কেৱল যোৱা বছৰতে দিল্লীত কেন্দ্ৰীয় মন্ত্ৰীসকলৰ বাসগৃহ মেৰামতিৰ কামত ৯২.৩৫ কোটি টকা ব্যয় কৰা হৈছিল। আৰটিআইৰ জৰিয়তে এনে তথ্য পোহৰলৈ আহিছে। প্ৰতিবেদন অনুসৰি আৰটিআইৰ উত্তৰ অনুসৰি ২০২৫-২৬ বিত্তীয় বৰ্ষত লুটিয়েন্সৰ দিল্লীত কেন্দ্ৰীয় বাসগৃহ মেৰামতিৰ বাবে অভিলেখ সংখ্যক ধন ব্যয় কৰা হৈছে বুলি কোৱা হৈছে। যিটো ২০২৪-১৫ বিত্তীয় বৰ্ষৰ হিচাপত তিনিগুণতকৈও অধিক। সেই সময়ত ব্যয়ৰ পৰিমান আছিল ২৭.৪৭ কোটি টকা।
প্ৰতিবেদন অনুসৰি ২০১৪-১৫ বিত্তীয় বৰ্ষৰ পৰা ২০২৫-২৬ বিত্তীয় বৰ্ষৰ ভিতৰত (১২ বছৰত) কেন্দ্ৰীয় চৰকাৰে লোক নিৰ্মাণ বিভাগৰ (পিডব্লিউডি) জৰিয়তে মেৰামতিৰ কামত মুঠ ৫৪৭.৬৮ কোটি টকা ব্যয় কৰিছে। যি বিভাগৰ জৰিয়তে মেৰামতি, সংস্কাৰ আৰু ৰক্ষণাবেক্ষণৰ কাম কৰা হয়।
ব্যয় কিয় আকাশলংঘী হৈছে সেই কথাও আৰটিআই-ত ব্যাখ্যা দিয়া হৈছে। প্ৰতিবেদন অনুসৰি, মুদ্ৰাস্ফীতিৰ লগতে ৰাজধানীৰ মাজমজিয়াত বিস্তৃত অঞ্চলত বিস্তৃত পুৰণি বাংলোৰ ৰক্ষণাবেক্ষণ আৰু মেৰামতিৰ খৰচ বাঢ়ি যোৱাৰ ফলত এই ব্যয় হৈছে।
বাংলোবোৰে কি কি সমস্যাৰ সন্মুখীন হয়? দীৰ্ঘদিন ধৰি লোক নিৰ্মাণ বিভাগৰ বিষয়াসকলে ৰক্ষণাবেক্ষণ সম্পৰ্কীয় বিভিন্ন সমস্যাৰ কথা প্ৰকাশ কৰি আহিছে। দেৱাল বা চাদৰ পৰা পানী সোমোৱা, উঁইপোকৰ উপদ্ৰব, পুৰণি বৈদ্যুতিক ব্যৱস্থা, পানী আৰু নিষ্কাশন ব্যৱস্থাৰ সমস্যা আদি সমস্যাসমূহ হৈয়েই থাকে। আগতে কিছুমান বাংলো ভাঙি পুনৰ নিৰ্মাণৰ পৰিকল্পনাও কৰা হৈছিল। অৱশ্যে সেই পৰিকল্পনা আনুষ্ঠানিকভাৱে কেতিয়াও ঘোষণা কৰা হোৱা নাই।
আৰ টি আইৰ জৰিয়তে লাভ কৰা তথ্য অনুসৰি ২০১৪ চনৰ পৰা ২০১৯ চনলৈ মন্ত্ৰীসকলে বছৰি গড়ে ২৬.৭৮ কোটি টকা মেৰামতি আৰু সংস্কাৰৰ কামত ব্যয় কৰিছিল। এই গড় বাৰ্ষিক ব্যয় ২০১৯ চনৰ পৰা ২০২৪ চনৰ ভিতৰত দুগুণ বৃদ্ধি পাই প্ৰায় ৫০ কোটি টকা হৈছে। ২০২৪-২৫ বিত্তীয় বৰ্ষত ব্যয় আছিল ৭১.৯৮ কোটি টকা। যিটো যোৱা বছৰ ৯২.৩৫ কোটি টকালৈ বৃদ্ধি পালে।
কোন বছৰত কিমান টকা খৰচ হৈছিল?
১) ২০১৪-১৫ বিত্তীয় বৰ্ষঃ ২৭.৪৭ কোটি টকা।
২) ২০১৫-১৬ বিত্তীয় বৰ্ষঃ ২৯.৫৭ কোটি টকা।
৩) ২০১৬-১৭ বিত্তীয় বৰ্ষঃ ৩০.১ কোটি টকা।
৪) ২০১৭-১৮ বিত্তীয় বৰ্ষঃ ২৩.৩৪ কোটি টকা।
৫) ২০১৮-১৯ বিত্তীয় বৰ্ষঃ ২৩.৪২ কোটি টকা।
৬) ২০১৯-২০বিত্তীয় বৰ্ষঃ ২৬.৩৭ কোটি টকা।
৭) ২০২০-২১বিত্তীয় বৰ্ষঃ ৫৩.৮৭ কোটি টকা।
৮) ২০২১-২২বিত্তীয় বৰ্ষঃ ৪০.৮৪ কোটি টকা।
৯) ২০২২-২৩ বিত্তীয় বৰ্ষঃ ৭৩.৮৬ কোটি টকা।
১০) ২০২৩-২৪ বিত্তীয় বৰ্ষ: ৫৪.৫২ কোটি টকা।
১১) ২০২৪-২৫ বিত্তীয় বৰ্ষঃ ৭১.৯৮ কোটি টকা।
১২) ২০২৫-২৬ বিত্তীয় বৰ্ষ: ৯২.৩৫ কোটি টকা।
