অষ্ট্ৰেলিয়াৰ মাটিত প্ৰথমখন টেষ্টত জয়লাভ কৰি বাংলাদেশে ইতিহাস ৰচনা কৰে। দ্বিতীয়খন টেষ্টত অষ্ট্ৰেলিয়াই সেই দলটোক সম্পূৰ্ণৰূপে ধৰাশায়ী কৰিলে। দ্বিতীয় টেষ্টৰ দুয়োটা ইনিংছতে বাংলাদেশৰ দলটোৱে বেটিঙত খোপনি পুতিবই নোৱাৰিলে। ইয়াৰ বিপৰীতে অষ্ট্ৰেলিয়াই বেটিং তাণ্ডৱেৰে সহজেই প্ৰতিপক্ষৰ পৰা জয় আজুৰি নিলে।
দেওবাৰে নাজমুল হোছেইন শান্তো বাহিনীক সম্পূৰ্ণৰূপে ধৰাশায়ী কৰি অষ্ট্ৰেলিয়াৰ দলটোৱে এক ইনিংছ আৰু ৫১ ৰাণত জয়লাভ কৰে। ইয়াৰ লগে লগে বাংলাদেশ টাইগাৰ বাহিনী পুনৰ এক নিষ্প্ৰভ অধ্যায়লৈ ঘূৰি আহিল।
দ্বিতীয় টেষ্টৰ প্ৰথম ইনিংছত বেটিং কৰিবলৈ নামিয়েই বাংলাদেশে দুৰ্যোগৰ সন্মুখীন হ’বলগীয়া হয়। মিচেল ষ্টাৰ্কৰ বিধ্বংসী বলিঙত তিষ্ঠিব নোৱাৰিলে বাংলাদেশৰ কোনো বেটছমেনে। ফলত বাংলাদেশ দলটো মাত্ৰ ৬৪ ৰানতে অল আউট হয়।
ইয়াৰ পাছত দ্বিতীয় ইনিংছত বেটিং কৰিবলৈ নমাৰ পাছতো বাংলাদেশৰ দলটোৱে তৃতীয় অংকৰ ৰাণ সংখ্যাও চুব নোৱাৰিলে। মাত্ৰ ৯৫ ৰানতে অল আউট হৈ যায়। স্বাভাৱিকতে এনে প্ৰদৰ্শনত তামিম ইকবালৰ ব’ৰ্ড যথেষ্ট লজ্জাত পৰিব।
আটাইতকৈ উল্লেখযোগ্য কথাটো হ’ল আন্তঃৰাষ্ট্ৰীয় টেষ্টৰ ২১ বছৰীয়া ইতিহাসত কোনো দলেই একেৰাহে দুটা ইনিংছত ১০০ ৰানৰ পূৰ্বে অল আউট হোৱা নাই। ইয়াৰ পূৰ্বে ২০০৫ চনত হাৰাৰেত নিউজিলেণ্ডৰ বিৰুদ্ধে খেলা এখন টেষ্টত জিম্বাবুৱে ক্ৰমে ৫৯ আৰু ৯৯ ৰানত অল আউট হৈছিল। এই কাণ্ডৰ পিছত একেৰাহে দুটা ইনিংছত ১০০ ৰানৰ পূৰ্বে অল আউট হৈ খেলপথাৰ এৰি যোৱা প্ৰথমটো দল হৈছে বাংলাদেশ।
কোৱা বাহুল্য যে বাংলাদেশৰ দলটোৱে ৬৪ ৰানত অল আউট হোৱাৰ লগে লগে অষ্ট্ৰেলিয়াই খেলপথাৰত নামে। অষ্ট্ৰেলিয়াই এটা ইনিংছত ২১০ ৰান সংগ্ৰহ কৰি নিজৰ শক্তি প্ৰদৰ্শন কৰে। পিছত বাংলাদেশে অষ্ট্ৰেলিয়াই দিয়া ৰানৰ পাহাৰ অতিক্ৰম কৰাৰ সপোন দেখিছিল। সেইদৰে বেটিং কৰিবলৈ নমাৰ পাছতো ৯৫ ৰানতে অল আউট হয়। ইয়াৰ ফলত ক্ৰিকেটৰ মহাশক্তি হিচাপে পৰিচিত দল অষ্ট্ৰেলিয়াই টেষ্ট শৃংখলা ১-১ ব্যৱধানত সমতা স্থাপন কৰে।
