বাসক আঘাত দিছে আৰু জনসাধাৰণৰ ক্ষোভক উচটনি দিছে।’
অৱশ্যে চুইজাৰলেণ্ডৰ পৰ্যটকগৰাকীয়ে কৈছিল, ‘মই যি কৰিলোঁ তাৰ বাবে মই গভীৰভাৱে অনুশোচনা কৰিছো। বালিৰ জনসাধাৰণৰ ওচৰত ক্ষমা বিচাৰিছো।’ তেওঁ লগতে এই নিষেধাজ্ঞাৰ গুৰুত্ব বুজি পোৱা নাই আৰু সেই ৰীতি-নীতি বা বালিৰ মানুহক অপমান কৰাৰ কোনো উদ্দেশ্য নাছিল বুলিও কয়।
অৱশ্যে কাৰাদণ্ডৰ পৰা সাৰি নগ’ল চুইজাৰলেণ্ডৰ পৰ্যটকগৰাকী। আইন অনুসৰি তেওঁ কৰা অপৰাধৰ সৰ্বোচ্চ ৫ বছৰৰ শাস্তিৰ বিধান আছে। প্ৰতিবেদন অনুসৰি কম বয়স আৰু ভাল আচৰণৰ বাবে আদালতে তেওঁক এবছৰ কাৰাদণ্ডৰ নিৰ্দেশ দিয়ে।
